ហេតុអ្វីសង្គ្រាមអ៊ុយក្រែនបង្កបញ្ហាស្មុគស្មាញដល់ជំហរការទូតរបស់ឥណ្ឌា?
ចុះផ្សាយនៅថ្ងៃ៖
ស្តាប់ - ០៤:១០
នៅក្នុងរយៈពេលប៉ុន្មានថ្ងៃចុងក្រោយនេះ នៅក្រោយពេលដែលរុស្ស៊ីបញ្ជូនទ័ពចូលទៅឈ្លានពានអ៊ុយក្រែន ហើយប្រទេសលោកខាងលិចនាំគ្នាថ្កោលទោស និងដាក់ទណ្ឌកម្មលើរុស្ស៊ី ឥណ្ឌាវិញត្រូវស្ថិតនៅលើផ្លូវការទូតមួយដ៏ស្មុគស្មាញ ដោយពិបាកនឹងជ្រើសរើស រវាងម្ខាងរុស្ស៊ី ដែលជាសម្ព័ន្ធមិត្តដ៏ចាស់ឆ្នាំ និងម្ខាងទៀត សហរដ្ឋអាមេរិក ដែលជាចន្ទល់ដ៏ចម្បងមួយ នៅក្នុងការប្រជែងជាមួយចិន។
ភាពស្មុគស្មាញ និងជំហរដ៏សែនប្រយ័ត្នប្រយែងរបស់ឥណ្ឌា នៅក្នុងសង្រ្គាមអ៊ុយក្រែន ត្រូវបានបង្ហាញឲ្យឃើញយ៉ាងច្បាស់ នៅក្នុងអំឡុងកិច្ចប្រជុំរបស់ក្រុមប្រឹក្សាសន្តិសុខអ.ស.ប. កាលពីថ្ងៃសុក្រទី២៥កុម្ភៈ។ កិច្ចប្រជុំត្រូវបានរៀបចំធ្វើឡើងជាបន្ទាន់ ដើម្បីអនុម័តសេចក្តីសម្រេចថ្កោលទោសរុស្ស៊ី ហើយដែលនៅក្នុងនោះ ឥណ្ឌាចូលរួមក្នុងឋានៈជាប្រទេសសមាជិកមិនអចិន្ត្រៃយ៍ ក្នុងចំណោមសមាជិកទាំង ១៥ប្រទេស។
នៅក្នុងសេចក្តីថ្លែងការណ៍ ក្នុងអំឡុងកិច្ចប្រជុំនោះ ឥណ្ឌាបានសម្តែងការសោកស្តាយ ដែលភាគីពាក់ព័ន្ធមិនបានជ្រើសរើសយកការចរចាតាមផ្លូវទូត ដើម្បីដោះស្រាយជម្លោះ ហើយបានលើកឡើង អំពីសារៈសំខាន់នៃធម្មនុញ្ញសហប្រជាជាតិ និងច្បាប់អន្តរជាតិ ព្រមទាំងគោលការណ៍អធិបតេយ្យ និងបូរណភាពទឹកដីរបស់រដ្ឋ ដែលគ្រប់ប្រទេសទាំងអស់ត្រូវតែគោរព។
ក៏ប៉ុន្តែ អ្វីដែលឥណ្ឌាបានលើកឡើងនោះ ត្រូវបានធ្វើឡើងជាលក្ខណៈទូទៅ ដោយព្យាយាមមិននិយាយចំឈ្មោះរបស់ប្រទេសណាមួយនោះទេ ហើយឥណ្ឌាក៏មិនបាននិយាយរិះគន់រុស្ស៊ីនោះដែរ។
នៅក្នុងការបោះឆ្នោតអនុម័តសេចក្តីសម្រេចថ្កោលទោសរុស្ស៊ី ថ្វីដ្បិតតែមានការទាមទារដោយទទូច ទាំងពីសំណាក់សហរដ្ឋអាមេរិក អ៊ុយក្រែន និងរុស្ស៊ី ឲ្យឥណ្ឌាបង្ហាញជំហរជាក់លាក់ថាឈរនៅខាងណា ក៏ប៉ុន្តែ នៅទីបំផុតទៅ ឥណ្ឌា បានបោះឆ្នោតអនុប្បវាទ រួមជាមួយនឹងចិន និងអេមីរ៉ាតអារ៉ាប់រួម។
សម្រាប់ឥណ្ឌា ការជ្រើសរើសយកខាងណាមួយក៏អាចធ្វើឲ្យប៉ះពាល់ទៅដល់ផលប្រយោជន៍ជាតិខ្លួនឯង ហើយការព្យាយាមឈរនៅកណ្តាលដោយមិនជ្រើសរើសសោះ ក៏មិនប្រាកដថាអាចចៀសផុតពីហានិភ័យនោះដែរ។
យើងដឹងថា ឥណ្ឌានិងរុស្ស៊ីមានទំនាក់ទំនងជិតស្និទ្ធនឹងគ្នា តាំងពីក្នុងអំឡុងសម័យសង្រ្គាមត្រជាក់មកម៉្លេះ។ មកទល់នឹងសព្វថ្ងៃនេះ រុស្ស៊ីក៏នៅតែជាសម្ព័ន្ធមិត្តដ៏សំខាន់មួយរបស់ឥណ្ឌា ជាពិសេស គឺជាអ្នកផ្គត់ផ្គង់សព្វាវុធដ៏ធំលំដាប់ទីមួយរបស់ឥណ្ឌា។
ឥណ្ឌាគឺជាប្រទេសដែលនាំចូលគ្រឿងសព្វាវុធច្រើនជាងគេលំដាប់ទី២នៅលើពិភពលោក បន្ទាប់ពីអារ៉ាប៊ីសាអ៊ូឌីត ហើយនៅក្នុងចន្លោះ ពីឆ្នាំ២០១៦ ដល់ឆ្នាំ២០២០កន្លងទៅនេះ សព្វាវុធដែលឥណ្ឌានាំចូល មានរហូតដល់ទៅជិតពាក់កណ្តាល គឺនាំចូលពីរុស្ស៊ី។ កាលពីឆ្នាំទៅមិញថ្មីៗនេះទៀតសោត រុស្ស៊ីក៏ទើបនឹងបានព្រមព្រៀងចាប់ផ្តើមបញ្ជូនទៅឲ្យឥណ្ឌា នូវប្រព័ន្ធមីស៊ីលការពារដែនអាកាសដ៏ទំនើប ធុន S-400 ដែលជាប្រព័ន្ធមីស៊ីលដ៏មានសារៈសំខាន់សម្រាប់ឥណ្ឌា នៅក្នុងការទប់ទល់ជាមួយចិន និងប៉ាគីស្ថាន ដែលជាគូប្រជែង។ ម្យ៉ាងទៀត ឥណ្ឌាក៏ជាប្រទេសដែលត្រូវការប្រេងពីរុស្ស៊ីច្រើនផងដែរ សម្រាប់ផ្គត់ផ្គង់តម្រូវការកំណើនសេដ្ឋកិច្ចរបស់ខ្លួន។
ក៏ប៉ុន្តែ ក្នុងពេលជាមួយគ្នា នៅម្ខាងទៀត សហរដ្ឋអាមេរិកក៏មានសារៈសំខាន់យ៉ាងខ្លាំងដែរ សម្រាប់ឥណ្ឌា នៅក្នុងបរិបទភូមិសាស្ត្រនយោបាយបច្ចុប្បន្ន។ ឥណ្ឌាត្រូវការអាមេរិកជាចន្ទល់ ដើម្បីទប់ទល់នឹងឥទ្ធិពលរបស់ចិន ហើយលើសពីនេះទៅទៀត ឥណ្ឌា រួមជាមួយនឹង អាមេរិក ជប៉ុន និងអូស្រ្តាលី ស្ថិតនៅក្នុងបក្សសម្ព័ន្ធចតុភាគី ដែលគេតែងហៅថា « Quad » ហើយដែលជាបក្សសម្ព័ន្ធដ៏សំខាន់ នៅក្នុងការប្រជែងឥទ្ធិពលជាមួយចិន នៅក្នុងតំបន់អាស៊ី។ នេះនៅមិនទាន់និយាយដល់ផង អំពីផលប្រយោជន៍ដ៏សម្បើមខាងផ្នែកសេដ្ឋកិច្ច ដែលអាមេរិក គឺជាដៃគូពាណិជ្ជកម្មដ៏ធំលំដាប់ទីមួយរបស់ឥណ្ឌា។
មែនទែនទៅ កាលពីពេលកន្លងមក នៅពេលមានការប្រទាញប្រទង់គ្នា រវាងរុស្ស៊ី និងអាមេរិក ឥណ្ឌាក៏តែងតែប្រកាន់ជំហរកណ្តាលដូចជាពេលនេះដែរ។ ក៏ប៉ុន្តែ អ្វីដែលអាចចោទឡើង នៅក្នុងវិបត្តិអ៊ុយក្រែននៅពេលនេះ គឺ នៅក្នុងពេលដែលបណ្តាប្រទេសភាគច្រើន ជាពិសេស អាមេរិក និងអឺរ៉ុប កំពុងតែមានជំហររួបរួមគ្នាខ្លាំង ក្នុងការប្រឆាំងនឹងរុស្ស៊ី ការប្រកាន់ជំហរកណ្តាល អាចនឹងធ្វើឲ្យអាមេរិក និងសម្ព័ន្ធមិត្ត សំឡឹងឃើញថា ឥណ្ឌាកំពុងតែជួយរុស្ស៊ីទៅវិញ។
រឹតតែស្មុគស្មាញជាងនេះទៅទៀត នៅពេលដែលអាមេរិក និងសម្ព័ន្ធមិត្ត ដាក់ទណ្ឌកម្មកាន់តែច្រើនលើរុស្ស៊ី ឥណ្ឌា ដែលមានទំនាក់ទំនងរកស៊ីច្រើនទាំងជាមួយរុស្ស៊ី និងជាមួយអាមេរិក ក៏ដូចជាជាមួយអឺរ៉ុប អាចនឹងត្រូវដើរមកដល់ចំណុចមួយ ដែលត្រូវជ្រើសរើស រវាងអនុវត្តទណ្ឌកម្មរបស់អាមេរិក ហើយត្រូវប្រឆាំងនឹងរុស្ស៊ី ឬមិនអនុវត្តទណ្ឌកម្ម ហើយត្រូវប្រឆាំងនឹងអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ