ហេតុអ្វីអាល្លឺម៉ង់បញ្ជូននាវាចម្បាំងទៅសមុទ្រចិនខាងត្បូង?
ចុះផ្សាយនៅថ្ងៃ៖
ស្តាប់ - ០៤:៣០
កាលពីថ្ងៃចន្ទ២សីហាកន្លងទៅនេះ អាល្លឺម៉ង់បានបញ្ជូននាវាចម្បាំងមួយគ្រឿងឲ្យទៅកាន់តំបន់សមុទ្រចិនខាងត្បូង ដែលជាតំបន់កំពុងមានភាពតានតឹងខ្លាំងជាមួយនឹងចិន។ ជាទូទៅ គេសង្កេតឃើញថា អាល្លឺម៉ង់ ដែលមានប្រយោជន៍សេដ្ឋកិច្ចច្រើនជាមួយចិន មិនសូវជាប្រកាន់នូវជំហរតឹងរ៉ឹងប៉ុន្មានទេចំពោះចិន។ ហេតុអ្វីបានជាអាល្លឺម៉ង់បញ្ជូននាវាទៅកាន់តំបន់សមុទ្រចិនខាងត្បូងនៅពេលនេះ?
នាវាចម្បាំងដែលអាល្លឺម៉ង់បញ្ជូនទៅអាស៊ីនៅពេលនេះ ធ្វើឡើងនៅក្នុងក្របខណ្ឌនៃដំណើរទស្សនកិច្ចរយៈពេល៧ខែ មួយជុំតំបន់ឥណ្ឌូប៉ាស៊ីហ្វិក ដោយនឹងត្រូវចូលសំចត នៅតាមបណ្តាប្រទេសជាច្រើន ហើយត្រូវបើកឆ្លងកាត់តំបន់សមុទ្រចិនខាងត្បូង នៅអំឡុងពាក់កណ្តាលខែធ្នូខាងមុខ។
នេះគឺជាលើកទីមួយ នៅក្នុងរយៈពេល២០ឆ្នាំកន្លងទៅនេះ ដែលអាល្លឺម៉ង់បញ្ជូននាវាចម្បាំង ទៅកាន់តំបន់សមុទ្រចិនខាងត្បូង ហើយវាជាផ្នែកមួយ នៃយុទ្ធសាស្រ្តដ៏ប្រយ័ត្នប្រយែងរបស់អាល្លឺម៉ង់ នៅក្នុងតំបន់ភូមិសាស្រ្តនយោបាយដ៏ក្តៅគគុកមួយនេះ។
ចំណុចគន្លឹះនៃយុទ្ធសាស្រ្តរបស់អាល្លឺម៉ង់ទាក់ទងនឹងចិន គឺធ្វើយ៉ាងណាស្វែងរកតុល្យភាពមួយ រវាងផលប្រយោជន៍សេដ្ឋកិច្ច និងតម្រូវការផ្នែកសន្តិសុខ។
ខាងផ្នែកសេដ្ឋកិច្ច ចិនគឺជាដៃគូពាណិជ្ជកម្មដ៏ធំលំដាប់ទី១របស់អាល្លឺម៉ង់ ហើយនៅក្នុងបរិបទនៃបញ្ហាសេដ្ឋកិច្ចដោយសារវិបត្តិកូវីដក្នុងពេលបច្ចុប្បន្ននេះ អាល្លឺម៉ង់រឹតតែត្រូវការចិន ដើម្បីជាទីផ្សារនាំចេញ ជួយរុញសេដ្ឋកិច្ចឲ្យមានកំណើនមកវិញ។
ខាងផ្នែកសន្តិសុខវិញ អាល្លឺម៉ង់ និងចិន ក្រៅពីមានគោលការណ៍នយោបាយ ប្រជាធិបតេយ្យ និងសិទ្ធិមនុស្សផ្ទុយគ្នា គឺជាប្រទេសដែលឈរនៅទិសដៅផ្ទុយគ្នា ក្នុងរចនាសម្ព័ន្ធសន្តិសុខអន្តរជាតិ។
គេអាចសង្កេតឃើញថា ចាប់តាំងពីក្រោយសង្រ្គាមលោកលើកទី២មក សន្តិសុខជាតិអាល្លឺម៉ង់ត្រូវពឹងផ្អែកខ្លាំងលើយន្តការ “ការពារជាតិរួម” (Collective Defense) ពោលគឺ ពឹងលើសម្ព័ន្ធភាពជាមួយនឹងបណ្តាប្រទេស ទាំងនៅក្នុងបក្សសម្ព័ន្ធអូតង់ និងប្រទេសសម្ព័ន្ធមិត្តផ្សេងទៀតក្រៅអូតង់ ជាពិសេស ជប៉ុន និងអូស្ត្រាលី ដែលភាគច្រើនគឺជាគូប្រជែងរបស់ចិន។
នៅក្នុងមួយរយៈកាលចុងក្រោយនេះ គេសង្កេតឃើញថា ក្រៅពីសហរដ្ឋអាមេរិក ប្រទេសផ្សេងទៀតដែលជាសម្ព័ន្ធមិត្តចម្បងៗរបស់អាល្លឺម៉ង់ រួមមាន បារាំង និងអង់គ្លេស ជាដើម សុទ្ធតែបានបញ្ជូននាវាចម្បាំងទៅកាន់សមុទ្រចិនខាងត្បូងជាបន្តបន្ទាប់ ហើយជប៉ុនវិញក៏បានស្នើសុំដោយទទូចផងដែរឲ្យអាល្លឺម៉ង់បញ្ជូននាវាចម្បាំងទៅកាន់តំបន់នោះ ដើម្បីបង្ហាញពីជំហររួបរួមគ្នាទល់នឹងចិន។
នៅក្នុងបរិបទនេះហើយ ដែលអាល្លឺម៉ង់សម្រេចបញ្ជូននាវាចម្បាំងទៅកាន់សមុទ្រចិនខាងត្បូង ដើម្បីម្យ៉ាង បង្ហាញពីជំហរផ្លូវការរបស់អាល្លឺម៉ង់ក្នុងការទាមទារឲ្យមានការធានានូវសេរីភាពនាវាចរណ៍ក្នុងតំបន់សមុទ្រចិនខាងត្បូងស្របទៅតាមច្បាប់អន្តរជាតិផង និងម្យ៉ាងទៀត ដើម្បីបង្ហាញពីជំហរគាំទ្រដល់ប្រទេសសម្ព័ន្ធមិត្ត ដែលកំពុងប្រឈមមុខជាមួយចិន នៅក្នុងតំបន់។
ក៏ប៉ុន្តែ នៅក្នុងពេលជាមួយគ្នា អាល្លឺម៉ង់ក៏បានព្យាយាមផងដែរធ្វើយ៉ាងណាចៀសវាងមិនឲ្យការបញ្ជូននាវាចម្បាំងទៅកាន់តំបន់អាស៊ីពេលនេះ នាំទៅដល់ការប្រឈមមុខដាក់គ្នាណាមួយជាមួយនឹងចិន។
លោកស្រី អាណឺហ្ក្រេត ក្រាំការេនបោវ័រ (Annegret Kramp-Karrenbauer) រដ្ឋមន្រ្តីការពារជាតិអាល្លឺម៉ង់ នៅក្នុងពេលជូនដំណើរនាវាចម្បាំងចេញទៅកាន់តំបន់អាស៊ីនេះ បានលើកឡើងថា អាល្លឺម៉ង់ចង់ឲ្យអ្វីៗត្រូវធ្វើទៅតាមច្បាប់ជាធរមាន ចរាចរណ៍ផ្លូវសមុទ្រអាចធ្វើទៅបានដោយសេរី សង្គមសេរីនិងបើកចំហត្រូវទទួលបាននូវការការពារ ហើយការដោះដូរពាណិជ្ជកម្មត្រូវធ្វើទៅតាមវិធានត្រឹមត្រូវ។
មន្រ្តីរដ្ឋាភិបាលអាល្លឺម៉ង់ក៏ធ្លាប់បានប្រាប់ទីភ្នាក់ងារព័ត៌មានរ៉យទ័រផងដែរថា នាវាចម្បាំងអាល្លឺម៉ង់ ថ្វីដ្បិតតែនឹងត្រូវឆ្លងកាត់តំបន់សមុទ្រចិនខាងត្បូង ក៏ប៉ុន្តែ នឹងធ្វើដំណើរតែទៅតាមគន្លងនាវាចរណ៍អន្តរជាតិធម្មតាតែប៉ុណ្ណោះ ដោយនឹងមិនចូលទៅដល់ក្នុងរង្វង់ ១២ម៉ាយល៍ ពីដែនកោះណាមួយ ដែលកំពុងជាប់ជម្លោះនោះទេ ហើយជាងនេះទៅទៀត នាវាចម្បាំងនេះក៏នឹងមិនបើកកាត់តាមច្រកសមុទ្រតៃវ៉ាន់នោះដែរ។
ជាងនេះទៅទៀត បើគេមើលទៅលើផែនទីដែលចុះផ្សាយដោយក្រសួងការពារជាតិអាល្លឺម៉ង់ ទីតាំងទាំង១២ ដែលនាវាចម្បាំងអាល្លឺម៉ង់គ្រោងចូលសំចត នៅក្នុងដំណើរទស្សនកិច្ចរយៈពេល៧ខែនេះ ក្រៅពីបណ្តាប្រទេសសម្ព័ន្ធមិត្តអាល្លឺម៉ង់ និងជាគូប្រជែងរបស់ចិន រួមមានដូចជា ជប៉ុន អូស្រ្តាលី កូរ៉េខាងត្បូង និងវៀតណាម ជាដើម នាវាចម្បាំងនេះក៏គ្រោងចូលសំចតផងដែរ នៅទីក្រុងសៀងហៃប្រទេសចិន។
យោងតាមការចុះផ្សាយរបស់កាសែត The Global Times ដែលជាកាសែតផ្លូវការរបស់បក្សកុម្មុយនិស្តចិន គម្រោងចូលសំចតនៅសៀងហៃនេះ នៅមិនទាន់ទទួលបានការឯកភាពជាផ្លូវការពីសំណាក់រដ្ឋាភិបាលក្រុងប៉េកាំងនៅឡើយទេ។ ក៏ប៉ុន្តែ ទោះជាយ៉ាងណានេះជាការបង្ហាញឲ្យឃើញកាន់តែច្បាស់ អំពីចេតនារបស់អាល្លឺម៉ង់ ក្នុងការបញ្ចៀស កុំឲ្យការបញ្ជូននាវាចម្បាំងនេះត្រូវបានគេមើលមកថាជាការធ្វើឡើង ដើម្បីស្វែងរកការប្រឈមដាក់គ្នាជាមួយចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ