ខ្លាចកូវីដអូមីក្រុងពេក ជប៉ុនបន្តបិទទ្វារជិតឈឹង ដោយមិនខ្វល់ពីការលំបាករបស់បុគ្គលិក និងនិស្សិតបរទេស
ចុះផ្សាយនៅថ្ងៃ៖
ស្តាប់ - ០៥:៣៥
រដ្ឋាភិបាលជប៉ុន បានបន្ធូរបន្ថយវិធានការរឹតបន្តឹង ការធ្វើដំណើរចូលក្នុងស្រុកខ្លួន កាលពីខែវិច្ឆិកាចុងឆ្នាំ២០២១។ ក៏ប៉ុន្តែក្រោយវត្តមានកូវីដអូមីក្រុងនៅតាមប្រទេសផ្សេងៗ ជប៉ុនបានបិទខ្ទប់ទ្វារយ៉ាងជិតឈឹង រហូតមកទល់បច្ចុប្បន្ននេះ បើទោះបីជាកូវីដអូមីក្រុង បាននឹងកំពុងតែឆ្លងរាលដាលក្នុងស្រុកជប៉ុន យ៉ាងពេញទំហឹងក្តី។ មានមតិរិះគន់ជាច្រើនថា វាជាវិធានការបិទខ្ទប់ តឹងតែងជ្រុលហួសហេតុ ដោយមិនខ្វល់ពីការលំបាក ដែលចោទទៅលើបុគ្គលិកបរទេស និងនិស្សិតបរទេសរាប់ម៉ឺននាក់ ដែលមិនអាចចូលទៅធ្វើការ ឬរៀនសូត្រនៅក្នុងប្រទេសជប៉ុនបាន។ ក្រៅពីប៉ះពាល់ដល់ក្រុមហ៊ុននិងសេដ្ឋកិច្ចជប៉ុន វិធានការដ៏តឹងតែនេះ ក៏កំពុងធ្វើឲ្យខូចកេរ្តិ៍ឈ្មោះរបស់ជប៉ុនផងដែរ។
ប្រទេសជប៉ុន គឺជាប្រទេសមួយ ក្នុងចំណោមក្រុមប្រទេសសេដ្ឋកិច្ចនាំមុខG7 ដែលបច្ចុប្បន្ននេះ មានវិធានការរិតត្បិតការធ្វើដំណើរចូល យ៉ាងតឹងតែងខ្លាំងជាគេបំផុត។ អ្នកដំណើរដែលមិនមែនជាជនជាតិជប៉ុន សឹងតែមិនអាចចូលទៅជាន់ដីជប៉ុនបានជាដាច់ខាត។ គោលនយោបាយដ៏តឹងតែង ដែលរដ្ឋាភិបាលជប៉ុន ដឹកនាំដោយលោកនាយករដ្ឋមន្ត្រី ហ៊្វូមីញ៉ូ គីឈីដា បានអនុវត្ត ដើម្បីទប់ស្កាត់ការឆ្លងរាលដាលកូវីដអូមីក្រុង ពីក្រៅប្រទេសនេះ ហាក់ទទួលបានប្រជាប្រិយភាពខ្លាំង ពីសំណាក់ប្រជាជនជប៉ុនមួយផ្នែកធំ។ នេះបើផ្អែកតាមការស្ទាបស្ទង់មតិ។ ជាមួយនឹងការគាំទ្រនេះ រដ្ឋាភិបាលបានប្រកាសថា នឹងបន្តអនុវត្តវិធានការបិទព្រំដែនដ៏តឹងតែងនេះ រហូតដល់ដាច់ខែកុម្ភៈ។
ផ្ទុយទៅវិញ វិធានការដ៏តានតឹងនេះ បានបង្កការលំបាកយ៉ាងខ្លាំង ទៅលើផ្នែកខ្លះ ហើយដែលបង្កើតឲ្យមានការរិះគន់។ ជាងនេះទៀត វិធានការរិតត្បឹតដ៏សែនតឹង ប្រមាណជិត២ខែមកនេះ មិនបានទប់កូវីដអូមីក្រុង មិនឲ្យឆ្លងចូលប្រទេសជប៉ុននោះឡើយ។ ប៉ុន្មានថ្ងៃចុងក្រោយនេះ ករណីឆ្លងថ្មីមានប្រមាណ ៥០ម៉ឺននាក់ សឹងជារៀងរាល់ថ្ងៃ។ តួលេខឆ្លងរាលដាលដ៏ខ្ពស់នេះ បានបង្កឲ្យមានការហួសចិត្តជាខ្លាំង ជាពិសេសពីសំណាក់អ្នកដែលរងគ្រោះ ដោយសារតែវិធានការបិទខ្ទប់ខ្លាំងជ្រុល ដែលមិនសមហេតុផល។
ទីផ្សារការងារ និងភាពទាក់ទាញរបស់ប្រទេសជប៉ុន កំពុងតែបាក់ស្រុតជាខ្លាំង ក្នុងក្រសែរភ្នែក ជនបរទេស។ កាលពីសប្តាហ៍មុន សាស្ត្រាចារ្យសកលវិទ្យាល័យ ជំនាញទំនាក់ទំនងជប៉ុន-អាមេរិក ប្រមាណ១០០នាក់ បានរួមគ្នាសរសេរលិខិតចំហមួយ ផ្ញើទៅកាន់លោកនាយករដ្ឋមន្ត្រីជប៉ុន ដោយបានលើកឡើងថា « ការកាត់ផ្តាច់ចំណងទំនាក់ទំនងដ៏សំខាន់របស់មនុស្ស វាគឺជាគោលនយោបាយ ដែលនឹងហុចផលអវិជ្ជមាន ទៅលើប្រយោជន៍ជាតិជប៉ុន នៅថ្ងៃអនាគត។ វាជាគោលនយោបាយ ដែលមកបំផ្លាញកម្មវត្ថុទំនាក់ទំនងការបរទេស ក៏ដូចជាកេរ្តិ៍ឈ្មោះរបស់ជប៉ុន ក្នុងនាមជាប្រទេសនាំមុខមួយ នៅលើឆាកអន្តរជាតិ ។ »
លោក Michael Mroczek ប្រធានក្រុមប្រឹក្សាធុរកិច្ចអឺរ៉ុប (EBC) ប្រចាំប្រទេសជប៉ុន បានត្អូញត្អែរប្រាប់អ្នកកាសែតបារាំង AFP ថា វិធានការដ៏តឹងតែងរបស់រដ្ឋាភិបាលជប៉ុន គឺជាវិធានការដែល « មិនសមហេតុផល » ហើយដែលពេលខ្លះ ធ្វើឲ្យគេមានអារម្មណ៍ថា វាជាវិធានការដែល « ស្អប់ជនបរទេស »។ អ្នកជំនាញផ្នែកជំនួញរូបនេះ បានបន្ថែមថា « ដោយសារតែការបិទខ្ទប់ជ្រុលហួសហេតុនេះ វាបានធ្វើឲ្យក្រុមហ៊ុនសហគ្រាសជប៉ុន បាត់បង់កម្លាំងពលកម្មជំនាញ ដែលមានប្រភពមកពីក្រៅប្រទេស។ »
Santosh ជនជាតិណេប៉ាល់ អាយុ២៨ឆ្នាំ បានអះអាងថាក្រុមហ៊ុនជប៉ុនមួយ បានរើសខ្លួនឲ្យចូលធ្វើការផ្នែកទីផ្សារអន្តរជាតិ តាំងតែពីខែកញ្ញាឆ្នាំ២០២០ម្លេះ។ ក៏ប៉ុន្តែរហូតមកទល់ពេលនេះ ខ្លួននៅតែមិនទាន់អាចធ្វើដំណើរ ទៅកាន់ប្រទេសជប៉ុនបានទេ។ ប្រការនេះ កំពុងតែបង្ខំឲ្យខ្លួនគេ ត្រូវពិចារណាប្តូរគម្រោង រកការងារធ្វើនៅប្រទេសផ្សេងធ្វើ ដែលនេះវាគឺជារឿងគួរឲ្យសោកស្តាយបំផុត ព្រោះខ្លួនស្រលាញ់ និងបានសិក្សានៅប្រទេសជប៉ុន អស់រយៈពេលដល់ទៅ៦ឆ្នាំ។
យ៉ាងណាមិញ លោក Hiroshi Mikitani អគ្គនាយកក្រុមហ៊ុនលក់អនឡាញដ៏ធំរបស់ជប៉ុន ឈ្មោះ Rakuten បានសរសេរលើទំព័រ Twitter ដោយលោកបានបន្ទោសរដ្ឋាភិបាលជប៉ុន ថាកំពុងតែជ្រើសរើសដើរផ្លូវខុស បិទទ្វារផ្តាច់ខ្លួនពីគេឯង មិនខុសពីសម័យ Edo ពីសតវត្សទី១៧ ដល់ទី១៩នោះឡើយ។ យ៉ាងណាមិញលោក Masakazu Tokura ប្រធានសហជីពនិយោជកជប៉ុនដ៏ធំជាងគេ (Keidanren) បានលើកឡើងថា ឥឡូវនេះទោះចង់មិនចង់ កូវីដអូមីក្រុងបានវាយលុកឆ្លងចូល គ្របដណ្តប់ភាគច្រើននៅជប៉ុនទៅហើយ។ ដូច្នេះរដ្ឋាភិបាលជប៉ុន គួរតែឈប់យល់ថា អ្នកដំណើរមកពីបរទេស គឺជាអ្នកចម្លងមេរោគនេះតទៅទៀតទៅ។
ក្រៅពីធ្វើឲ្យប៉ះពាល់ខ្លាំង ដល់វិស័យជំនួញ និងទីផ្សារការងារ វិធានការបិទព្រំដែនយ៉ាងជិតឈឹងរបស់រដ្ឋាភិបាលជប៉ុននេះ ក៏បានប៉ះពាល់ខ្លាំងណាស់ដែរ ទៅលើវិស័យសិក្សាអប់រំ។ ក្នុងចំណោមមនុស្សប្រមាណ ៣៧ម៉ឺននាក់ ដែលកំពុងរងចាំអាចធ្វើដំណើរទៅកាន់ប្រទេសជប៉ុន គឺមានប្រមាណជិត១៥ម៉ឺននាក់ ជានិស្សិតបរទេស។ និស្សិតបរទេសជាច្រើននាក់ ដែលបានចុះឈ្មោះរៀននៅតាមសកលវិទ្យាល័យជប៉ុន ត្រូវបង្ខំចិត្តរៀនតាមអនឡាញ ជាមួយម៉ោងពេលវេលាខុសគ្នាជាច្រើនម៉ោង ព្រមទាំងការភ័យបារម្ភ ខ្លាចក្រែងមិនអាចបានទទួលពិន្ទុគ្រប់គ្រាន់។
អារម្មណ៍អស់សង្ឃឹម បាក់ទឹកចិត្ត លាយឡំនឹងកំហឹងក្រោវក្រោធ បានចូលជ្រាបក្នុងសតិស្មារតីរបស់និស្សិតបរទេស ដែលបានជ្រើសរើសយកប្រទេសជប៉ុន ជាគោលដៅសិក្សា តែត្រូវខកបំណង ដោយសារតែវិធានការបិទព្រំដែនដ៏តឹងតែងនេះ។ ក្រៅពីនិស្សិតបរទេស វិធានការបិទខ្ទប់ គ្មានប្រទេសណាធ្វើដូចនេះ ក៏បានរារាំងផងដែរ ដល់ការជួបជុំក្រុមគ្រួសារប្តីប្រពន្ធកូនចៅ។
ប្រឈមនឹងការរិះគន់ទាំងអស់នេះ លោករដ្ឋមន្ត្រីក្រសួងការបរទេសជប៉ុន បានឆ្លើយប្រាប់អ្នកកាសែតថា « រដ្ឋាភិបាលលោក ព្យាយាមដោះស្រាយករណីពិសេសនីមួយ ដោយយោងទៅលើហេតុផលមនុស្សធម៌ និងផលប្រយោជន៍ជាតិ »។ ប្រមុខការទូតជប៉ុនរូបនេះ បានអះអាងថា កាលពីសប្តាហ៍កន្លងទៅ រដ្ឋាភិបាលបានអនុញ្ញាតឲ្យនិស្សិតបរទេសចំនួន ៨៧នាក់ ដែលជានិស្សិតអាហារូបករណ៍រដ្ឋ អាចធ្វើដំណើរមកជប៉ុន។ តែយ៉ាងណានេះគ្រាន់តែជាចំនួនស្តួចស្តើង មិនខុសពីទឹកមួយដំណក់ នៅក្នុងផ្ទៃសមុទ្រនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ