តើការស្រូបឧស្ម័នកាបូនិចពីបរិយាកាសអាចជាដំណោះស្រាយបញ្ហាអាកាសធាតុ?
ចុះផ្សាយនៅថ្ងៃ៖
ស្តាប់ - ០៤:៥៨
នៅក្នុងការដាក់ចេញវិធានការ ដើម្បីទប់ស្កាត់ការឡើងកម្តៅផែនដី យើងតែងតែឮគេនិយាយញឹកញាប់ជាងគេ អំពីការកាត់បន្ថយការបញ្ចេញឧស្ម័នកាបូនិចទៅក្នុងបរិយាកាស។ ក៏ប៉ុន្តែ នៅមានវិធានការមួយទៀត ដែលជាទូទៅមិនសូវត្រូវបានគេនិយាយដល់ គឺការស្រូបយកឧស្ម័នកាបូនិចពីក្នុងបរិយាកាសមកវិញ។ តើការស្រូបយកឧស្ម័នកាបូនិចពីបរិយាកាសនេះពិតជាដំណោះស្រាយល្អក្នុងការទប់ស្កាត់ការឡើងកម្តៅផែនដីមែនឬក៏យ៉ាងណា?
គោលដៅដែលបានដាក់ចេញនៅក្នុងកិច្ចព្រមព្រៀងអាកាសធាតុក្រុងប៉ារីស (២០១៥) គឺធ្វើយ៉ាងណាទប់ស្កាត់កុំឲ្យផែនដីឡើងកម្តៅលើសពី ២អង្សា នៅចុងសតវត្សរ៍ទី២១ (ឆ្នាំ២១០០) ហើយដើម្បីសម្រេចទៅតាមគោលដៅនេះ យើងចាំបាច់ត្រូវកម្រិតការបញ្ចេញឧស្ម័នកាបូនិចឲ្យនៅត្រឹមចំណុច ដែលគេហៅថា “ហ្សេរ៉ូកាបូន” នៅត្រឹមឆ្នាំ២០៥០ខាងមុខ។
ដើម្បីអាចឈានដល់ចំណុច “ហ្សេរ៉ូកាបូន” នេះ ឬមួយ យើងត្រូវបញ្ឈប់ការបញ្ចេញឧស្ម័នកាបូនិចទាំងស្រុង ឬមួយ អាចនៅបន្តបញ្ចេញឧស្ម័នកាបូនិចនៅក្នុងកម្រិតណាមួយ ក៏ប៉ុន្តែ ត្រូវស្រូបយកឧស្ម័នកាបូនិចពីក្នុងបរិយាកាសមកវិញឲ្យបានស្មើនឹងបរិមាណឧស្ម័នកាបូនិចដែលយើងបញ្ចេញទៅក្នុងបរិយាកាស។
ការស្រូបយកឧស្ម័នកាបូនិចពីក្នុងបរិយាកាសនេះ អាចធ្វើឡើង ដោយវិធីពីរយ៉ាង។ ទីមួយ ធ្វើទៅតាមលក្ខណៈធម្មជាតិ រួមមានជាអាទិ៍ ទប់ស្កាត់ការកាប់បំផ្លាញព្រៃឈើ ហើយដាំឈើបន្ថែម ដើម្បីប៉ះប៉ូវដីព្រៃដែលបាត់បង់ ព្រមទាំងពង្រីកផ្ទៃដីព្រៃឈើឲ្យកាន់តែធំ។ ទីពីរ គឺការប្រើបច្ចេកវិទ្យាដើម្បីស្រូបយកឧស្ម័នកាបូនិចពីបរិយាកាសដោយផ្ទាល់។
បច្ចេកវិទ្យាស្រូបយកឧស្ម័នកាបូនិចពីក្នុងបរិយាកាសគឺមានរួចទៅហើយ នៅក្នុងពេលបច្ចុប្បន្ន ហើយមជ្ឈមណ្ឌលស្រូបឧស្ម័នកាបូនិចដ៏ធំមួយ ក៏ទើបនឹងត្រូវបានគេដាក់ឲ្យដំណើរការរួចហើយដែរ កាលពីដើមខែកញ្ញាកន្លងទៅនេះ នៅក្នុងប្រទេសអ៊ីស្លង់។
ក៏ប៉ុន្តែ ជាទូទៅ ការស្រូបយកឧស្ម័នកាបូនិចពីបរិយាកាសដោយប្រើបច្ចេកវិទ្យានេះ ច្រើនតែត្រូវគេមើលរំលងមិនសូវជានិយាយដល់ ហើយពេលខ្លះមានទាំងអ្នករិះគន់ទៅទៀត ដោយសារតែគេគិតថា ការស្រូបយកឧស្ម័នកាបូនិចទៅតាមវិធីនេះមានប្រសិទ្ធភាពតិចតួចខ្លាំងពេក។ ជាក់ស្តែង មជ្ឈមណ្ឌលស្រូបឧស្ម័នកាបូនិចនៅអ៊ីស្លង់ ដែលជាមជ្ឈមណ្ឌលធំជាងគេបំផុតនៅលើពិភពលោកនាពេលបច្ចុប្បន្ននេះ មានសមត្ថភាពស្រូបយកឧស្ម័នកាបូនិចបានត្រឹមតែប្រមាណជា ៤ពាន់តោនប៉ុណ្ណោះក្នុងមួយឆ្នាំ ដែលជាចំណែកដ៏តិចតួចខ្លាំងណាស់ បើធៀបទៅនឹងបរិមាណឧស្ម័នកាបូនិចសរុប ដែលមនុស្សយើងបញ្ចេញទៅក្នុងបរិយាកាស រហូតដល់ទៅប្រមាណជា ៣៥ពាន់លានតោន ក្នុងមួយឆ្នាំៗ។
បញ្ហាប្រឈមដ៏ចម្បងមួយទៀត គឺនៅត្រង់ថា ការស្រូបឧស្ម័នកាបូនិចពីក្នុងបរិយាកាសតាមបច្ចេកវិទ្យាសព្វថ្ងៃនេះ ត្រូវការប្រើទឹក និងថាមពលច្រើន។ តម្រូវការទឹកច្រើននាំឲ្យចោទជាបញ្ហាជុំវិញផលប៉ះពាល់អវិជ្ជមានទៅលើធនធានទឹក ដែលមនុស្សយើងត្រូវការចាំបាច់សម្រាប់វិស័យផ្សេង រាប់ទាំងទឹកស្អាត និងទាំងទឹកសម្រាប់ធ្វើកសិកម្មផលិតស្បៀងអាហារ។ ចំណែកតម្រូវការថាមពលច្រើនវិញ វាត្រូវចោទជាសំណួរដ៏ចម្បងមួយទៀតថា តើប្រភពថាមពលនេះបានមកពីណា? ប្រសិនបើថាមពលដែលប្រើនៅក្នុងការស្រូបឧស្ម័នកាបូនិចនេះមានប្រភពពីថាមពលផូស៊ីល ដូច្នេះ វាមានន័យថា សកម្មភាពស្រូបឧស្ម័នកាបូនិចពីបរិយាកាសនេះ វានាំឲ្យមានការបញ្ចេញឧស្ម័នកាបូនិចទៅក្នុងបរិយាកាសវិញដដែលជាដដែល។
ទោះជាយ៉ាងណា នេះមិនមែនមានន័យថា ការស្រូបឧស្ម័នកាបូនិចពីក្នុងបរិយាកាសដោយប្រើបច្ចេកវិទ្យានេះ មិនមែនជាដំណោះស្រាយក្នុងការទប់ស្កាត់ការឡើងកម្តៅផែនដីនោះទេ។ វាអាចជាដំណោះស្រាយមួយ ប្រសិនបើវាដើរទន្ទឹមគ្នាជាមួយនឹងដំណោះស្រាយផ្សេងទៀត ជាពិសេស គឺការវិនិយោគលើថាមពលបៃតង ដើម្បីយកមកប្រើឲ្យបានទូលំទូលាយ ជំនួសថាមពលផូស៊ីល។
តាមរយៈការវិនិយោគលើថាមពលបៃតងនេះ យើងអាចកាត់បន្ថយការបញ្ចេញឧស្ម័នកាបូនិចបានមួយផ្នែកធំ នៅក្នុងវិស័យដែលអាចកាត់បន្ថយបាន។ ក្នុងពេលជាមួយគ្នា ថាមពលបៃតងនេះអាចជួយបង្កើនប្រសិទ្ធភាពបច្ចេកវិទ្យាស្រូបឧស្ម័នកាបូនិច ដើម្បីជួយប៉ះប៉ូវឧស្ម័នបញ្ចេញដោយវិស័យមួយចំនួន ដែលយើងពិបាកនឹងកាត់បន្ថយ។
លើសពីនេះទៅទៀត បើមើលទៅលើស្ថានភាពកាន់តែដុនដាបនៃបញ្ហាអាកាសធាតុ ដូចដែលមាននៅក្នុងរបាយការណ៍អ្នកជំនាញអាកាសធាតុរបស់អ.ស.ប. បច្ចេកវិទ្យាស្រូបឧស្ម័នកាបូនិចពីក្នុងបរិយាកាសអាចនឹងត្រូវដើរតួនាទីកាន់តែសំខាន់ នៅក្នុងជំហានបន្ទាប់ពី “ហ្សេរ៉ូកាបូន”។
យោងតាមរបាយការណ៍អាកាសធាតុចេញផ្សាយ កាលពីខែសីហាកន្លងទៅនេះ ស្ថានភាពអាកាសធាតុលើភពផែនដីរបស់យើងកំពុងតែដើរដល់ដំណាក់កាលមួយទុំជោរជ្រុល ដោយបរិមាណឧស្ម័នក្នុងបរិយាកាសមានច្រើនពេក ហើយការកាត់បន្ថយការបញ្ចេញឧស្ម័នត្រឹមកម្រិត “ហ្សេរ៉ូកាបូន” ក៏ប្រហែលជានៅតែមិនទាន់គ្រប់គ្រាន់ ដើម្បីទប់ស្កាត់ការឡើងកម្តៅផែនដីឲ្យនៅត្រឹម ១,៥អង្សា ឬ២អង្សាបាន។ ដូច្នេះ យើងប្រហែលជាចាំបាច់ត្រូវឈានមួយជំហានទៀត គឺទៅដល់កម្រិត “អវិជ្ជមានកាបូន” ពោលគឺ ត្រូវស្រូបយកឧស្ម័នពីក្នុងបរិយាកាសឲ្យបានច្រើនជាងបរិមាណឧស្ម័នដែលយើងបញ្ចេញទៅក្នុងបរិយាកាស។ នៅក្នុងករណីនេះហើយ ដែលបច្ចេកវិទ្យាស្រូបឧស្ម័នកាបូនិចពីក្នុងបរិយាកាសអាចនឹងត្រូវដើរតួនាទីសំខាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ