មេធាវីខាងសិទ្ធិមនុស្សត្រូវតុលាការចិនកាត់ទោសឲ្យជាប់ពន្ធនាគារ៣ឆ្នាំ
មេធាវីចិនដ៏ល្បីឈ្មោះម្នាក់ ដែលតែងតែជួយការពារក្តីឲ្យសកម្មជនប្រឆាំង និងជនរងគ្រោះដោយការរំលោភសិទ្ធិមនុស្ស ត្រូវបានតុលាការចិនកាត់ទោសនៅថ្ងៃអង្គារនេះឲ្យជាប់ពន្ធនាគារ រយៈពេល ៣ឆ្នាំ ដោយត្រូវព្យួរទោស។ ការកាត់ទោសនេះ គឺជាករណីថ្មីចុងក្រោយមួយទៀត នៅក្នុងយុទ្ធនាការបង្រ្កាបសកម្មជនសិទ្ធិមនុស្ស និងអ្នកប្រឆាំងនយោបាយ នៅចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
លោក ពូ ស្ហ៊ឺឈាំង (Pu Zhiqiang) ត្រូវបានគេស្គាល់តាមរយៈសកម្មភាពជួយការពារក្តីឲ្យជនរងគ្រោះដោយការរំលោភសិទ្ធិមនុស្ស ជាពិសេស ជនរងគ្រោះក្នុងជំរំលត់ដំ និងសកម្មជនប្រឆាំង ដូចជា វិចិត្រករ អៃ វៃវៃ (Ai Weiwei) ជាដើម។ លោកត្រូវបានប៉ូលិសចាប់ឃុំខ្លួន តាំងពីខែឧសភា ឆ្នាំ២០១៤ ដោយសារតែលោកបានសរសេររិះគន់របបកុម្មុយនិស្ត នៅលើបណ្តាញទំនាក់ទំនងសង្គម នៅក្នុងចន្លោះពីឆ្នាំ២០១១ ដល់ឆ្នាំ២០១៤។
នៅក្នុងសវនាការសម្ងាត់ នៅថ្ងៃអង្គារនេះ តុលាការចិនបានសម្រេចឲ្យលោក ពូ ស្ហ៊ីឈាំង ជាប់ពិរុទ្ធពីបទថាបាន “ញុះញង់ឲ្យស្អប់ជាតិសាសន៍” និង “បង្កភាពវឹកវរដល់សង្គម” ហើយផ្តន្ទាទោសឲ្យលោកជាប់ពន្ធនាគារ រយៈពេល ៣ឆ្នាំ ប៉ុន្តែ ទោសនេះត្រូវព្យួរ ពោលគឺ លោកមិនត្រូវអនុវត្តទោសនៅក្នុងពន្ធនាគារនោះទេ។
លោក ពូ ស្ហ៊ីឈាំង ត្រូវបានដោះលែងឲ្យមានសេរីភាពនៅក្រោយសវនាការ ក៏ប៉ុន្តែ គិតជាសរុប លោកត្រូវជាប់ឃុំអស់រយៈពេល ១ឆ្នាំកន្លះមកហើយ ចាប់តាំងពីពេលចាប់ខ្លួន រហូតដល់ពេលចេញសវនាការ។ លើសពីនេះទៅទៀត នៅក្នុងអំឡុងពេលព្យួរទោស លោកនឹងត្រូវស្ថិតក្រោមការឃ្លាំមើល និងត្រួតពិនិត្យយ៉ាងដិតដល់ ពីសំណាក់អាជ្ញាធរ។
នៅក្នុងអំឡុងពេលសវនាការ អ្នកកាសែត និងអ្នកគាំទ្ររបស់លោក ពូ ស្ហ៊ីឈាំង ជាច្រើននាក់ បាននាំគ្នាព្យាយាមចូលទៅក្នុងបរិវេណតុលាការ ក៏ប៉ុន្តែ ពួកគេត្រូវបានប៉ូលិសរារាំង។ អង្គការ Amnesty International វិញ បានចេញសេចក្តីថ្លែងការណ៍មួយ ដោយហៅការកាត់ទោសលោក ពូ ស្ហ៊ីឈាំង ថាជា “អំពើអយុត្តិធម៌ដ៏ធំមួយ” ដែលធ្វើឡើងសំដៅ “រារាំងមិនឲ្យអ្នកការពារសិទ្ធិមនុស្សដ៏ក្លាហានមួយនេះអាចបន្តធ្វើអាជីពរបស់ខ្លួនតទៅទៀត”។
ក៏ប៉ុន្តែ លោកហុង ឡី (Hong Lei) អ្នកនាំពាក្យក្រសួងការបរទេសចិនវិញបានអះអាងថា សេចក្តីសម្រេចរបស់តុលាការ គឺធ្វើឡើងដោយស្របទៅតាមច្បាប់ ចំណែកឯជនជាប់ចោទខ្លួនឯងផ្ទាល់ក៏បានសារភាពទទួលកំហុសរបស់ខ្លួនផងដែរ។ នៅចំពោះមុខអ្នកសារព័ត៌មានបរទេស លោក ហុង ឡី ក៏បានលើកឡើងផងដែរថា “ប្រព័ន្ធយុត្តិធម៌របស់ចិនមានអធិបតេយ្យភាពពេញលេញ ដោយមិនអាចរងឥទ្ធិពលពីបរទេស” បាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ