តើអ៊ុយក្រែន មានសិទ្ធិផ្សព្វផ្សាយរូបភាពរបស់ទាហានរុស្ស៊ី ដែលជាចំណាប់ខ្មាំងសង្គ្រាម ដែរឬទេ?
ចុះផ្សាយនៅថ្ងៃ៖
ស្តាប់ - ០៦:៥៨
ក្រោយការផ្ទុះសង្គ្រាមនៅអ៊ុយក្រែន ចាប់តាំងពីថ្ងៃទី២៤កុម្ភៈមក គេបានសង្កេតឃើញ មានការផ្សព្វផ្សាយយ៉ាងព្រោងព្រាតតាមបណ្តាញសង្គម នូវរូបភាព ជារូបថតនិងវីដេអូ របស់ទាហានរុស្ស៊ី ដែលត្រូវបានភាគីអ៊ុយក្រែនចាប់ខ្លួនបាន។ រូបភាពភាគច្រើន មិនបង្ហាញឲ្យឃើញនូវការធ្វើទារុណកម្ម ឬសកម្មភាពធ្វើបាបដើម្បីសងសិក ពីសំណាក់ភាគីអ៊ុយក្រែនទៅលើទាហានរុស្ស៊ីឡើយ។ ផ្ទុយទៅវិញ វាបង្ហាញពីការយកអាសារ ពីសំណាក់ជនជាតិអ៊ុយក្រែន ចំពោះទាហានចំណាប់ខ្មាំងរុស្ស៊ី ដែលភាគច្រើនមានវ័យក្មេងៗ ហើយដែលខ្លះបានអះអាងថា ត្រូវគេកេណ្ឌឲ្យមកធ្វើសង្គ្រាម ដោយបង្ខំថែមទៀតផង។ ទោះជាយ៉ាងនេះក្តី សួរថាតើអ៊ុយក្រែន មានសិទ្ធិផ្សព្វផ្សាយរូបភាពចំណាប់ខ្មាំងរុស្ស៊ីទាំងនោះដែរឬទេ?
វីដេអូបង្ហាញពីជនជាតិអ៊ុយក្រែន ជួយយកអាសារ ហុចទឹកហុចចំណី ឲ្យទាហានរុស្ស៊ីបរិភោគ បានទទួលការចាប់អារម្មណ៍ជាខ្លាំងនៅតាមបណ្តាញសង្គម។ បណ្តាញព័ត៌មានធំៗខ្លះ ក៏បានយកទៅផ្សព្វផ្សាយបន្តផងដែរ ដើម្បីបង្ហាញពីទឹកចិត្តមនុស្សធម៌របស់ភាគីអ៊ុយក្រែន បើទោះបីជាត្រូវកងទ័ពរុស្ស៊ី វាយប្រហារឈ្លានពាន។ នេះគឺជាយុទ្ធនាការឃោសនាមួយ ដ៏មានប្រសិទ្ធភាព ពីសំណាក់ភាគីអ៊ុយក្រែន ដើម្បីឲ្យពិភពលោកបានដឹងថា ទោះខ្លួនរងគ្រោះ ដោយការឈ្លានពានរបស់រុស្ស៊ី តែខ្លួននៅតែរក្សាទឹកចិត្តមនុស្សធម៌ជានិច្ច។
ក្នុងវីដេអូខ្លះ ភាគីអ៊ុយក្រែន បានសួរនាំអត្តសញ្ញាណ ទីកន្លែងរស់នៅរបស់ទាហានចំណាប់ខ្មាំងជនជាតិរុស្ស៊ី និងខ្លះទៀត បានហុចទូរស័ព្ទឲ្យទាហានរុស្ស៊ី និយាយទាក់ទងប្រាប់សុខទុក្ខ ទៅក្រុមគ្រួសារ ដែលរស់នៅប្រទេសរុស្ស៊ី។ ក្នុងរូបថត និងវីដេអូទាំងនោះ បង្ហាញឲ្យឃើញនូវចំណាប់ខ្មាំង ដែលជាទាហានរុស្ស៊ី មានវ័យខ្លះមិនដល់២០ឆ្នាំផងទេ។ ខ្លះអះអាងថាខ្លួនគ្មានសម្ភារៈការពារខ្លួនគ្រប់គ្រាន់ឡើយ ហើយខ្លះទៀត អះអាងថាមិនបានដឹងមុន ថាត្រូវថ្នាក់លើបញ្ជូនឲ្យមកធ្វើសង្គ្រាមនៅអ៊ុយក្រែនទេ ព្រោះគេកុហកថាត្រឹមធ្វើការហ្វឹកហាត់ប៉ុណ្ណោះ។
ទោះជាយ៉ាងណាក៏ដោយ អ្នកជំនាញច្បាប់អន្តរជាតិ កំពុងតែចោទសួរ ថាដែលភាគីអ៊ុយក្រែន ផ្សព្វផ្សាយរូបភាព បង្ហាញអត្តសញ្ញាណចំណាប់ខ្មាំងទាហានរុស្ស៊ីទាំងនេះ គឺជាទង្វើត្រឹមត្រូវឬខុស?
មាត្រា១៣ នៃសន្ធិសញ្ញាក្រុងហ្សឺណែវ
ការគោរពភាពថ្លៃថ្នូរ បូរណភាពបុគ្គល និងស្មារតី ព្រមទាំងសិទ្ធិទទួលបានការគាំព៌ាព្យាបាល របស់ចំណាប់ខ្មាំងសង្គ្រាម គឺជាត្រូវបានការពារដោយសន្ធិសញ្ញាក្រុងហ្សឺណែវទី៣ ចុះឆ្នាំ១៩៤៩ ហើយដែលមានគណកម្មាធិការអន្តរជាតិកាកបាតក្រហម CICR ជាអ្នកធានាការគោរព។ មាត្រា១៣ នៃសន្ធិសញ្ញានេះ បានចែងថា ចំណាប់ខ្មាំងសង្គ្រាម ត្រូវតែទទួលបានការការពារទាំងស្រុង គ្រប់ពេលវេលា តួយ៉ាង ការពារប្រឆាំងនឹងការប្រើប្រាស់អំពើហិង្សា ឬ អំពើគំរាមសំឡុត ការពារប្រឆាំងនឹងការជេរប្រមាថ និងការពារពីការចង់ដឹងចង់ឮ របស់មនុស្សទូទៅ។
ចំណាប់ខ្មាំងម្នាក់ៗ មានកាតព្វកិច្ចឲ្យត្រឹមតែឈ្មោះ ថ្ងៃខែឆ្នាំកំណើត ឋានន្តរសក្តិ និងលេខសំគាល់ខ្លួនតែប៉ុណ្ណោះ។ គេមិនអាចជជីកសួរ ព័ត៌មានផ្សេងទៀត ឲ្យលើសពីនេះបានទេ។ នេះបើផ្អែកតាមការអះអាង របស់លោកស្រី Cordula Droege មន្ត្រីដឹកនាំផ្នែកច្បាប់ នៅគណកម្មាធិការអន្តរជាតិកាកបាតក្រហម។ សម្រាប់លោកស្រី ការដែលភាគីអ៊ុយក្រែន បង្ខំឲ្យទាហានរុស្ស៊ី និយាយហូរហែរ សារភាព បង្ហាញការសោកស្តាយដែលមកធ្វើសង្គ្រាមនៅអ៊ុយក្រែន ហើយថតសម្តីទាំងនេះផ្សព្វផ្សាយតាមបណ្តាញសង្គម គឺវាអាចត្រូវបានចាត់ទុកថាជាអំពើមួយមិនត្រឹមត្រូវ។
ដូចគ្នាដែរ លោកស្រី Joanne Kirkham អ្នកស្រាវជ្រាវច្បាប់ ផ្នែកសង្គ្រាមប្រដាប់អាវុធ នៅសកលវិទ្យាល័យ Paris Panthéon-Assas បានលើកឡើងថា ការផ្សព្វផ្សាយរូបភាព របស់ចំណាប់ខ្មាំងតាមបណ្តាញសង្គម គឺជាការបំពាននឹងមាត្រា១៣នៃសន្ធិសញ្ញាក្រុងហ្សឺណែវ ទោះជារូបភាពដែលគេផ្សព្វផ្សាយនោះ មិនបានបង្ហាញឲ្យឃើញថាចំណាប់ខ្មាំង ត្រូវគេធ្វើបាបក៏ដោយ។ មាត្រា១៣នៃសន្ធិសញ្ញានេះ មានខ្លឹមសារការពារចំណាប់ខ្មាំង ពី « ការចង់ដឹងចង់ឮ » របស់មនុស្សទូទៅ។ ដូច្នេះបើតាមផ្លូវច្បាប់ គឺគ្រប់ភាគីត្រូវតែឈប់ផ្សព្វផ្សាយ ចែករំលាយរូបភាពចំណាប់ខ្មាំង នៅតាមបណ្តាញសង្គមតទៅទៀត។
ទាហានរដ្ឋាភិបាល ទាហានស្ម័គ្រចិត្ត និងប្រជាតស៊ូ
យោងតាមអ្នកជំនាញ សង្គ្រាមនៅអ៊ុយក្រែន គឺមានលក្ខណៈគ្រប់គ្រាន់ អាចចាត់ទុកបានថាជាសង្គ្រាមប្រដាប់អាវុធអន្តរជាតិ ពោលគឺរវាងប្រទេសនឹងប្រទេស។ នៅក្នុងករណីសង្គ្រាមប្រដាប់អាវុធអន្តរជាតិបែបនេះ កងទាហានរបស់រដ្ឋាភិបាល ដែលជាគូភាគីទាំងសងខាង គឺស្ថិតនៅក្នុងវិធានច្បាប់អន្តរជាតិ ដែលកំណត់អំពីការពារចំណាប់ខ្មាំងសង្គ្រាម ទាំងអ្នកដែលបំពាន ទាំងអ្នករងគ្រោះ។
មិនត្រឹមតែប៉ុណ្ណោះ ក្នុងករណីខ្លះ ក្រុមកងកម្លាំងផ្សេងទៀត ដែលមិនមែនជាងកងទាហានផ្លូវការ តួយ៉ាងដូចជាទាហានស្ម័គ្រចិត្ត ឬក្រុមប្រជាតស៊ូជាដើម ដែលចូលរួមប្រយុទ្ធដែរនោះ ក៏អាចត្រូវរាប់បញ្ចូល ទៅក្នុងវិធានច្បាប់ការពារចំណាប់ខ្មាំងសង្គ្រាមដែរ។ មានន័យថា ក្នុងករណីសង្គ្រាមអ៊ុយក្រែន ដែលប្រជាជនស៊ីវីលខ្លះ បាននាំគ្នាកាន់អាវុធ ចូលប្រយុទ្ធការពារទឹកដី ហើយបើជនទាំងនោះ បានថតវីដេអូចំណាប់ខ្មាំងរុស្ស៊ី បន្ទាប់មកយកទៅផ្សាយ បង្ហោះតាមបណ្តាញសង្គម គឺវាជារឿងខុសនឹងមាត្រា១៣ នៃសន្ធិសញ្ញាទីក្រុងហ្សឺណែវហើយ។
យ៉ាងណាមិញ ឆ្លើយប្រាប់បណ្តាញព័ត៌មានបារាំង AFP លោកស្រី Elizabeth Throssell អ្នកនាំពាក្យឧត្តមស្នងការដ្ឋានទទួលបន្ទុកសិទ្ធិមនុស្ស នៃអង្គការសហប្រជាជាតិ បានទទួលស្គាល់ថា ពិតជាមានការព្រួយបារម្ភមែន ទាក់ទិននឹងការដែលមានវីដេអូបង្ហាញអត្តសញ្ញាណទាហានរុស្ស៊ី ត្រូវគេផ្សព្វផ្សាយព្រោងព្រាតតាមបណ្តាញសង្គម ព្រោះវាជាករណី បំពាននឹងភាពថ្លៃថ្នូរ បូរណភាពបុគ្គលរបស់ទាហានចំណាប់ខ្មាំង។
មិនមែនបទល្មើលឧក្រិដ្ឋកម្មសង្គ្រាម
ដោយឡែក លោក Marco Sassoli សាស្ត្រាចារ្យនីតិអន្តរជាតិសាធារណៈ នៅសកលវិទ្យាល័យហ្សឺណែវ បានលើកឡើងថា ការផ្សព្វផ្សាយវីដេអូ និងរូបថត ដែលគេឃើញមុខទាហាន ឬក៏អាចសំគាល់មុខទាហានចំណាប់ខ្មាំងបាន គឺវាមិនអាចចាត់ទុកបានថា ជាអំពើឧក្រិដ្ឋកម្មសង្គ្រាមបានឡើយ។ ពោលគឺ គឺគេអាចចាត់ទុកបាន ត្រឹមតែជាជាការបំពាននឹងច្បាប់មនុស្សធម៌អន្តរជាតិ តែប៉ុណ្ណោះ។ លោកសាស្ត្រាចារ្យពន្យល់ថា បើគ្រាន់តែផ្សព្វផ្សាយរូបភាពបង្ហាញមុខទាហានចំណាប់ខ្មាំងតាមបណ្តាញសង្គម ដោយមិនបង្ហាញអំពីការប្រើប្រាស់អំពើហិង្សា ឬទារុណកម្មជាក់ស្តែងណាមួយ គឺវាមិនមែនជាឧក្រិដ្ឋកម្មសង្គ្រាមទេ។
ជាមួយគ្នានេះ លោកសាស្ត្រាចារ្យបានទទួលស្គាល់ថា រូបភាពដែលគេផ្សព្វផ្សាយតាមបណ្តាញសង្គម អាចមានចំណុចវិជ្ជមានមួយ ព្រោះវាជាបណ្តុំប្រមូលទុក នូវឯកសារភស្តុតាងនានា ដើម្បីប្រើប្រាស់ក្នុងករណីមានសវនាការរកយុត្តិធម៌។ តួយ៉ាង រូបថត វីដេអូទាំងនេះ អាចឲ្យគេដឹង ពីកាលបរិច្ឆេទនៅរស់រានមានជីវិតរបស់ទាហានចំណាប់ខ្មាំងនីមួយៗ ។ តែយ៉ាងណាក៏ដោយ ភាគីនីមួយៗ មិនអាចលើកហេតុផលថា ផ្សព្វផ្សាយរូបភាពទាំងនេះ គឺដើម្បីជាមធ្យោបាយជូនដំណឹងទៅក្រុមគ្រួសាររបស់ទាហានចំណាប់ខ្មាំងបានទេ។
សន្ធិសញ្ញាក្រុងហ្សឺណែវ បានកំណត់ច្បាស់ណាស់ នូវមធ្យោបាយផ្សេងទៀត ដើម្បីផ្សព្វផ្សាយដំណឹងពីសុខទុក្ខរបស់ទាហានចំណាប់ខ្មាំង។ ពោលគឺប្រទេសដែលជាភាគីជម្លោះ ត្រូវតែជូនដំណឹងទៅកាន់គណកម្មាធិការអន្តរជាតិកាកបាតក្រហម អំពីអត្តសញ្ញាណរបស់ចំណាប់ខ្មាំងនីមួយៗ ដើម្បីឲ្យគណកម្មាធិការនេះបញ្ជូនដំណឹងបន្តទៅក្រុមគ្រួសារពួកគេ។ បន្ថែមពីនេះទៀត គណកម្មាធិការអន្តរជាតិកាកបាតក្រហម ក៏មានសិទ្ធិទាមទារចូលទៅជួបចំណាប់ខ្មាំងដោយផ្ទាល់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ