២០២២ ជាឆ្នាំដែលទីផ្សារវត្ថុធាតុដើម រងសម្ពាធខ្លាំងជាងគេ?
ចុះផ្សាយនៅថ្ងៃ៖
ស្តាប់ - ០៤:០៩
ដោយហេតុវិបត្តិកូវីដ១៩ វត្ថុធាតុដើមបានឡើងថ្លៃខ្លាំងជាពិសេសតែម្តង នៅពេញមួយឆ្នាំ២០២១កន្លងទៅ។ បើតាមរបាយការណ៍ប្រចាំឆ្នាំរបស់ស្ថាប័ន Cyclope (ស៊ីក្លូប) ដែលជាអ្នកជំនាញក្នុងវិស័យទីផ្សារវត្ថុធាតុដើមពិភពលោក ឆ្នាំ២០២២នេះ តម្លៃវត្ថុធាតុដើមត្រូវចាប់វិលមករកភាពធម្មតាវិញ។ ប៉ុន្តែ ឆ្នាំ២០២២ ត្រូវប្រឈមនឹងភាពមិនជាក់លាក់ខ្លាំងជាងឆ្នាំមុនៗទៅទៀត។ ហេតុអ្វី ?
កាលពីឆ្នាំ២០២១ ក្រៅពីសាច់ជ្រូកនៅអឺរ៉ុប និងនៅចិន វត្ថុធាតុដើមជាទូទៅ និងជាយុទ្ធសាស្ត្រ រាប់ពី ដែកថែប ទៅអាលុយមីញ៉ូម ដល់កាហ្វេ ធ្យូងថ្ម ឧស្ម័ន កប្បាស រ៉ែដែក រ៉ែមាស ឬសណ្តែក អង្ករ បានឡើងថ្លៃគ្រប់មុខទាំងអស់។ នេះបើតាមលទ្ធផលវិភាគប្រចាំថ្ងៃរបស់អង្គការCyclope។ ជាការឡើងថ្លៃដ៏ខ្ពស់ខ្លាំងដែលពុំធ្លាប់កើតមានទេ គិតចាប់តាំងពីពិភពលោកមានវិបត្តិហិរញ្ញវត្ថុឆ្នាំ ២០០៧មក។ ហើយគ្មានអ្នកជំនាញណាម្នាក់ ប្រមើលនិងនឹកស្មានដល់ថាមានវិបត្តិបីកើតឡើងផ្ទួនគ្នាទេ ៖ វិបត្តិថាមពល កើតឡើងចំពេលមានវិបត្តិដឹកជញ្ជូនតាមផ្លូវសមុទ្ទ និងវិបត្តិស្បៀងអាហារ និងចំពេលតម្លៃកសិកម្មឡើងថ្លៃឡើយ។
ធ្លាប់ព្យាករខុស កាលពីពីរឆ្នាំចុងក្រោយកន្លងទៅ អ្នកជំនាញមានមេរៀន បានសម្តែងការប្រុងប្រយ័ត្នខ្លាំង នារយៈពេលនេះ។ លោក Philippes Chalmin ប្រធានក្រុមCyclope ដែលជាបង្គោលទីផ្សារវត្ថុធាតុដើមនៅលើពិភពលោក បានអះអាងថា បើតាមក្បួន តម្លៃវត្ថុធាតុដើមត្រូវវិលមករកភាពធម្មតាវិញ ឬត្រូវចុះថ្លៃវិញ សម្រាប់ផលិតផលខ្លះផង នៅឆ្នាំ២០២២។ ស្ថាប័នព្យាករយ៉ាងដូច្នេះដោយផ្អែកលើសម្មតិកម្មថា លក្ខខណ្ឌសុខាភិបាល វិបត្តិកូវីដ ចាប់ធូរស្បើយនិងគ្មានលេចមេរោគកូវីដបំប្លែងខ្លួនថ្មី។ ប៉ុន្តែជាមួយភាពតានតឹងភូមិសាស្ត្រនយោបាយនាពេលបច្ចុប្បន្ន ជុំវិញវិបត្តិអ៊ុយក្រែន វិបត្តិឧស្ម័នរុស្ស៊ី និងហានិភ័យអាកាសធាតុលើវិស័យកសិកម្ម ២០២២បានជាឆ្នាំដែលពិបាកព្យាករបំផុត។ ភាពមិនជាក់លាក់កាន់តែមានច្រើនសម្រាប់ឆ្នាំនេះ និងច្រើនជាងឆ្នាំមុនទៅទៀត។
មិនជាក់លាក់ខ្លាំងជាងគេគឺ បញ្ហាអាកាសធាតុ។ បាតុភូត El Nina អាចនឹងធ្វើឱ្យកសិកម្មនៅអាមេរិកឡាទីន រងផលប៉ះពាល់យ៉ាងខ្លាំង។ គ្រោះធម្មជាតិសាហាវៗ ទឹកជំនន់ ព្យុះភ្លៀង ភាពរាំងស្ងួតខ្លាំង បង្កឡើងដោយការប្រែប្រួលអាកាសធាតុ បានបំផ្លាញផលិតផលកសិកម្មយ៉ាងដំណំ ស្ទើរគ្រប់ទិសទីលើពិភពលោក។ វិបត្តិភូមិសាស្ត្រនយោបាយនៅអឺរ៉ុប នឹងចេញតាមច្រកណា ?! ប្រសិនបើរុស្ស៊ីចូលឈ្លានពានអ៊ុយក្រែនមែន តម្លៃប្រេងឆៅនឹងហក់ឡើងដល់កំពូល ហើយអឺរ៉ុបអាចនឹងត្រូវជួបវិបត្តខ្វះថាមពលឧស្ម័នប្រើប្រាស់។ ការនេះចៀសមិនរួចនឹងជះផលវិបាកដល់ផលិតផលនិងវត្ថុធាតុដើមកសិកម្មឡើយ។
ភាពមិនជាក់លាក់ធំមួយទៀត មកពីខាងចិន។ តើមហាយក្សចិនមានសេចក្តីត្រូវការយ៉ាងណា ? ការនាំចូលរបស់ចិន ជាកត្តាចម្បងមួយ សម្រាប់ទីផ្សារពិភពលោក ជាពិសេសទីផ្សារកសិកម្មតែម្តង។
អ្វីដែលច្បាស់លាស់ ក្នុងពិភពមិនប្រាកដប្រជា សម្រាប់ក្រុមអ្នកវិភាគ និងសម្រាប់ឆ្នាំ២០២២ គឺវិបត្តិដឹកជញ្ជូនតាមផ្លូវសមុទ្ទ មិនទាន់អាចបញ្ចប់បានទេ។ Cyclope មើលមិនឃើញភាពប្រសើរក្នុងវិស័យនេះឡើយ។ ចូលមកដល់ខែមករា២០២២ទៅហើយ កុងតឺណ័រ ជាង១១,៥លាន នៅតែគរលើកំពង់ផែធំៗទាំង១៣ របស់ពិភពលោកនៅឡើយ។ ស្ថានភាពនេះមិនអាចធូរស្បើយបាននៅមុនឆ្នាំ២០២៣ទេ។
ចំណែកវិបត្តិថាមពលវិញ វិបត្តិនេះពិតជានឹងបន្តអូសបន្លាយយូរខែទៀតណាស់ យ៉ាងហោចក៏រហូតដល់ចប់រដូវរងារ ឬយូរជាងនេះច្រើនទៀតផង ព្រោះបន្ទាប់ពីសេចក្តីត្រូវការខ្លាំង ប្រទេសនីមួយៗត្រូវការបំពេញស្តុកឡើងវិញ ដើម្បីស្ថិរភាពថាមពល ហើយស្តុកបច្ចុប្បន្នមានកំរិតទាបខ្លាំងណាស់។ ទោះបីជាគ្មានសន្ទទស្សន៍តម្លៃឧស្ម័នរួមនៅលើពិភពលោកក៏ដោយ ក៏តម្លៃឧស្ម័ន ហ្កាស បានឡើងថ្លៃមួយជាបួន ជាមធ្យមរួចហើយ។ នេះបើតាមCyclope ដដែល ដោយរំលឹកទៀតថា កាលពីឆ្នាំ២០២០ ប្រេងឆៅបានធ្លាក់ថ្លៃទាបខ្លាំងបំផុត តែបានស្ទុះឡើងវិញនៅឆ្នាំ២០២១ និងទំនងបន្តឡើងថ្លៃឥតឈប់ទេ សម្រាប់ឆ្នាំ២០២២។
មូលហេតុដំបូងគេគឺបណ្តាលមកពី បញ្ហាអាកាសធាតុ ៖ ភាពរាំងស្ងួតនៅចិន បានធ្វើឱ្យផលិតផលវារីអគ្គីសនីរអាក់រអួល អឺរ៉ុបខ្វះខ្យល់សម្រាប់ផលិតអគ្គីសនី។ ភាពតានតឹងរវាងអឺរ៉ុបនិងរុស្ស៊ី ជុំវិញបំពង់បង្ហូរឧស្ម័ន Nordstream II និងសេចក្តីត្រូវការដ៏មហិមារបស់ចិន ក្នុងការនាំចូលឧស្ម័នធម្មជាតិរាវ ជាកត្តាចំបងនាំឱ្យតម្លៃឧស្ម័នឡើងកប់ពពក។ នៅឆ្នាំ២០២១ ចិនបានក្លាយជាប្រទេសនាំចូលឧស្ម័នធម្មជាតិលំដាប់លេខមួយពិភពលោក ដោយវ៉ារឈ្នះជប៉ុនទៅទៀត។ នេះបើតាមរបាយការណ៍ Cyclopeដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ