អ៊ីដ្រូសែន៖ តារាកំពុងរះនៅក្នុងពិភពសេដ្ឋកិច្ចបៃតង
ចុះផ្សាយនៅថ្ងៃ៖
ស្តាប់ - ០៥:២៧
នៅក្នុងសម័យកាលដែលពិភពលោកកំពុងប្រឈមនឹងការប្រែប្រួលអាកាសធាតុ ការស្វែងរកប្រភពថាមពល ដែលមិនបញ្ចេញឧស្ម័នកាបូនិច គឺជាអាទិភាពដ៏ចម្បងមួយ ដើម្បីធ្វើយ៉ាងណាទប់ស្កាត់កុំឲ្យភពផែនដីឡើងកម្តៅលើសពី២អង្សា នៅត្រឹមដំណាច់សតវត្សរ៍ទី២១នេះ។ នៅក្នុងការវិនិយោគលើប្រភពថាមពលបៃតងនេះ ជាទូទៅ យើងតែងតែឮគេនិយាយអំពីថាមពលវារីអគ្គិសនី ថាមពលខ្យល់ និងថាមពលព្រះអាទិត្យ។ ក៏ប៉ុន្តែ នៅក្នុងពេលបច្ចុប្បន្ននេះ គេឃើញមានប្រភពថាមពលបៃតងដ៏សំខាន់មួយទៀត ដែលកំពុងតែលេចធ្លោ ហើយដែលបណ្តាប្រទេសជាច្រើននៅទូទាំងពិភពលោកកំពុងចាប់អារម្មណ៍ គឺអ៊ីដ្រូសែន។
នៅក្នុងប្រវត្តិមនុស្សជាតិយើង យុគថ្មរំលីងបានបញ្ចប់មិនមែនដោយសារតែលែងមានថ្មនោះទេ ក៏ប៉ុន្តែ គឺដោយសារតែមនុស្សយើងអាចស្វែងរកវិធីផ្សេងមកផលិតឧបករណ៍ប្រើប្រាស់ ជំនួសឲ្យការរំលីងថ្ម។
នៅក្នុងសម័យកាលបច្ចុប្បន្ននេះ ក្រោយពីត្រូវពឹងផ្អែកខ្លាំងលើថាមពលផូស៊ីល រួមមានដូចជា ប្រេង និងធ្យូងថ្ម អស់រយៈពេលជាច្រើនសតវត្សរ៍កន្លងទៅនេះ មនុស្សយើងក៏កំពុងដើរមកដល់ចំណុចរបត់ដ៏សំខាន់មួយផងដែរ គឺធ្វើយ៉ាងណាស្វែងរកប្រភពថាមពលថ្មី ហើយនេះមិនមែនគ្រាន់តែដោយសារថា ថ្ងៃណាមួយយើងលែងមានថាមពលផូស៊ីលប្រើនោះទេ ក៏ប៉ុន្តែ រឹតតែសំខាន់ និងបន្ទាន់ជាងនេះទៅទៀត គឺដោយសារតែយើងកំពុងតែប្រឈមនឹងគ្រោះថ្នាក់ដ៏ធំមួយ អាចគំរាមកំហែងដល់វត្តមានរបស់មនុស្សជាតិយើងទាំងមូល នៅក្នុងរយៈពេលវែងខាងមុខ គឺការឡើងកម្តៅផែនដី។
គេដឹងថា ថាមពលផូស៊ីល ទោះជាប្រេងកាត ធ្យូងថ្ម ឬឧស្ម័នធម្មជាតិ គឺសុទ្ធសឹងជាប្រភពថាមពល ដែលបញ្ចេញឧស្ម័ននាំឲ្យផែនដីឡើងកម្តៅ។ ហើយគេក៏ទទួលស្គាល់ជាទូទៅផងដែរថា ថាមពលបៃតង (គឺប្រភពថាមពលដែលមិនបញ្ចេញឧស្ម័នកាបូនិច) រួមមាន នុយក្លេអ៊ែរ វារីអគ្គិសនី ថាមពលព្រះអាទិត្យ និងថាមពលខ្យល់ ដែលគេបានអភិវឌ្ឍមកទល់នឹងពេលបច្ចុប្បន្ននេះ គឺនៅមិនទាន់គ្រប់គ្រាន់ ដើម្បីអាចសម្រេចតាមគោលដៅក្នុងការទប់ស្កាត់ការឡើងកម្តៅផែនដីបាននៅឡើយនោះទេ។
ហេតុដូច្នេះហើយបានជានៅពេលនេះ គេនាំគ្នាផ្តោតលើការអភិវឌ្ឍប្រភពថាមពលសំខាន់មួយទៀត គឺអ៊ីដ្រូសែន។
តាមការពិតទៅ អ៊ីដ្រូសែននេះមិនមែនជាប្រភពថាមពលថ្មីនោះទេ គ្រាន់តែថា គិតមកទល់នឹងពេលនេះ ការប្រើថាមពលអ៊ីដ្រូសែននេះ វានៅមានទ្រង់ទ្រាយតូច ដោយសារតែថ្លៃផលិតខ្ពស់ផង និងដោយសារតែខ្វះហេដ្ឋារចនាសម្ព័ន្ធ សម្រាប់ដឹកជញ្ជូន ស្តុក និងចែកចាយអ៊ីដ្រូសែន។ ម្យ៉ាងទៀត អ៊ីដ្រូសែនភាគច្រើនលើសលុបដែលគេប្រើជាប្រភពថាមពល នៅក្នុងពេលបច្ចុប្បន្ននេះ គឺផលិតចេញពីឧស្ម័នធម្មជាតិ ដែលតាមការពិតទៅ វានៅតែមានប្រភពដើមចេញពីថាមពលផូស៊ីល ដែលបញ្ចេញឧស្ម័នកាបូនិចច្រើនដដែល។
ដើម្បីឲ្យអ៊ីដ្រូសែនក្លាយជាប្រភពថាមពលបៃតងពិតប្រាកដ គេចាំបាច់ត្រូវតែបង្កើនប្រសិទ្ធភាពក្នុងការផលិតអ៊ីដ្រូសែនដោយមិនបញ្ចេញឧស្ម័នកាបូនិច ហើយចាំបាច់ត្រូវអភិវឌ្ឍហេដ្ឋារចនាសម្ព័ន្ធ សម្រាប់ដឹកជញ្ជូន ស្តុក និងចែកចាយអ៊ីដ្រូសែន ដើម្បីពង្រីកវិសាលភាពនៃការប្រើប្រាស់អ៊ីដ្រូសែនឲ្យបានទូលំទូលាយ និងទម្លាក់ថ្លៃអ៊ីដ្រូសែនឲ្យមកនៅទាបអាចប្រកួតប្រជែងជាមួយថាមពលផូស៊ីលបាន។
ទាំងនេះហើយជាគោលដៅវិនិយោគ ដែលប្រទេសជាច្រើនបានដាក់ចេញ ជាពិសេស បណ្តាប្រទេសមហាអំណាចសេដ្ឋកិច្ច រួមមានសហរដ្ឋអាមេរិក ចិន ជប៉ុន អង់គ្លេស និងបណ្តាប្រទេសក្នុងសហភាពអឺរ៉ុប។
សហភាពអឺរ៉ុប ដែលបានដាក់គោលដៅរួមថា នឹងកាត់បន្ថយការបញ្ចេញឧស្ម័នកាបូនិចឲ្យដល់កម្រិតសូន្យ ឬហ្សេរ៉ូកាបោន នៅត្រឹមឆ្នាំ២០៥០នោះ បានកំណត់យកអ៊ីដ្រូសែនជាប្រភពថាមពលជំនួសដ៏ចម្បងមួយ ដោយគ្រោងបង្កើនអត្រាថាមពលអ៊ីដ្រូសែនប្រើប្រាស់ក្នុងសហភាពអឺរ៉ុប ដែលបច្ចុប្បន្នមានត្រឹម ២% ឲ្យកើនឡើងដល់ ១២%-១៤% នៅឆ្នាំ២០៥០ខាងមុខ។ នៅក្នុងចំណោមប្រទេសសមាជិកសហភាពអឺរ៉ុបនេះ គេឃើញថា អាល្លឺម៉ង់បានប្រកាសឲ្យដឹង ពីការត្រៀមកញ្ចប់ថវិកាចំនួន ៩ពាន់លានអឺរ៉ូ ដើម្បីវិនិយោគក្នុងវិស័យថាមពលអ៊ីដ្រូសែន ពីពេលនេះ ដល់ឆ្នាំ២០៣០ខាងមុខ ចំណែកបារាំង គ្រោងវិនិយោគ ៧ពាន់លានអឺរូ។
នៅក្នុងតំបន់អាស៊ី ជប៉ុន ដែលជាប្រទេសមានតម្រូវការថាមពលខ្ពស់ ហើយដែលកំពុងរកផ្លូវចេញពីនុយក្លេអ៊ែរក្រោយគ្រោះមហន្តរាយនៅហ្វូគូស្ហ៊ីម៉ានោះ គ្រោងវិនិយោគ ៣ពាន់លានដុល្លារ ក្នុងវិស័យអ៊ីដ្រូសែន ចំណែកចិនវិញគ្រោងវិនិយោគរហូតដល់ទៅ ១៦ពាន់លានដុល្លារ។
គេដឹងថា បច្ចុប្បន្ននេះ ចិនគឺជាប្រទេសបញ្ចេញឧស្ម័នកាបូនិចច្រើនជាងគេលំដាប់ទី១ នៅលើពិភពលោក ក៏ប៉ុន្តែ កន្លងមក លោកស៊ី ជីនពីង ធ្លាប់បានប្រកាសសន្យាថា ចិននឹងកាត់បន្ថយការបញ្ចេញឧស្ម័នកាបូនិចនេះឲ្យបានមុនឆ្នាំ២០៣០ ហើយកាត់បន្ថយឲ្យធ្លាក់មកដល់កម្រិតសូន្យ ឬហ្សេរ៉ូកាបោន នៅត្រឹមឆ្នាំ២០៦០។
ជាមួយនឹងកំណើនសេដ្ឋកិច្ច ដែលមានអត្រាខ្ពស់ជាប់ជាប្រចាំ វាគឺជារឿងចាំបាច់ ដែលចិនត្រូវរកប្រភពថាមពលថ្មីឲ្យបានច្រើន មកជំនួសថាមពលផូស៊ីល ដើម្បីអាចកាត់បន្ថយការបញ្ចេញឧស្ម័នកាបូនិចបានតាមគោលដៅ ដោយមិនឲ្យប៉ះពាល់ទៅដល់ការផ្គត់ផ្គង់ថាមពលចាំបាច់សម្រាប់សកម្មភាពសេដ្ឋកិច្ច។
តាមការពិតទៅ នៅក្នុងពេលបច្ចុប្បន្ននេះ ចិនគឺជាប្រទេសឈានមុខគេរួចទៅហើយ ខាងថាមពលអ៊ីដ្រូសែន ដោយចិនជាប់ចំណាត់ថ្នាក់ជាប្រទេសផលិតអ៊ីដ្រូសែនច្រើនជាងគេបំផុតលំដាប់ទី១ នៅលើពិភពលោក ក៏ប៉ុន្តែ បញ្ហាគឺនៅត្រង់ថា ការផលិតអ៊ីដ្រូសែននៅចិន ភាគច្រើនលើសលុប គឺផលិតចេញពីឧស្ម័នធម្មជាតិ ដែលបញ្ចេញឧស្ម័នកាបូនិចច្រើន។ ហេតុដូច្នេះហើយបានជា នៅក្នុងកញ្ចប់ថវិកា ១៦ពាន់លានដុល្លារ ដែលចិនគ្រោងវិនិយោគ គឺនឹងត្រូវផ្តោតអាទិភាព ទៅលើការអភិវឌ្ឍបច្ចេកវិទ្យាផលិតអ៊ីដ្រូសែនដែលមិនបញ្ចេញឧស្ម័នកាបូនិច ដែលគេហៅជាទូទៅថា « អ៊ីដ្រូសែនបៃតង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ