អឺរ៉ុប-តួកគី៖កិច្ចព្រមព្រៀងស្តីពីជនអន្តោប្រវេសន៍កំពុងទទួលការគំរាមកំហែង
កិច្ចព្រមព្រៀងស្តីពីជនអន្តោប្រវេសន៍រវាងសហភាពអឺរ៉ុប និងប្រទេសតួកគីកំពុងជួបឧបសគ្គ។ ឧបសគ្គដែលបានកើតមានឡើង ក្រោយការថ្លែងរបស់លោកប្រធានាធិបតីតួកគី Receyp Tayyip Erdogan នាថ្ងៃសុក្រ ទី៦ ឧសភា។ នៅក្នុងសេចក្តីថ្លែងការណ៍នោះ លោក Erdogan បានប្រឆាំងនឹងសំណើមួយរបស់អឺរ៉ុបដែលសុំឲ្យតួកគីធ្វើកំណែទម្រង់ច្បាប់ប្រឆាំងភេរវនិយម។ អឺរ៉ុបបានបញ្ជាក់ថា បើតួកគីមិនបំពេញល័ក្ខខ័ណ្ឌមួយនេះទេ អឺរ៉ុបនឹងមិនលុបចោលទិដ្ឋាការសម្រាប់ពលរដ្ឋតួកគីដែលចង់ចូលក្នុងលំហរ Schengen ឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ដើម្បីអាចឲ្យអឺរ៉ុបលប់ទិដ្ឋាការសម្រាប់ពលរដ្ឋតួកគីចូលក្នុងលំហរ Schengen បាន អឺរ៉ុបបានតម្រូវឲ្យតួកគីបំពេញល័ក្ខខ័ណ្ឌចំនួន ៧២ចំណុចចាប់ពីពេលនេះដល់ដំណាច់ខែមិថុនាខាងមុខ។ ជាថ្នូរត្រឡប់ពីតួកគីវិញ តួកគីបានយល់ព្រមចុះកិច្ចព្រមព្រៀងជាមួយអឺរ៉ុបក្នុងការទទួលយកជនអន្តោប្រវេសន៍។ កិច្ចព្រមព្រៀងស្តីពីជនអន្តោប្រវេសន៍រវាងអឺរ៉ុប និងតួកគីត្រូវបានចុះហត្ថលេខាតាំងពីថ្ងៃទី១៨ មីនាកន្លងទៅ។ កិច្ចព្រមព្រៀងស្តីពីជនអន្តោប្រវេសន៍នោះបានចែងពីការចាប់បញ្ជូនជនអន្តោប្រវេសន៍ដែលចូលក្នុងទឹកដីប្រទេសក្រិកខុសច្បាប់ទៅកាន់ប្រទេសតួកគី។
ក្រៅពីយល់ព្រមលប់ចោលទិដ្ឋាការសម្រាប់ពលរដ្ឋតួកគីចូលក្នុងលំហរ Schengen អឺរ៉ុបក៏យល់ព្រមផ្តល់ប្រាក់ឲ្យតួកគីចំនួន ៣ ០០០លានអឺរ៉ូដែរ។ តែជាដំបូង តួកគីត្រូវគោរពឲ្យបានពេញលេញនូវល័ក្ខខ័ណ្ឌចំនួន ៧២ចំណុចជាមុនសិន។ នៅក្នុងល័ក្ខខ័ណ្ឌចំនួន ៧២ចំណុចរបស់អឺរ៉ុបក៏មានសំណូមពរឲ្យតួកគីធ្វើកំណែទម្រង់លើច្បាប់ប្រឆាំងភេរវនិយមដែរ។ ច្បាប់ដែលអឺរ៉ុបយល់ថា មិនបានឆ្លើយតបតាមស្តង់ដារប្រជាធិបតេយ្យរបស់អឺរ៉ុបទេ។
កន្លងមក ទីក្រុងអង់ការ៉ាធ្លាប់បានបញ្ជាក់ថា ខ្លួនបានបំពេញល័ក្ខខ័ណ្ឌជាច្រើនដែលអឺរ៉ុបបានទាមទារ រួមទាំងសម្រួលច្បាប់ប្រឆាំងភេរវនិយមផង។ សូមជម្រាបជូនថាសម្រាប់រដ្ឋាភិបាលតួកគី ច្បាប់ប្រឆាំងភេរវនិយមជាប្រធានរឿងរសើបខ្លាំងណាស់ ព្រោះចំពេលដែលតួកគីកំពុងប្រឈមនឹងជម្លោះជាមួយក្រុមឧទ្ទាមគួដ និងកំពុងទទួលរងអំពើភេរវកម្មជាច្រើនដងពីពួកជីហាតអង្គការរដ្ឋអ៊ីស្លាម។ តែសម្រាប់អឺរ៉ុប ច្បាប់ប្រឆាំងភេរវនិយមរបស់តួកគីហាក់ដូចជាទូលំទូលាយខ្លាំង ព្រោះវាបានប៉ះពាល់ដល់ក្រុមប្រឆាំងនៅតួកគី។
ជាថ្មីម្តងទៀត អឺរ៉ុបបានស្នើឲ្យតួកគីធ្វើកំណែទម្រង់ច្បាប់នេះឲ្យបានស៊ីជម្រៅបន្ថែមទៀត។ តែលោកប្រធានាធិបតីតួកគី Erdogan បានបដិសេធ និងប្រើពាក្យធ្ងន់ៗតបនឹងអឺរ៉ុបយ៉ាងដូច្នេះថា « បើអឺរ៉ុបមិនសុខចិត្តទេ យើងគួរតែចែកផ្លូវគ្នាដើរ ហើយអឺរ៉ុបអាចទៅចុះកិច្ចព្រមព្រៀងជាមួយអ្នកផ្សេងចុះ » ។ សម្រាប់មជ្ឈមណ្ឌល European Policy Center បានយល់ឃើញថា ពាក្យសម្តីរបស់ប្រមុខរដ្ឋតួកគីអាចនឹងធ្វើកិច្ចព្រមព្រៀងអឺរ៉ុប និងតួកគីស្តីពីជនអន្តោប្រវេសន៍រលាយត្រឹមនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ