ហេតុអ្វីបានជាគេចាត់ទុកលោហៈកម្រជាវត្ថុធាតុដើមយុទ្ធសាស្រ្តសម្រាប់សេដ្ឋកិច្ចថ្ងៃស្អែក?
ចុះផ្សាយនៅថ្ងៃ៖
ស្តាប់ - ០៥:២០
នៅថ្ងៃព្រហស្បតិ៍ ទី១២ មករា ប្រទេសស៊ុយអែតបានប្រកាសឲ្យដឹងពីការទើបរកឃើញប្រភពលោហៈកម្រក្រោមដីមួយកន្លែងនៅក្នុងតំបន់គីរូណាស្ថិតប៉ែកខាងជើងប្រទេស។ គេនៅមិនទាន់ដឹងពីបរិមាណលោហៈកម្រដែលមាននៅក្រោមដីស៊ុយអែតនៅឡើយទេ។ តែយ៉ាងណាក៏ដោយ នេះពិតជាដំណឹងល្អណាស់សម្រាប់ស៊ុយអែត ពិសេសអឺរ៉ុបដែលកំពុងត្រូវការខ្លាំង និងកំពុងព្យាយាមកាត់បន្ថយការពឹងលោហៈកម្ររបស់អ្នកដទៃ ពិសេសចិន។ ហេតុអ្វីបានជាគេហៅលោហៈកម្រ និងថាអ្វីទៅជាអត្ថប្រយោជន៍របស់លោហៈកម្រនេះ?។
នៅពេលដែលគេនិយាយពីលោហៈកម្រ គឺគេចង់ផ្តោតលើរ៉ែលោហៈចំនួន ១៧ ប្រភេទខុសគ្នា មានឈ្មោះ និងមានអត្ថប្រយោជន៍មិនដូចគ្នាទេ។ ជាទូទៅ រ៉ែលោហៈទាំង ១៧ប្រភេទដែលគេដាក់ឈ្មោះតែមួយជាលោហៈកម្រច្រើនរកឃើញនៅក្នុងដីតែមួយ និងត្រូវបានចែកចេញជាពីរប្រភេទខុសគ្នា គឺរ៉ែលោហៈប្រភេទធ្ងន់ដូចជា dysprosium និងរ៉ែលោហៈប្រភេទស្រាលដូចជា praséodyme និង néodyme។ រ៉ែលោហៈប្រភេទធ្ងន់ dysprosium ត្រូវបានគេយកទៅប្រើនៅក្នុងម៉ាស៊ីនប្រតិកម្មនុយក្លេអ៊ែរ ពិសេសនៅក្នុងវិស័យយោធា។ តែការធ្វើអាជីកម្មលើរ៉ែលោហៈកម្រប្រភេទធ្ងន់ គឺត្រូវចំណាយលុយច្រើន មានការលំបាកជាង និងអាចនាំឲ្យប៉ះពាល់ខ្លាំងដល់បរិស្ថាន។
ចំណែកលោហៈកម្រប្រភេទស្រាល praséodyme និង néodyme ត្រូវបានគេប្រើដើម្បីផលិតរថយន្តអគ្គិសនី ឬមួយក៏ផលិតកង្ហារយក្សម៉ាញ៉េទិកជាដើម។ នៅពេលដែលគេនិយាយពីលោហៈកម្រ ទាំងអស់គ្នាប្រាកដជាយល់បានភ្លាមថាជាលោហៈដែលក្រមិនសូវសម្បូរ។ ការយល់នេះមិនសូវខុស ហើយក៏មិនសូវចំប៉ុន្មានដែរ។ មិនសូវខុស ហើយមិនសូវចំព្រោះតាមពិតទៅ លោហៈកម្រនេះមិនសូវជាក្រប៉ុន្មានទេ។ គ្រាន់តែថា មិនមែនប្រទេសទាំងអស់សុទ្ធតែមានវត្ថុធាតុដើមមួយនេះឯណា។ មានការព្យាករណ៍ថាសព្វថ្ងៃនេះ ពិភពលោកមានចំនួនស្តុកលោហៈកម្រក្នុងដីប្រមាណជា ១២០លានតោន។
នៅក្នុងចំនួននេះ មាន ៤៤លានតោននៅចិន មាន២២លានតោននៅវៀតណាម មាន ២១លានតោននៅប្រេស៊ីល មាន ១២លានតោននៅរុស្ស៊ី និងមាន ៧លានតោននៅក្នុងប្រទេសឥណ្ឌា។ នេះដោយនៅមិនទាន់រាប់បញ្ជូលពីចំនួនតិចតួចដែលមាននៅក្នុងប្រទេសខ្លះទៀតនៅឡើយទេ។ ក្រៅពីជាប្រទេសដែលមានបរិមាណលោហៈកម្រទូទៅច្រើនជាងគេក្នុងលោក ចិនក៏សម្បូរលោហៈកម្រប្រភេទធ្ងន់ដែរ។ មួយវិញទៀត និងបើធៀបនឹងប្រទេសលោកខាងលិចខ្លះ ចិនមានជំនាញ និងមានបទពិសោធន៍ឆ្អិនឆ្អៅនៅក្នុងការធ្វើអាជីវកម្មលោហៈកម្រនេះ។ ខណៈដែលប្រទេសខ្លះកំពុងបន្តអូសជើង ចិនកំពុងបន្តបោះជំហានទៅមុខ ព្រោះថ្មីៗនេះ រដ្ឋាភិបាលក្រុងប៉េកាំងទើបបានប្រសូត្រចេញនូវក្រុមហ៊ុនយក្សមួយដើម្បីគ្រប់គ្រងលើផលិកម្មលោហៈកម្រ។
រហូតមកដល់ពេលនេះ ប្រទេសភាគច្រើន ពិសេសក្រុមប្រទេសលោកខាងលិចបានពឹង និងកំពុងបន្តពឹងខ្លាំងលើលោហៈកម្រនាំចូលពីចិន។ តែទន្ទឹមគ្នានេះ ប្រទេសទាំងនេះ ពិសេសក្រុមប្រទេសអឺរ៉ុបក៏កំពុងស្វែងរកលោហៈកម្រពីប្រភពផ្សេងក្រៅពីចិនដែរ ពិសេសអឺរ៉ុប។ សង្រ្គាមរុស្ស៊ីឈ្លានពានអ៊ុយក្រែនបានធ្វើឲ្យអឺរ៉ុបដឹងខ្លួនពីផលវិបាកនៃការពឹង និងខ្ចីដង្ហើមអ្នកដទៃដើម្បីដកប្រចាំថ្ងៃ។ ផលវិបាកកើតចេញពីសង្រ្គាមមួយនេះ គឺការដែលរុស្ស៊ីបានបិទរ៉ូប៊ីណេឧស្ម័នដែលអឺរ៉ុបបានទិញច្រើនពីរុស្ស៊ី។ អឺរ៉ុបយល់មិនច្រឡំទេថា បើថ្ងៃណាមួយចិនឈប់លក់លោហៈកម្រឲ្យខ្លួនដូចដែលរុស្ស៊ីឈប់លក់ឧស្ម័នឲ្យនោះ អឺរ៉ុបនឹងច្បាស់ជាត្រដរខ្យល់ជាមិនខាន។
គួរបញ្ជាក់ថាសព្វថ្ងៃនេះ លោហៈកម្រចំនួន ៩៨% ដែលអឺរ៉ុបបានប្រើប្រាស់ត្រូវបាននាំចូលពីប្រទេសចិន។ បើតាមប្រធានគណៈកម្មការអឺរ៉ុប លោហៈកម្រដែលអឺរ៉ុបត្រូវការនឹងគុណមួយជាប្រាំពីពេលនេះទៅឆ្នាំ ២០៣០។ ដូច្នេះ ការដែលក្រុមហ៊ុនរ៉ែស៊ុយអែតឈ្មោះ LKAB បានប្រកាសពីការទើបរកឃើញប្រភពលោហៈកម្រដ៏ធំមិនធ្លាប់មានពិតជាដំណឹងល្អមួយដែលមិនអាចមិនសាទរបានទេ។ តាមការប៉ាន់ប្រមាណរបស់ក្រុមហ៊ុន LKAB លោហៈកម្រដែលបានរកឃើញមានបរិមាណប្រមាណជាជាង ១លានតោន។ យ៉ាងណាក៏ដោយ នេះជាចំនួនមួយនៅមិនទាន់គ្រប់គ្រាន់ទេ បើធៀបនឹងតម្រូវការដែលមានការកើនឡើងជាលំដាប់។ តាមការគន់គូររបស់សមាគមនៃក្រុមផលិតករលោហៈកម្រអឺរ៉ុប ដើម្បីជំនួសប្រេង និងឈានទៅមានអព្យាក្រឹត្យកាបូននៅឆ្នាំ ២០៥០ អឺរ៉ុបត្រូវការលោហៈកម្រមួយគុណនឹង ២៦ដងនៃតម្រូវការសព្វថ្ងៃ។
ឃើញថា ជាងពេលណាៗទាំងអស់ចាប់ពីពេលនេះតទៅ លោហៈកម្រជាវត្ថុធាតុដើមយុទ្ធសាស្រ្តដែលពិភពលោកត្រូវការចាំបាច់ជារៀងរាល់ថ្ងៃសម្រាប់ផលិតផលិតផលប្រើប្រាស់គ្រប់យ៉ាងតាំងពីម៉ូទ័ររថយន្តអគ្គិសនី ទូរស័ព្ទដៃ smartphones កញ្ចក់ទូរទស្សន៍ ដ្រូន កង្ហារយក្ស ឬមួយក៏យន្តហោះចម្បាំង។ គេអាចនិយាយបានយ៉ាងខ្លីថា លោហៈកម្រជាវត្ថុធាតុដើមនៃសេដ្ឋកិច្ចនៅថ្ងៃស្អែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ