តើលោកដូណាល់ត្រាំអាចត្រូវចោទប្រកាន់ជុំវិញហេតុការណ៍ហិង្សានៅវិមានកាពីតូល?
ចុះផ្សាយនៅថ្ងៃ៖
ស្តាប់ - ០៥:១១
ការស៊ើបអង្កេត ជុំវិញហេតុការណ៍អ្នកគាំទ្រលោកដូណាល់ ត្រាំ សម្រុកចូលក្នុងវិមានកាពីតូល កាលពីថ្ងៃទី៦ មករា ឆ្នាំ២០២១កន្លងទៅ បានឈានទៅដល់ការចោទប្រកាន់ និងកាត់ទោសមនុស្សជាច្រើនរួចមកហើយ។ ក៏ប៉ុន្តែ នៅក្នុងពេលដែលដំណើរការស៊ើបអង្កេតចេះតែបន្តទៅមុខ ជាពិសេស ការបង្ហាញឯកសារ និងសាកសួរសាក្សី ដោយគណៈកម្មការសភា, គេឃើញថា តួនាទីរបស់លោកដូណាល់ ត្រាំ នៅក្នុងហេតុការណ៍នេះត្រូវបានបង្ហាញកាន់តែច្បាស់ ហើយសំណួរចម្បងមួយត្រូវចោទឡើងថា តើលោកដូណាល់ ត្រាំខ្លួនឯងផ្ទាល់អាចនឹងត្រូវរងនូវការចោទប្រកាន់ពីបទល្មើសព្រហ្មទណ្ឌ ជុំវិញហេតុការណ៍នេះដែរឬក៏យ៉ាងណា?
ជុំវិញហេតុការណ៍ហិង្សានៅវិមានកាពីតូល ដែលបច្ចុប្បន្នត្រូវបានគេស្គាល់ជាទូទៅថា “ហេតុការណ៍៦មករា” អ្នកដែលរិះគន់លោកដូណាល់ ត្រាំ ច្រើនតែនាំគ្នាលើកឡើង អំពីការក្រាញអំណាច ឬប៉ុនប៉ងធ្វើរដ្ឋប្រហារ ឬញុះញង់ឲ្យមានអំពើហិង្សា...។ល។
ក៏ប៉ុន្តែ ការរិះគន់ គឺជារឿងមួយ ចំណែកការចោទប្រកាន់ពីបទល្មើសព្រហ្មទណ្ឌ គឺជារឿងមួយផ្សេង ហើយវាជារឿងស្មុគស្មាញ។ រឹតតែស្មុគស្មាញទៅទៀត នៅក្នុងករណីចោទប្រកាន់លើអតីតប្រធានាធិបតី ដែលជារឿងមិនធ្លាប់មាន នៅក្នុងប្រវត្តិសាស្រ្តអាមេរិក។
ប្រសិនបើការចោទប្រកាន់ទៅលើលោកដូណាល់ ត្រាំ ត្រូវធ្វើឡើង ដោយមិនមានសំណុំរឿងរឹងមាំទេនោះ វាអាចនឹងត្រូវគេមើលមកថា ជាការចោទប្រកាន់ដែលមានលក្ខណៈនយោបាយ ជាពិសេស នៅពេលដែលការចោទប្រកាន់នោះត្រូវបានធ្វើឡើង នៅក្រោមរដ្ឋការរបស់លោកបៃដិន ដែលជាគូប្រជែងរបស់លោកដូណាល់ ត្រាំ។
ជាទូទៅ កាលណានិយាយពីការទទួលខុសត្រូវព្រហ្មទណ្ឌរបស់លោកដូណាល់ ត្រាំ នៅក្នុងហេតុការណ៍៦មករា គេច្រើនតែលើកឡើង ពីបទល្មើសចំនួនពីរ៖ ទី១ ការរារាំងដំណើរការសភា (ក្នុងការផ្តល់សុពលភាពដល់លទ្ធផលបោះឆ្នោត) និងទី២ ការញុះញង់ឲ្យមានអំពើហិង្សា (នៅវិមានកាពីតូល)។
បើយើងពិនិត្យទៅលើហេតុការណ៍ដែលកើតឡើង យើងឃើញថា លោកដូណាល់ ត្រាំ ពិតជាបានដាក់សម្ពាធទៅលើអនុប្រធានាធិបតីរបស់លោក គឺលោក Mike Pence ឲ្យច្រានចោលលទ្ធផលបោះឆ្នោត ហើយការស៊ើបអង្កេតក៏បានបង្ហាញផងដែរថា លោកដូណាល់ ត្រាំ បានដាក់សម្ពាធទៅលើអាជ្ញាធររដ្ឋមួយចំនួនដែលមកពីគណបក្សសាធារណរដ្ឋជាមួយគ្នា ឲ្យចេញមុខអះអាងថា មានការលួចបន្លំសន្លឹកឆ្នោត ចំណែកមេធាវីរបស់លោកដូណាល់ ត្រាំ ថែមទាំងបានរៀបចំផងដែរ នូវគម្រោងការណ៍ ដើម្បីជំរុញឲ្យធ្វើមោឃភាពលទ្ធផលបោះឆ្នោត។
បន្ថែមពីលើនេះទៅទៀត នៅថ្ងៃទី៦មករា ថ្ងៃដែលសភាប្រជុំផ្តល់សុពលភាពលើលទ្ធផលបោះឆ្នោត លោកដូណាល់ ត្រាំបានធ្វើមិទ្ទិញប្រមូលផ្តុំអ្នកគាំទ្ររបស់លោកនៅមុខសេតវិមាន ដោយនៅក្នុងអំឡុងមិទ្ទិញនោះ ក្រៅពីបានលើកឡើងពីការលួចបន្លំសន្លឹកឆ្នោត លោកដូណាល់ ត្រាំ ក៏បានជំរុញផងដែរ ឲ្យអ្នកគាំទ្ររបស់លោកនាំគ្នាធ្វើដំណើរទៅកាន់វិមានកាពីតូល ដើម្បីទាមទារឲ្យលោក Mike Pence ដែលតាមរដ្ឋធម្មនុញ្ញត្រូវមានតួនាទីជាប្រធានព្រឹទ្ធសភានិងជាប្រធានអង្គប្រជុំ ច្រានចោលលទ្ធផលបោះឆ្នោត។ ក្រោយការលើកឡើងរបស់លោកដូណាល់ ត្រាំ អ្នកគាំទ្ររបស់លោកពិតជាបាននាំគ្នាធ្វើដំណើរទៅកាន់វិមានកាពីតូល ព្រមទាំងបានប្រើហិង្សាសម្រុកចូលទៅដល់ខាងក្នុង រហូតធ្វើឲ្យសភាត្រូវផ្អាកការប្រជុំ។
ទាំងនេះ គឺជាហេតុការណ៍ ដែលចង្អុលបង្ហាញពីបទល្មើស ហើយអាចរាប់ថាជាធាតុផ្សំសត្យានុម័តនៃបទល្មើស។ ក៏ប៉ុន្តែ នេះក៏នៅមិនទាន់គ្រប់គ្រាន់នោះដែរ។ ដើម្បីចោទប្រកាន់ទៅលើលោកដូណាល់ ត្រាំ គឺត្រូវមានធាតុផ្សំចម្បងមួយទៀត គឺធាតុផ្សំអត្តនោម័ត គឺសំដៅទៅលើចេតនាក្នុងការប្រព្រឹត្តបទល្មើស។
តើការណ៍ដែលលោកដូណាល់ ត្រាំទាមទារមិនឲ្យផ្តល់សុពលភាពលើលទ្ធផលបោះឆ្នោត គឺដោយសារតែលោកជឿដោយសុទ្ធចិត្តថា មានការលួចបន្លំសន្លឹកឆ្នោតពិតមែន ឬក៏ដឹងដែរថា គ្មានការលួចបន្លំទេ ក៏ប៉ុន្តែ នៅតែទាមទារ ក្នុងចេតនាទុច្ចរិត ដើម្បីរារាំងការផ្តល់សុពលភាពលទ្ធផលបោះឆ្នោត? តើការណ៍ដែលលោកដូណាល់ ត្រាំ ជំរុញឲ្យអ្នកគាំទ្រនាំគ្នាធ្វើដំណើរទៅកាន់វិមានកាពីតូល គ្រាន់តែជាសេចក្តីថ្លែងការណ៍នយោបាយ ដែលស្ថិតក្នុងក្របខណ្ឌនៃសិទ្ធិសេរីភាពក្នុងការបញ្ចេញមតិ ឬក៏ធ្វើឡើង ក្នុងចេតនាឲ្យអ្នកគាំទ្រទៅរារាំងដំណើរការប្រជុំសភាពិតមែន?
កន្លងមក នេះគឺជាចំណុចស្រពិចស្រពិលមួយ នៅក្នុងការកំណត់បទល្មើស ដើម្បីអាចឈានទៅធ្វើការចោទប្រកាន់លោកដូណាល់ ត្រាំ ពីបទល្មើសព្រហ្មទណ្ឌ។ ក៏ប៉ុន្តែ ចម្លើយរបស់សាក្សីដ៏សំខាន់មួយ នៅក្នុងសវនាការសាធារណៈរបស់គណៈកម្មការសភា កាលពីថ្ងៃទី២៨មិថុនាកន្លងទៅ មានចំណុចសំខាន់មួយចំនួន ដែលអាចឲ្យគេកំណត់អំពីចេតនារបស់លោកដូណាល់ ត្រាំ។
សាក្សី ដែលនៅពេលកើតហេតុ គឺជាជំនួយការនាយកខុទ្ទកាល័យរបស់លោកដូណាល់ ត្រាំ បានលើកឡើងថា នៅក្នុងអំឡុងមិទ្ទិញ ថ្ងៃទី៦មករានោះ លោកដូណាល់ ត្រាំ បានបញ្ជាឲ្យគេដកឧបករណ៍ត្រួតពិនិត្យអាវុធលើអ្នកគាំទ្ររបស់លោក ដោយបានលើកឡើងថា លោកមិនខ្វល់ថាពួកគេមានអាវុធឬក៏អត់នោះទេ ហើយបន្ថែមពីលើនេះទៅទៀត នៅក្រោយមិទ្ទិញ លោកដូណាល់ ត្រាំ បានទទូចចង់ធ្វើដំណើរទៅកាន់វិមានកាពីតូលដោយផ្ទាល់ខ្លួនឯង ដោយថែមទាំងមានការប្រទូសរ៉ាយគ្នានៅក្នុងរថយន្តទៀតផង នៅពេលដែលក្រុមអង្គរក្សមិនព្រមជូនលោកទៅវិមានកាពីតូល។
ទាំងនេះ អាចជាតម្រុយបង្ហាញថា នៅពេលលោកដូណាល់ ត្រាំជំរុញឲ្យអ្នកគាំទ្រធ្វើដំណើរទៅវិមានកាពីតូល គឺធ្វើឡើង ក្នុងចេតនាចង់ឲ្យពួកគេធ្វើដំណើរទៅមែន ដោយមិនខ្វល់ថា ពួកគេអាចមានអាវុធ អាចនឹងបង្កឲ្យមានហិង្សានៅទីនោះ។
ជាការពិតណាស់ថា ទាំងនេះមិនប្រាកដថា គ្រប់គ្រាន់អាចកំណត់ពិរុទ្ធភាពរបស់លោកដូណាល់ ត្រាំបាននោះទេ ក៏ប៉ុន្តែ វាអាចគ្រប់គ្រាន់ ដើម្បីធ្វើការចោទប្រកាន់ពីបទល្មើសព្រហ្មទណ្ឌ ពីព្រោះថា ជាទូទៅ ការចោទប្រកាន់អាចធ្វើឡើងបាន នៅពេលដែលមានតម្រុយដែលអាចជឿបានថាមានបទល្មើស រីឯពិរុទ្ធភាព គឺកំណត់នៅក្នុងដំណាក់កាលជំនុំជម្រះ។
ទោះជាយ៉ាងណា ការចោទប្រកាន់ ឬមិនចោទប្រកាន់លោកដូណាល់ ត្រាំ គឺស្ថិតនៅលើរដ្ឋអាជ្ញា និងក្រសួងយុត្តិធម៌អាមេរិក ដែលជាអ្នកសម្រេច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ