តើគេអាចបណ្តេញរុស្ស៊ីចេញពីក្រុមប្រឹក្សាសន្តិសុខអ.ស.ប.បានដែរឬទេ?
ចុះផ្សាយនៅថ្ងៃ៖
ស្តាប់ - ០៣:៥៨
នៅក្នុងសុន្ទរកថាតាមវីដេអូ នៅក្នុងកិច្ចប្រជុំរបស់ក្រុមប្រឹក្សាសន្តិសុខអ.ស.ប. កាលពីថ្ងៃអង្គារ៥មេសា លោកវ៉ូឡូឌីមៀរ ហ្សេឡេនស្គី បានរិះគន់ក្រុមប្រឹក្សាសន្តិសុខថា មិនមានសមត្ថភាពក្នុងការរក្សាសន្តិសុខរបស់ប្រទេសជាសមាជិកអ.ស.ប ហើយថា ការឈ្លានពាន និងឧក្រិដ្ឋកម្មទៅលើអ៊ុយក្រែនត្រូវបានធ្វើឡើងដោយមហាអំណាចក្នុងក្រុមប្រឹក្សាសន្តិសុខខ្លួនឯងផ្ទាល់។ ហេតុដូច្នេះហើយបានជាលោកប្រធានាធិបតីអ៊ុយក្រែនទាមទារឲ្យបណ្តេញរុស្ស៊ីចេញពីក្រុមប្រឹក្សាសន្តិសុខ។ តើនេះជារឿងដែលអាចទៅរួចដែរឬទេ?
នៅក្នុងធម្មនុញ្ញអង្គការសហប្រជាជាតិមិនមានកន្លែងណាមួយ ដែលចែងអំពីយន្តការបណ្តេញប្រទេសសមាជិកចេញពីក្រុមប្រឹក្សាសន្តិសុខនោះទេ គឺមានតែការចែងអំពីការបណ្តេញសមាជិកចេញពីអង្គការសហប្រជាជាតិទាំងស្រុង។
យោងតាមមាត្រា ៦ ប្រទេសសមាជិកដែលរំលោភបំពានទៅលើគោលការណ៍នៅក្នុងធម្មនុញ្ញអង្គការសហប្រជាជាតិ អាចនឹងត្រូវបណ្តេញចេញពីអង្គការសហប្រជាជាតិដោយមហាសន្និបាត ទៅតាមការស្នើរបស់ក្រុមប្រឹក្សាសន្តិសុខ។
គោលការណ៍ជាមូលដ្ឋានរបស់អង្គការសហប្រជាជាតិ ដែលមានចែងនៅក្នុងមាត្រា ១ និងមាត្រា ២ គឺរួមមានជាអាទិ៍ ការហាមឃាត់ការប្រើកម្លាំងទ័ព ឬគំរាមប្រើកម្លាំងទ័ព ដោយប្រទេសសមាជិកណាមួយ បំពានទៅលើឯករាជ្យ ឬបូរណភាពទឹកដីរបស់រដ្ឋជាសមាជិកណាមួយផ្សេងទៀត។
ការឈ្លានពានរបស់រុស្ស៊ីទៅលើអ៊ុយក្រែន នៅក្នុងពេលបច្ចុប្បន្ននេះ អាចរាប់បញ្ចូលជាការប្រើកម្លាំងទ័ព បំពានទៅលើឯករាជ្យ និងបូរណភាពទឹកដីរបស់អ៊ុយក្រែន។ ដូច្នេះ ជាគោលការណ៍ មហាសន្និបាត (ប្រទេសជាសមាជិកទាំង ១៩៣) អាចបោះឆ្នោតបណ្តេញរុស្ស៊ីចេញពីសមាជិកអង្គការសហប្រជាជាតិបាន ដោយការបោះឆ្នោតនេះត្រូវធ្វើឡើង តាមរយៈសំឡេងភាគច្រើនពីរភាគបី (មាត្រា ១៨)។
ក៏ប៉ុន្តែ ការបោះឆ្នោតបណ្តេញប្រទេសសមាជិកនេះ មិនអាចធ្វើឡើងទៅតាមការផ្តួចផ្តើមគំនិតរបស់មហាសន្និបាតដោយខ្លួនឯងនោះទេ។ ទាល់តែមានការស្នើពីក្រុមប្រឹក្សាសន្តិសុខ ទើបមហាសន្និបាតអាចយកមកបោះឆ្នោតអនុម័តបាន ហើយការស្នើពីក្រុមប្រឹក្សាសន្តិសុខត្រូវធ្វើឡើងដោយសំឡេងភាគច្រើន ៩សំឡេង ក្នុងចំណោមប្រទេសជាសមាជិកទាំង ១៥ ហើយដោយគ្មានការជំទាស់ពីប្រទេសជាសមាជិកអចិន្រ្តៃយ៍ទាំង ៥។
ដូច្នេះ នៅក្នុងការអនុវត្តជាក់ស្តែង គ្រប់ប្រទេសទាំងអស់អាចត្រូវបណ្តេញចេញពីសមាជិកអង្គការសហប្រជាជាតិ លើកលែងតែប្រទេសសមាជិកអចិន្រ្តៃយ៍របស់ក្រុមប្រឹក្សាសន្តិសុខ ដែលមានសិទ្ធិវ៉េតូ ហើយក្នុងចំណោមប្រទេសជាសមាជិកអចិន្រ្តៃយ៍ដែលមានសិទ្ធិពិសេសនេះ គឺមានរុស្ស៊ី រួមជាមួយនឹងប្រទេស ៤ផ្សេងទៀត គឺអាមេរិក ចិន បារាំង និងអង់គ្លេស។ ដូច្នេះ បើរុស្ស៊ីមិនស្ម័គ្រចិត្តដកខ្លួនចេញដោយខ្លួនឯងទេនោះ ការបណ្តេញរុស្ស៊ីចេញពីសមាជិកអង្គការសហប្រជាជាតិ គឺជារឿងដែលមិនអាចធ្វើទៅរួចនោះទេ។
ជម្រើសមួយទៀត ដែលធ្លាប់ត្រូវបានអ្នកខ្លះចោទសួរដែរ គឺផាត់រុស្ស៊ីចេញពីក្រុមប្រឹក្សាសន្តិសុខ តាមរយៈការរុះរើឡើងវិញទាំងស្រុងនូវសមាសភាពរបស់ក្រុមប្រឹក្សាសន្តិសុខ។
ក្រុមប្រឹក្សាសន្តិសុខមានសមាជិក ១៥ប្រទេស ដោយនៅក្នុងចំណោមនោះ សមាជិកចំនួន ១០ ជាសមាជិកមិនអចិន្រ្តៃយ៍ ជ្រើសរើសតាមរយៈការបោះឆ្នោតដោយមហាសន្និបាត សម្រាប់អាណត្តិ ២ឆ្នាំ ចំណែកប្រទេស ៥ទៀត ជាសមាជិកអចិន្រ្តៃយ៍ ហើយបញ្ជីឈ្មោះប្រទេសសមាជិកអចិន្រ្តៃយ៍ទាំង ៥នេះ មានចែងនៅក្នុងមាត្រា ២៣ នៃធម្មនុញ្ញអង្គការសហប្រជាជាតិ។
ប្រសិនបើគេចង់ផ្លាស់ប្តូរសមាសភាពសមាជិកអចិន្រ្តៃយ៍ទាំង ៥ គេចាំបាច់ត្រូវតែធ្វើវិសោធនកម្មមាត្រា ២៣ ហើយរាល់ការធ្វើវិសោធនកម្មធម្មនុញ្ញអង្គការសហប្រជាជាតិ អាចធ្វើទៅបាន ទាល់តែមានការអនុម័តដោយសំឡេងពីរភាគបីនៅក្នុងមហាសន្និបាត ហើយត្រូវទទួលបាននូវការផ្តល់សច្ចាប័នដោយប្រទេសពីរភាគបី ក្នុងចំណោមប្រទេសជាសមាជិកទាំង ១៩៣ ដោយក្នុងចំណោមនោះ ចាំបាច់ត្រូវតែមានប្រទេសសមាជិកអចិន្រ្តៃយ៍របស់ក្រុមប្រឹក្សាសន្តិសុខ (មាត្រា ១០៨)។ អ្វីៗត្រូវត្រឡប់មកចំណុចដើមដដែលវិញ គឺ សិទ្ធិវ៉េតូរបស់ប្រទេសទាំង ៥ ជាសមាជិកអចិន្រ្តៃយ៍ក្រុមប្រឹក្សាសន្តិសុខ។
ដូច្នេះ សរុបជារួមមកវិញ ការបណ្តេញរុស្ស៊ីចេញពីក្រុមប្រឹក្សាសន្តិសុខ ឬចេញពីអង្គការសហប្រជាជាតិ វាគឺជារឿងដែលមិនអាចធ្វើទៅរួចនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ