មនុស្សក្រៅភព៖ តើរបាយការណ៍ចារកិច្ចអាមេរិកបង្ហាញពីអ្វីខ្លះ?
ចុះផ្សាយនៅថ្ងៃ៖
ស្តាប់ - ០៣:៥៧
កាលពីថ្ងៃសុក្រ ២៥មិថុនាកន្លងទៅនេះ ទីភ្នាក់ងារចារកិច្ចអាមេរិកបានចេញផ្សាយរបាយការណ៍មួយ ដែលមនុស្សជាច្រើនទន្ទឹងរង់ចាំ គឺស្តីអំពីហេតុការណ៍ចម្លែកៗ ដែលគេប្រទះឃើញ ដែលគេតែងតែហៅកាត់ជាភាសាអង់គ្លេសថា “UFO” ហើយដែលមានមនុស្សជាច្រើនជឿថា គឺជាមនុស្សក្រៅភព។ តើរបាយការណ៍នោះបង្ហាញអំពីអ្វីខ្លះ? តើវាពិតជាអាចស្រាយចម្ងល់ទាក់ទងនឹងមនុស្សក្រៅភពនេះបានដែរឬក៏យ៉ាងណា?
UFO ដែលមកពីឃ្លាពេញជាភាសាអង់គ្លេសថា « Unidentified Flying Object » គឺជាអាថ៌កំបាំងដ៏ធំមួយ ដែលតែងតែបង្កើតឲ្យមានការជជែកវែកញែកគ្នា បង្កើតបានជាសម្មតិកម្មចម្រុះ រាប់ចាប់តាំងពីអ្នកជឿថា វាមានប្រភពចេញពីបច្ចេកវិទ្យាថ្មីរបស់ប្រទេសណាមួយ រហូតដល់អ្នកខ្លះទៀត ជឿថាវាមានប្រភពពីមនុស្សក្រៅភពផែនដីរបស់យើង។
នៅអាមេរិក អាថ៌កំបាំងជុំវិញមនុស្សក្រៅភពនេះបានបង្កើតឲ្យមានជាមន្ទិលសង្ស័យទៅលើរដ្ឋាភិបាល ដោយគេនាំគ្នាជឿថា រដ្ឋាភិបាលអាមេរិកមានភស្តុតាង អំពីមនុស្សក្រៅភព ក៏ប៉ុន្តែ លាក់បាំងព័ត៌មាននេះពីភ្នែកសារធារណជន។ កាលពីដំបូងមន្ទិលសង្ស័យនេះតែងតែត្រូវបានគេផាត់ចោល ដោយចាត់ទុកថា វាគ្រាន់តែជាពាក្យចចាមអារ៉ាម ជំនឿអរូបិយ ឬជាការស្រមើស្រមៃតាមកុនហូលីវូដ ក៏ប៉ុន្តែ មួយរយៈកាលចុងក្រោយនេះ វាបានក្លាយជាសម្ពាធទៅលើរដ្ឋាភិបាលអាមេរិក ក្រោយពីមានឥស្សរជនរហូតដល់ថ្នាក់កំពូល ដូចជា លោកអតីតប្រធានាធិបតីអូបាម៉ាជាដើម បានទទួលស្គាល់ថា អាមេរិកពិតជាមានមែន ទិន្នន័យអំពីបាតុភូតចម្លែកៗ ដែលគេមិនអាចពន្យល់បាន។
សមាជិកសភាអាមេរិកជាច្រើនក៏បានទាមទារឲ្យរដ្ឋាភិបាលបង្ហាញជាសាធារណៈនូវរាល់ព័ត៌មានដែលគេប្រមូលបានទាក់ទងនឹងបាតុភូតចម្លែកអស់ទាំងនេះ ហើយដែលកន្លងមក ត្រូវបានគេដាក់ជាការណ៍សម្ងាត់។
តាមការពិតទៅ សម្រាប់សមាជិកសភាអាមេរិក អ្វីដែលគេចង់ដឹង គឺមិនផ្តោតសំខាន់ទៅលើរឿងមនុស្សក្រៅភពនោះទេ តែផ្តោតទៅលើបញ្ហាសន្តិសុខជាតិ ដោយគេបារម្ភថា បាតុភូតចម្លែកៗដែលគេសង្កេតឃើញកន្លងមកនោះ គឺជាបច្ចេកវិទ្យាថ្មីៗរបស់បណ្តាប្រទេសជាគូប្រជែង ដូចជា ចិន និងរុស្ស៊ី ជាដើម ដែលអាចគំរាមកំហែងដល់សន្តិសុខជាតិរបស់អាមេរិក។
ក៏ប៉ុន្តែ បើទោះជាយ៉ាងណា អ្នកដែលជឿរឿងមនុស្សក្រៅភព នៅតែនាំគ្នាទន្ទឹងរង់ចាំយ៉ាងអន្ទះសាថា របាយការណ៍ចារកិច្ចអាមេរិកនេះអាចនឹងបង្ហាញ អំពីភស្តុតាងអំពីវត្តមាននៃមនុស្សក្រៅភព។
នៅក្នុងរបាយការណ៍សង្ខេប ៩ទំព័រ ដែលចេញផ្សាយ កាលពីថ្ងៃសុក្រ ២៥មិថុនានេះ ក្រសួងការពារជាតិអាមេរិកបានទទួលស្គាល់ថា កាលពីពេលកន្លងមក គេពិតជាធ្លាប់បានសង្កេតឃើញបាតុភូតចម្លែកនៅលើអាកាស (Unidentified Aerial Phonomena/UAP) ចំនួន ១៤៤ ដោយខ្លះចាប់បានដោយប្រព័ន្ធរ៉ាដា ខ្លះដោយប្រព័ន្ធផ្កាយរណប ឬខ្លះទៀតឃើញដោយភ្នែកទទេ ហើយភាគច្រើនសង្កេតឃើញដោយអ្នកបើកយន្តហោះចម្បាំងក្នុងជួរកងទ័ពជើងទឹកអាមេរិក។
ក្នុងចំណោមបាតុភូតចម្លែកទាំង ១៤៤នោះ មានបាតុភូតតែមួយប៉ុណ្ណោះ ដែលគេអាចកំណត់ប្រភពបានច្បាស់លាស់ថា ជាវត្ថុធម្មតានៅលើភពផែនដីរបស់យើង ចំណែក ១៤៣ផ្សេងទៀត គឺជាបាតុភូតចម្លែក ដែលគេមិនអាចបកស្រាយបាន ហើយគេក៏មិនមានទិន្នន័យគ្រប់គ្រាន់ ដើម្បីកំណត់បានជាក់លាក់ អំពីប្រភពរបស់វានោះដែរ ដោយវាអាចជាបាតុភូតដែលកើតឡើងពីភាពមិនប្រក្រតីនៃប្រព័ន្ធរ៉ាដា, ភាពមិនប្រក្រតីនៅក្នុងស្រទាប់បរិយាកាស, អាចជាបច្ចេកវិទ្យាពីចិន រុស្ស៊ី ឬប្រទេសណាមួយផ្សេងទៀតដែលអាមេរិកមិនទាន់ស្គាល់ ឬក៏អាចជាអ្វីផ្សេងទៀត។
ទាក់ទងនឹងភស្តុតាងមនុស្សក្រៅភព ដែលគេទន្ទឹងរង់ចាំមើលនោះ របាយការណ៍ចារកិច្ចអាមេរិកបានសន្និដ្ឋានថា ទិន្នន័យដែលគេមាននៅក្នុងដៃ ចេញពីការសង្កេតឃើញបាតុភូតចម្លែកទាំង ១៤៣នេះ មិនមានអ្វីដែលអាចជាភស្តុតាងបញ្ជាក់ច្បាស់លាស់ថា គឺជាមនុស្សក្រៅភពនោះទេ តែក្នុងពេលជាមួយគ្នា គេក៏មិនអាចកំណត់បានច្បាស់លាស់នោះដែរថា វាមិនមែនជាមនុស្សក្រៅភព។
និយាយជារួមមកវិញ អ្នកដែលរំពឹងថា របាយការណ៍ចារកិច្ចអាមេរិកនេះ អាចនឹងដោះស្រាយចម្ងល់ បំបែកអាថ៌កំបាំងជុំវិញមនុស្សក្រៅភពនោះ ប្រាកដជាត្រូវខកចិត្តមិនតិចនោះទេ ហើយតាមការពិតទៅ របាយការណ៍នេះ វាបង្កើតជាសំណួរច្រើនជាងផ្តល់ចម្លើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ