២០ឆ្នាំក្រោយដាក់ឲ្យចរាចរ លុយអឺរ៉ូនៅតែជាប់ឈ្មោះថាជាដើមចមនាំឲ្យទំនិញឡើងថ្លៃ
ចុះផ្សាយនៅថ្ងៃ៖
ស្តាប់ - ០៤:១៤
គិតត្រឹមថ្ងៃទី១មករា ឆ្នាំ២០២២នេះ អឺរ៉ូ ដែលជារូបិយបណ្ណរួមរបស់សហភាពអឺរ៉ុប មានអាយុកាល ២០ឆ្នាំគត់។ ២០ឆ្នាំក្រោយពីត្រូវបានគេដាក់ឲ្យចរាចរណ៍ជាលើកដំបូង កាលពីថ្ងៃទី១មករាឆ្នាំ២០០២កន្លងទៅ ប្រជាជនភាគច្រើននៅក្នុងសហភាពអឺរ៉ុបនៅតែមើលឃើញថា ការប្តូរពីការចាយលុយជាតិ មកចាយលុយអឺរ៉ូនេះ គឺជាដើមហេតុដ៏ចម្បងមួយ ដែលធ្វើឲ្យទំនិញទូទៅត្រូវឡើងថ្លៃ។ តើអឺរ៉ូពិតជាដើមចមនាំឲ្យទំនិញឡើងថ្លៃមែនឬក៏យ៉ាងណា?
នៅក្នុងសមាហរណកម្មអឺរ៉ុប បើគេនិយាយអំពីការផ្លាស់ប្តូរចម្បងជាងគេ ទៅលើជីវិតរស់នៅប្រចាំថ្ងៃរបស់ប្រជាជន គេប្រាកដជានឹងលើកឡើង អំពីចំណុចសំខាន់ចំនួនពីរ។ ទីមួយ លំហស្ហិនហ្កិន (Schengen) ដែលប្រជាជនអឺរ៉ុបអាចធ្វើដំណើរដោយសេរីរវាងប្រទេសជាសមាជិក ដោយគ្មានការត្រួតពិនិត្យតាមព្រំដែន។ ទីពីរ ការចាយលុយរួម គឺលុយអឺរ៉ូ ដែលមិនតម្រូវឲ្យមានការដូរលុយពីប្រទេសមួយទៅប្រទេសមួយ។
ក៏ប៉ុន្តែ សម្រាប់ប្រជាជនទូទៅនៅអឺរ៉ុប (រហូតដល់ទៅជាងពាក់កណ្តាល បើយោងតាមការស្ទាបស្ទង់មតិថ្មីចុងក្រោយ កាលពីខែធ្នូឆ្នាំ២០២១កន្លងទៅ) ការបោះបង់ចោលរូបិយបណ្ណជាតិ មកចាយលុយអឺរ៉ូ បានធ្វើឲ្យទំនិញសព្វសារពើទាំងអស់សុទ្ធតែត្រូវឡើងថ្លៃខ្លាំង។
ការពិតជាក់ស្តែងវិញ បើមើលទៅលើទិន្នន័យផ្លូវការរបស់ការិយាល័យស្ថិតិ តម្លៃទំនិញទូទៅ នៅក្នុងរយៈពេល ២០ឆ្នាំកន្លងទៅនេះ មិនបានកើនឡើងខ្លាំងដូចការគិតរបស់ប្រជាជននោះទេ ហើយមែនទែនទៅ នៅក្នុងរយៈពេលប៉ុន្មានឆ្នាំនេះ អត្រាអតិផរណាប្រចាំឆ្នាំក្នុងតំបន់ចាយលុយអឺរ៉ូ ថែមទាំងធ្លាក់ចុះមកនៅក្រោម ១% ដែលជាអត្រាមួយទាបខ្លាំង រហូតធ្វើឲ្យអ្នកសេដ្ឋកិច្ចបារម្ភថានឹងអាចបង្កជាឧបសគ្គទៅដល់កំណើនសេដ្ឋកិច្ចទៅវិញ។
នៅប្រទេសបារាំង ដែលប្រជាជនតែងតែនាំគ្នារអ៊ូរទាំតាំងពីរាប់ឆ្នាំមកហើយថា ទំនិញសព្វមុខឡើងថ្លៃដោយសារអឺរ៉ូ តួលេខរបស់វិទ្យាស្ថានស្ថិតិជាតិ (ហៅកាត់ថា INSEE) ក៏បង្ហាញផងដែរថា អត្រាអតិផរណាក្រោយការចាយលុយអឺរ៉ូមិនបានកើនឡើងនោះទេ ដោយក្នុងរយៈពេល ២០ឆ្នាំកន្លងទៅនេះ ចាប់ពីពេលដែលបារាំងប្តូរពីចាយលុយហ្វ្រង់ មកចាយលុយអឺរ៉ូ អត្រាអតិផរណាប្រចាំឆ្នាំគិតជាមធ្យមមានត្រឹម ១,៤% ប៉ុណ្ណោះ ដែលមែនទែនទៅ វាទាបជាងបន្តិចផង បើធៀបនឹងរយៈពេល ១០ឆ្នាំមុនពេលចាយលុយអឺរ៉ូ ដែលអត្រាអតិផរណាប្រចាំឆ្នាំ មានរហូតដល់ទៅ ១,៧%។
ដូច្នេះ សំណួរសួរថា តើហេតុអ្វីបានជាប្រជាជនភាគច្រើននាំគ្នាគិតថា អឺរ៉ូនាំឲ្យទំនិញឡើងថ្លៃបែបនេះទៅវិញ?
យោងតាមអ្នកជំនាញសេដ្ឋកិច្ចបារាំង ការណ៍ដែលប្រជាជនគិតថា អឺរ៉ូធ្វើឲ្យទំនិញឡើងថ្លៃ គឺអាចបណ្តាលមកពីកត្តាច្រើនផ្សំចូលគ្នា។
ទីមួយ គឺជាកត្តាទាក់ទងទៅនឹងផ្នែកចិត្តសាស្រ្ត។ គេដឹងថា ការគណនាអត្រាអតិផរណា គឺធ្វើទៅលើមុខទំនិញជាលក្ខណៈទូទៅ ក៏ប៉ុន្តែ វាមិនមែនមានន័យថា គ្រប់មុខទំនិញទាំងអស់សុទ្ធតែប្រែប្រួលតម្លៃក្នុងទំហំស្មើៗគ្នាទាំងអស់នោះទេ។ ទំនិញខ្លះឡើងថ្លៃខ្លាំង ខ្លះឡើងថ្លៃតិច ខ្លះនៅថេរ ចំណែកទំនិញខ្លះទៀតតម្លៃត្រូវធ្លាក់ចុះក៏មាន។ ក៏ប៉ុន្តែ យោងតាមអ្នកជំនាញខាងចិត្តសាស្រ្ត-សេដ្ឋកិច្ច អ្នកទិញច្រើនតែផ្តោតអារម្មណ៍ និងចងចាំពីរឿងទំនិញឡើងថ្លៃដែលធ្វើឲ្យខ្លួនខាត ច្រើនជាងរឿងទំនិញដែលមានតម្លៃថេរ ឬធ្លាក់ចុះ។
កត្តាចម្បងមួយទៀត គឺអាចទាក់ទងនឹងចំណុចគោល ដែលគេយកមកប្រៀបធៀប។ អ្នកដែលគិតថា ទំនិញឡើងថ្លៃខ្លាំងដោយសារលុយអឺរ៉ូ គឺគេប្រៀបធៀបទៅនឹងរូបិយបណ្ណជាតិ ដែលគេធ្លាប់ប្រើពីមុន។ ឧទាហរណ៍ ដូចជានៅបារាំង គេប្រៀបធៀបជាមួយនឹងតម្លៃទំនិញ កាលពីនៅប្រើលុយហ្វ្រង់។
ដោយសារតែលុយហ្វ្រង់ លែងត្រូវបានគេប្រើតាំងពីយូរឆ្នាំមកហើយនោះ រាល់ការប្រៀបធៀបជាមួយនឹងតម្លៃទំនិញគិតជាហ្វ្រង់ គឺមិនអាចប្រៀបធៀបតម្លៃទំនិញ ពីមួយឆ្នាំទៅមួយឆ្នាំបាននោះទេ។ ផ្ទុយទៅវិញ គឺចាំបាច់ត្រូវតែប្រៀបធៀបទៅនឹងតម្លៃទំនិញ តាំងពីមុនឆ្នាំ២០០២ មុនពេលចាប់ផ្តើមប្រើអឺរ៉ូ មានន័យថា កាលពី ២០ឆ្នាំមុន។ ការប្រៀបធៀបទៅក្នុងអតីតកាលដ៏យូរបែបនេះ វាប្រាកដជាធ្វើឲ្យគេមើលឃើញគម្លាតគ្នាឆ្ងាយ ពីព្រោះថា បើទោះជាអត្រាអតិផរណាប្រចាំឆ្នាំមានកម្រិតទាប ត្រឹមក្រោម ២% ដែលមានន័យថា តម្លៃទំនិញទូទៅកើនឡើងក្រោម ២% បើធៀបពីមួយឆ្នាំទៅមួយឆ្នាំ ក៏ប៉ុន្តែ បើគិតជាសរុបបូកបញ្ចូលគ្នា នៅក្នុងរយៈពេល ២០ឆ្នាំកន្លងទៅ គេប្រាកដជាមើលឃើញថា តម្លៃទំនិញទូទៅត្រូវកើនឡើងខ្លាំង រហូតដល់ទៅជាង ៣០% ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ