លោកស្រី លីស ឆេនី អ្នកប្រឆាំងលោកដូណាល់ត្រាំក្នុងបក្សសាធារណរដ្ឋ ត្រូវបាត់អាសនៈសភា
ចុះផ្សាយនៅថ្ងៃ៖
ស្តាប់ - ០៣:៥៨
លោកស្រី លីស ឆេនី (Liz Cheney) សមាជិកសភាមកពីគណបក្សសាធារណរដ្ឋ តែជាអ្នកចេញមុខខ្លាំងជាងគេ ក្នុងការប្រឆាំងនឹងលោកដូណាល់ ត្រាំ ត្រូវទទួលបរាជ័យក្នុងការបោះឆ្នោតផ្ទៃក្នុងបក្ស ហើយត្រូវបាត់បង់សិទ្ធិឈរឈ្មោះជាបេក្ខជនសម្រាប់ការបោះឆ្នោតសភាអាណត្តិថ្មី។ ទោះជាយ៉ាងណា លោកស្រីបានអះអាងថា លោកស្រីនឹងមិនបញ្ឈប់ការប្រឆាំងនឹងលោកដូណាល់ ត្រាំនោះទេ ហើយថា នឹងធ្វើអ្វីៗគ្រប់យ៉ាង ដើម្បីរារាំងមិនឲ្យលោកដូណាល់ ត្រាំ ត្រឡប់មកកាន់អំណាចជាប្រធានាធិបតីសាជាថ្មី។
លោកស្រី លីស ឆេនី គឺជាកូនស្រីច្បងនៃត្រកូល “ឆេនី” ដែលត្រូវបានគេស្គាល់ថាជាត្រកូលអ្នកមានគំនិតអភិរក្សនិយម ហើយមានឥទ្ធិពលមួយ នៅក្នុងគណបក្សសាធារណរដ្ឋ។ ឪពុករបស់លោកស្រី គឺលោក ឌិក ឆេនី (Dick Cheney) ធ្លាប់ធ្វើជាសមាជិករដ្ឋសភា ៥អាណត្តិ មុននឹងលាឈប់ទៅធ្វើជារដ្ឋមន្រ្តីក្រសួងការពារជាតិ នៅក្នុងអាណត្តិរបស់លោកប្រធានាធិបតីចច ប៊ូស ហើយក្រោយមកទៀត បានក្លាយជាអនុប្រធានាធិបតីរបស់លោក ចច ដាបិលយូ ប៊ូស។
លោកស្រី លីស ឆេនី ខ្លួនឯងផ្ទាល់ ក្នុងវ័យ ៥៦ឆ្នាំ ធ្លាប់ជាប់ឆ្នោតជាសមាជិករដ្ឋសភាចំនួន បីអាណត្តិជាប់ៗគ្នាមកហើយ ចាប់តាំងពីឆ្នាំ២០១៦មក មុននឹងត្រូវទទួលបរាជ័យនៅក្នុងការបោះឆ្នោតផ្ទៃក្នុងបក្ស កាលពីថ្ងៃអង្គារ ទល់នឹងបេក្ខជន ដែលជាអ្នកនយោបាយជើងថ្មីម្នាក់ ក៏ប៉ុន្តែ ជាអ្នកគាំទ្រលោកដូណាល់ ត្រាំ ជាពិសេស គាំទ្រការចោទប្រកាន់ថាមានការលួចបន្លំសន្លឹកឆ្នោត ក្នុងការបោះឆ្នោតប្រធានាធិបតី កាលពីឆ្នាំ២០២០។ ការចោទប្រកាន់ពីការលួចបន្លំសន្លឹកឆ្នោត ដែលនាំទៅដល់ការបះបោរដោយអ្នកគាំទ្ររបស់លោកដូណាល់ ត្រាំ នៅវិមានកាពីតូល កាលពីថ្ងៃទី៦ មករា ឆ្នាំ២០២១កន្លងទៅ។
លោកស្រី លីស ឆេនី គឺជាឥស្សរជនដ៏កម្រម្នាក់ក្នុងគណបក្សសាធារណរដ្ឋ ដែលហ៊ានចេញមុខរិះគន់លោកដូណាល់ ត្រាំ ក្រោយហេតុការណ៍បះបោរនៅវិមានកាពីតូល។ លោកស្រី ស្ថិតក្នុងចំណោមសមាជិកសភាមកពីគណបក្សសាធារណរដ្ឋតែ ១០រូបគត់ ដែលបានចូលរួមបោះឆ្នោតដកតំណែងលោកដូណាល់ ត្រាំ ហើយក្រោយមកទៀត លោកស្រីក៏ថែមទាំងបានចូលរួមផងដែរ ក្នុងគណៈកម្មការសភា ដែលទទួលបន្ទុកស៊ើបអង្កេតលើការបះបោរនៅវិមានកាពីតូល ឬហេតុការណ៍៦មករា។
ទាំងនេះបានធ្វើឲ្យលោកស្រីត្រូវក្លាយជាផ្ទាំងស៊ីបនៃការវាយប្រហារដោយលោកដូណាល់ ត្រាំ និងអ្នកគាំទ្រ ដោយនៅមុននឹងទទួលបរាជ័យក្នុងការបោះឆ្នោតក្នុងបក្សនេះ លោកស្រី លីស ឆេនី ក៏ធ្លាប់បានបាត់បង់តំណែងដ៏សំខាន់មួយរួចទៅហើយដែរ កាលពីពេលកន្លងមក គឺតំណែងជាមេដឹកនាំកំពូលលំដាប់ទី៣ ក្នុងក្រុមសមាជិករដ្ឋសភាមកពីគណបក្សសាធារណរដ្ឋ។
ថ្លែងនៅក្នុងអំឡុងយុទ្ធនាការឃោសនាបោះឆ្នោត លោកស្រី លីស ឆេនី បានលើកឡើងថា លោកស្រីដឹងថា បើសិនជាលោកស្រីហៃអើតាមលោកដូណាល់ ត្រាំ ប្រាកដណាស់ថា លោកស្រីនឹងអាចបន្តរក្សាអាសនៈជាសមាជិករដ្ឋសភាតទៅទៀតដោយគ្មានបញ្ហា ក៏ប៉ុន្តែ សម្រាប់លោកស្រី អាសនៈសភា ឬក៏តំណែងណាផ្សេងទៀតក៏ដោយ វាមិនសំខាន់ជាងមនសិការ និងភាពត្រឹមត្រូវដែលលោកស្រីត្រូវការពារនោះទេ។
សម្រាប់លោកស្រី លីស ឆេនី លោកដូណាល់ ត្រាំ តាមរយៈការឃោសនាចោទប្រកាន់ទាំងគ្មានភស្តុតាងពីការលួចបន្លំសន្លឹកឆ្នោត រហូតបង្កឲ្យមានអំពើហិង្សានៅវិមានកាពីតូល គឺជាការគំរាមកំហែងដ៏ធំមួយ ទៅដល់លទ្ធិប្រជាធិបតេយ្យ។
ថ្លែងក្រោយចេញលទ្ធផលបោះឆ្នោត កាលពីថ្ងៃអង្គារ លោកស្រី លីស ឆេនី បានលើកឡើងថា លោកស្រីទទួលបរាជ័យក្នុងការបោះឆ្នោតនេះមែន ក៏ប៉ុន្តែ លោកស្រីនឹងមិនបោះបង់ការតស៊ូនោះទេ ហើយថា លោកស្រីនឹងធ្វើអ្វីៗគ្រប់យ៉ាងទាំងអស់ ដែលអាចធ្វើទៅបាន ដើម្បីធ្វើយ៉ាងណា រារាំងលោកដូណាល់ ត្រាំ មិនឲ្យវិលត្រឡប់មកកាន់អំណាចសាជាថ្មីម្តងទៀតជាដាច់ខាត។
គួរបញ្ជាក់ថា គិតមកទល់នឹងពេលនេះ ថ្វីដ្បិតតែនៅមិនទាន់មានការប្រកាសជាផ្លូវការណាមួយនៅឡើយ ក៏ប៉ុន្តែ គេនាំគ្នារំពឹងថា លោកដូណាល់ ត្រាំ អាចនឹងត្រឡប់មកឈរឈ្មោះជាបេក្ខជនប្រធានាធិបតីម្តងទៀត នៅក្នុងការបោះឆ្នោតនៅឆ្នាំ២០២៤ខាងមុខ។
បណ្តាអ្នកវិភាគជាច្រើននៅអាមេរិក យល់ឃើញថា ក្រោយបរាជ័យក្នុងការបោះឆ្នោត កាលពីថ្ងៃអង្គារ លោកស្រី លីស ឆេនី ប្រហែលជាកំពុងតែសំឡឹងឃើញផ្លូវផ្សេងមួយទៀត ដើម្បីតទល់ជាមួយនឹងលោកដូណាល់ ត្រាំ គឺត្រៀមខ្លួនឈរឈ្មោះជាបេក្ខជន ក្នុងការបោះឆ្នោតប្រធានាធិបតី។ ឬមួយឈរឈ្មោះប្រជែងជាបេក្ខជនប្រធានាធិបតី ក្នុងគណបក្សសាធារណរដ្ឋ ជាមួយនឹងលោកដូណាល់ ត្រាំ។ ឬមួយចេញពីគណបក្សសាធារណរដ្ឋ ទៅឈរឈ្មោះជាបេក្ខជនឯករាជ្យ ដោយគ្មានគណបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ