ចិន៖បើកសវនាការកាត់ទោសមេធាវីការពារសកម្មជនសិទ្ធិមនុស្ស
នៅក្នុងប្រទេសចិន តុលាការក្រុងប៉េកាំងបានផ្តើមសវនាការកាត់ទោសលោកពូ ហ្ស៊ីជាំង (Pu Zhiquiang) នៅថ្ងៃចន្ទ ទី១៤ ធ្នូនេះ។ លោកពូ ហ្ស៊ីជាំង គឺជាមេធាវីការពារក្រុមសកម្មជនសិទ្ធិមនុស្ស និងត្រូវបានជាប់ចោទពីបទបានសរសេរអត្ថបទរិះគន់ទិតៀនរបបកុម្មុយនិស្តចិន រួចផ្សព្វផ្សាយនៅក្នុងមីក្រូប្លុករបស់លោក។ រដ្ឋអំណាចបានដាក់ពង្រាយកម្លាំងប៉ូលិសនៅជុំវិញតុលាការ ហើយក្រុមសកម្មជនការពារសិទ្ធិមនុស្ស រួមទាំងក្រុមគាំទ្រលោកពូ ហ្ស៊ីជាំង និងក្រុមអ្នកកាសែតត្រូវបានគេដាក់ឲ្យនៅឆ្ងាយពីតុលាការ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
ល្បីឈ្មោះជាមេធាវីការពារសិល្បករចិនម្នាក់ឈ្មោះអាយ វៃវៃ លោកពូ ហ្ស៊ីជាំងត្រូវបានប៉ូលិសចាប់ខ្លួនក្នុងខែឧសភា ឆ្នាំ ២០១៤ បន្ទាប់ពីលោកបានចូលរួមនៅក្នុងអង្គប្រជុំមួយស្តីពីខួបគម្រប់ ២៥ឆ្នាំនៃព្រឹត្តិការណ៍សម្លាប់រង្គាលនៅទីលានចៀនអាន់មេនក្នុងក្រុងប៉េកាំងកាលពីឆ្នាំ ១៩៨៩។ គិតមកដល់ថ្ងៃនេះ គឺមានរយៈពេលជាង ១ឆ្នាំមកហើយដែលលោកពូ ហ្ស៊ីជាំង ព្រមទាំងសកម្មជនសិទ្ធិមនុស្សផ្សេងទៀតកំពុងដេកក្នុងគុក។ គឺទើបតែនៅថ្ងៃចន្ទ ទី១៤ ធ្នូ ឆ្នាំ ២០១៥ នេះទេដែលតុលាការបានបើកសវនាការកាត់ទោសលោកពូ ហ្ស៊ីជាំង។
លោកពូ ហ្ស៊ីជាំងបានជាប់ចោទពីបទបានសរសេរអត្ថបទខ្លីៗចំនួន ៧ច្បាប់ផ្សព្វផ្សាយនៅក្នុងប្លុក និងបណ្តាញសង្គមរបស់លោក និងដែលរដ្ឋអំណាចបានចាត់ទុកខ្លឹមសារនៅក្នុងអត្ថបទរបស់លោកថា មានលក្ខណៈញុះញង់ឲ្យមានការស្អប់ខ្ពើមជនជាតិពិន្ធុ ព្រមទាំងបង្កឲ្យមានភាពបះបោរ។ តែបើគេពិនិត្យមើលជាលក្ខណៈទូទៅឃើញថា អត្ថបទខ្លីទាំង ៧ច្បាប់របស់លោកពូ ហ្ស៊ីជាំងមានខ្លឹមសារតែមួយគត់ គឺរិះគន់ ទិតៀនរបបកុម្មុយនិស្ត។
មានអត្ថបទមួយ របស់លោកពូ ហ្ស៊ីជាំង លោកមេធាវីបានធ្វើការរិះគន់ វាយប្រហារលើនយោបាយគៀបសង្កត់របស់ចិនលើក្រុមជនជាតិភាគតិចអ៊ុយហ្គួរអ្នកកាន់សាសនាអ៊ីស្លាមក្នុងតំបន់ស៊ីនជាំង។ ចំណែកអត្ថបទមួយទៀត លោកពូ ហ្ស៊ីជាំងបានចោទជាសំណួរថា ហេតុអ្វីបានជាគេចាំបាច់យករូបថតលោកម៉ៅ សេទុងទៅដាក់តាំងក្នុងវិហាររបស់ទីបេ។ រដ្ឋអំណាចបានពង្រាយកម្លាំងប៉ូលិសជាច្រើននាក់នៅជុំវិញតុលាការ ហើយក្រុមសកម្មជនសិទ្ធិមនុស្ស ក្រុមអ្នកគាំទ្រលោកពូ ហ្ស៊ីជាំង ព្រមទាំងក្រុមអ្នកកាសែតត្រូវបានគេដាក់ឲ្យនៅឆ្ងាយពីតុលាការ។
អ្វីជាការកត់សម្គាល់នៅក្នុងសវនាការកាត់ទោសលោកពូ ហ្ស៊ីជាំងថ្ងៃនេះ គឺវត្តមានមន្រ្តីការទូតជាន់ខ្ពស់អាមេរិកម្នាក់លោក Dan Biers។ លោក Dan ដែលបានថ្លែងថា ក្រុមមេធាវី និងក្រុមអ្នកតំណាងសង្គមស៊ីវិលមិនត្រូវក្លាយជាផ្ទាំងស៊ីបទទួលការគាបសង្កត់ជាប់ជាប្រចាំទេ តែត្រូវអនុញ្ញាតឲ្យចូលរួមនៅក្នុងដំណើរការកសាងប្រទេសចិនមួយរុងរឿង និងស្ថិរភាព។ បើផ្អែកលើបទចោទប្រកាន់ លោកមេធាវីពូ ហ្ស៊ីជាំងអាចនឹងទទួលទោសជាប់ក្នុងពន្ធនាគារចំនួន ៨ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ