សហភាពអឺរ៉ុប និងតួកគី ចុះកិច្ចព្រមព្រៀងបញ្ឈប់លំហូរអន្តោប្រវេសន៍ទាំងចម្រូងចម្រាស
នៅទីបំផុត សហភាពអឺរ៉ុប និងតួកគី បានរកឃើញកិច្ចព្រមព្រៀងជាមួយគ្នាដើម្បីបិទបញ្ចប់លំហូរអន្តោប្រវេសន៍ នៅល្ងាចថ្ងៃសុក្រទី ១៨មីនា ២០១៦។ ជាកិច្ចព្រមព្រៀងដ៏សំខាន់ មិនធ្លាប់មាន ប៉ុន្តែក៏មានលក្ខណៈចម្រូងចម្រាសខ្លាំងក្លាដែរ។ ឯការអនុវត្តកិច្ចព្រមព្រៀងវិញ សន្យាថាពិតជានឹងជួបការស្មុគស្មាញខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ការចរចាបានអូសបន្លាយនិងតឹងតែងខ្លាំងណាស់ ទម្រាំនឹងសម្រេចបានជាកិច្ចព្រមព្រៀង អឺរ៉ុប-តួកគី ដ៏ចាំបាច់បំផុត នៅល្ងាចមិញនេះ។ វិធានការ “បណ្តោះអាសន្ន និងវិសាមញ្ញ” ដ៏ចំបង នៃកិច្ចព្រមព្រៀង គឺការបញ្ជូនជនភៀសខ្លួនគ្រប់សញ្ជាតិ (ស៊ីរី អ៊ីរ៉ាក់ អាហ្វហ្កានីស្ថាន ...) រាប់ទាំងអ្នកបានដាក់សុំសិទ្ធិជ្រកក្រោនរួចផង ចេញប្រទេសក្រិកទៅតួកគីទាំងអស់ ហើយការនេះនឹងចាប់ចូលជាធរមាន ចាប់ពីថ្ងៃអាទិត្យទី ២០មីនា ស្អែកនេះតែម្តង។ ការបញ្ជូនធ្វើឡើងស្របតាមច្បាប់អន្តរជាតិ នេះជាការសន្យារបស់ប្រធានាធិបតីបារាំង។ បារាំងនិងអាល្លឺម៉ង់ ត្រូវផ្តើមប្រមូលផ្តុំភ្នាក់ងារការពារព្រំដែនបន្ថែម២០០នាក់ និង១០០នាក់ផ្សេងទៀត ខាងចាត់ចែងសុំសិទ្ធិជ្រកកោន។
ហើយជាថ្នូរមកវិញ អឺរ៉ុបនឹងត្រូវទទួលយកជនភៀសខ្លួនស៊ីរីឱ្យចូលមកជ្រកកោននៅអឺរ៉ុប ក្រោមគោលការណ៍មួយទៅមួយមក។ ជំនួយហិរញ្ញវត្ថុ៣ពាន់លានអឺរ៉ូដែលអឺរ៉ុបសន្យាផ្តល់ឱ្យតួកគី អាចនឹងត្រូវបង្កើនប្រសិនបើចាំបាច់។ ចាប់ពីខែមិថុនាទៅ ពលរដ្ឋតួកគីអាចធ្វើដំណើរមកអឺរ៉ុបដោយគ្មានទិដ្ឋាការ ប្រសិនបើលក្ខខណ្ឌ៧២ចំណុចត្រូវបានបំពេញ។ ជាចុងក្រោយ ការចរចាពីបេក្ខភាពតួកគីក្នុងសហភាពអឺរ៉ុបត្រូវបើកទំព័រថ្មី លើចំណុចតែមួយ គឺបញ្ហាហិរញ្ញវត្ថុ។
ក្រិកដែលរកបន្ទុកធ្ងន់ក្នុងវិបត្តិអន្តោប្រវេសន៍ក៏ទទួលបាននូវជំនួយពីអឺរ៉ុបដែរ។ ជំនួយ៣០០លាន សម្រាប់រយៈពេលបីឆ្នាំអាចនឹងត្រូវដំឡើងទៅតាមសេចក្តីត្រូវការ រហូតដល់៧០០លានអឺរ៉ូ។
ភ្នាក់ងារតួកគីធ្វើការលើកោះក្រិក ឯភ្នាក់ងារក្រិកទៅឈរជើងនៅលើឆ្នេរតួកគី ដើម្បីអនុវត្តកិច្ចព្រមព្រៀងនេះ។ នាយករដ្ឋមន្ត្រីតួកគី អបអរចាត់ទុកជាការរកឃើញកិច្ចព្រមព្រៀងអឺរ៉ុបតួកគីជាប្រវត្តិសាស្ត្រ។ ប៉ុន្តែសម្រាប់សមាជិកអឺរ៉ុបមួយចំនួនវិញ ដឹងថាមិនល្អ តែបានបង្ខំចិត្តទទួលយកកិច្ចព្រមព្រៀង ដើម្បីការពារជនភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ