លោកជែហ្វ បេសូស៍៖ បង្កើត Amazon ចេញពីរោងដាក់ឡានរហូតក្លាយជាមហាសេដ្ឋីពិភពលោក
ចុះផ្សាយនៅថ្ងៃ៖
ស្តាប់ - ០៤:៤៤
លោក ជែហ្វ បេសូស៍ (Jeff Bezos) ទើបនឹងប្រកាស កាលពីថ្ងៃអង្គារកន្លងទៅនេះថា នៅក្នុងឆ្នាំនេះ លោកនឹងលាឈប់ពីតំណែងជាអគ្គនាយក ហើយដកខ្លួនថយចេញពីការគ្រប់គ្រងការងារប្រចាំថ្ងៃរបស់ក្រុមហ៊ុន Amazon។ ក្រុមហ៊ុន ដែលលោកបានបង្កើតឡើង ដំបូងពីរោងដាក់ឡាន រហូតក្លាយជាក្រុមហ៊ុនដ៏ធំបំផុតមួយ នៅក្នុងវិស័យបច្ចេកវិទ្យា High-Tech នាពេលបច្ចុប្បន្ននេះ។
លោក ជែហ្វ បេសូស៍ បច្ចុប្បន្ន គឺជាមហាសេដ្ឋីកំពូលលំដាប់ពិភពលោក ដោយស្ថិតនៅប្រកៀកប្រកិតគ្នាជាមួយនឹងលោក អេឡន ម៉ាសក៍ នាយកក្រុមហ៊ុន Tesla និង SpaceX។ ហើយក្នុងវ័យទើបនឹង ៥៧ឆ្នាំ ការប្រកាសលាឈប់ពីតំណែងជាអគ្គនាយកក្រុមហ៊ុន Amazon របស់លោកបេសូស៍ គឺជារឿងដ៏ភ្ញាក់ផ្អើលមួយ ដែលគេមិនរំពឹងទុក ក៏ប៉ុន្តែ បើទោះជាលែងកាន់តំណែងជាអគ្គនាយកក៏ពិតមែន ក៏ប៉ុន្តែ លោកបេសូស៍នឹងមិនចាកចេញពី Amazon ទាំងស្រុងនោះទេ ដោយនៅបន្តធ្វើជាប្រធានក្រុមប្រឹក្សាភិបាលក្រុមហ៊ុនដដែល។
លោកបេសូស៍ ដែលបានបញ្ចប់ការសិក្សាផ្នែកវិទ្យាសាស្រ្តកុំព្យូទ័រ និងអេឡិចត្រូនិច ពីសកលវិទ្យាល័យដ៏ល្បីល្បាញមួយនៅអាមេរិក គឺសកលវិទ្យាល័យព្រីនស្តុន (Princeton) ធ្លាប់បានចំណាយពេលជាច្រើនឆ្នាំធ្វើការ នៅក្នុងវិស័យហិរញ្ញវត្ថុ នៅឯ Wall Street។ នៅពេលដែលបដិវត្តន៍អ៊ីនធ័រនែតចាប់ផ្តើមឡើង នៅដើមទសវត្សរ៍ឆ្នាំ៩០ លោកបេសូស៍បានបែកគំនិតចង់បង្កើតក្រុមហ៊ុនផ្ទាល់ខ្លួនឯងមួយ ដើម្បីរកស៊ីក្នុងវិស័យអ៊ីនធ័រនែត។ លោកក៏បានបោះបង់ចោលការងារដ៏ស្រណុកសុខស្រួល និងមានប្រាក់ខែខ្ពស់ នៅ Wall Street ហើយចេញទៅបង្កើតក្រុមហ៊ុន Amazon នៅឆ្នាំ១៩៩៤។
នៅពេលបង្កើតក្រុមហ៊ុន Amazon ឡើងដំបូងនោះ លោកបេសូស៍មិនទាំងមានទីតាំងសមរម្យ សម្រាប់ធ្វើជាការិយាល័យនោះផង ដោយធ្វើការចេញពីរោងដាក់ឡាន គឺមិនខុសគ្នាប៉ុន្មាននោះទេ ទៅនឹងពេលដែលលោកស្ទីវ ចប បង្កើតក្រុមហ៊ុន Apple ឡើងជាលើកដំបូង។ បន្ថែមពីលើនេះទៅទៀត នៅពេលបង្កើតឡើងដំបូងនោះ Amazon គ្រាន់តែជាក្រុមហ៊ុនតូចមួយ ដែលរកស៊ីត្រឹមលក់សៀវភៅអនឡាញតែប៉ុណ្ណោះ។
ក៏ប៉ុន្តែ បន្តិចម្តងៗ Amazon បានពង្រីកទីផ្សាររបស់ខ្លួន គឺពង្រីកទាំងវិសាលភាពនៃអតិថិជនជាលក្ខណៈអន្តរជាតិ និងពង្រីកទាំងផលិតផល ដោយចេញពីការលក់សៀវភៅ ជាលក្ខណៈបណ្ណាគារអនឡាញ រហូតក្លាយជាក្រុមហ៊ុនដ៏ធំមួយ ដែលលក់ផលិតផលគ្រប់ប្រភេទ រាប់ចាប់តាំងពីឧបករណ៍អេឡិចត្រូនិច រហូតទៅដល់សម្លៀកបំពាក់ និងចំណីអាហារ។
មែនទែនទៅ Amazon បច្ចុប្បន្ននេះ មិនមែនគ្រាន់តែជាក្រុមហ៊ុនដែលមានមុខជំនួញលក់ទំនិញអនឡាញនេះតែមួយមុខនេះនោះទេ ក៏ប៉ុន្តែ នៅមានមុខជំនួញជាច្រើនផ្សេងទៀត ជាពិសេស គឺ Amazon Web Service ដែលរកស៊ីខាងផ្តល់សេវាកម្មវេបសាយ (Cloud Business) ហើយដែលជាប្រភពប្រាក់ចំណេញដ៏ធំបំផុតរបស់ Amazon គឺផ្តល់ប្រាក់ចំណេញច្រើនជាងការលក់ទំនិញអនឡាញទៅទៀត។ គឺនាយកគ្រប់គ្រងAmazon Web Service នេះហើយ ដែលនឹងត្រូវឡើងមកកាន់តំណែងជាអគ្គនាយក Amazon ជំនួសលោកជែហ្វ បេសូស៍។
បច្ចុប្បន្ន Amazon ជាក្រុមហ៊ុនដែលមានតម្លៃរហូតដល់ទៅ ១,៦ ទ្រីលាន (១,៦ លានលានដុល្លារ) ពោលគឺស្ថិតក្នុងចំណោមក្រុមហ៊ុន High-Tech ដ៏មានតម្លៃខ្ពស់បំផុតនៅលើពិភពលោក រួមជាមួយនឹងក្រុមហ៊ុន Google, Apple និង Microsoft។ ចំណែកលោក ជែហ្វ បេសូស៍ វិញ គឺជាមហាសេដ្ឋី ដែលមានទ្រព្យសម្បត្តិរហូតដល់ទៅជិត ២០០ពាន់លានដុល្លារ។
នៅពីក្រោយជោគជ័យនេះ លោកជែហ្វ បេសូស៍ ក្រៅពីជាមនុស្សដែលហ៊ានបោះទុនរកស៊ីដោយមិនខ្លាចបរាជ័យ នៅមានយុទ្ធសាស្រ្តជំនួញដ៏សំខាន់មួយទៀត ដែលគេស្គាល់ជាទូទៅ ហើយដែលពេលខ្លះគេតែងហៅថា « Method Bezos » គឺយុទ្ធសាស្រ្តទម្លាក់តម្លៃសុខចិត្តលក់ខាត ធ្វើយ៉ាងណាអាចសម្លាប់គូប្រជែង ដើម្បីដណ្តើមចំណែកទីផ្សារ ស្វែងរកប្រាក់ចំណេញ នៅក្នុងរយៈពេលវែងទៅមុខ។
បន្ថែមពីលើនេះទៅទៀត នៅក្នុងក្រុមហ៊ុន Amazon លោកបេសូស៍ក៏ត្រូវបានគេកត់សម្គាល់លើចំណុចពិសេសមួយទៀតផងដែរ គឺលោកជាអ្នកជំនួញ ដែលផ្តោតការយកចិត្តទុកដាក់ខ្លាំងបំផុតទៅលើអតិថិជន ក៏ប៉ុន្តែ ក្នុងពេលជាមួយគ្នា ខ្វះការយកចិត្តទុកដាក់ទៅលើបុគ្គលិករបស់ខ្លួនឯង ដោយជារឿយៗ គេតែងតែឃើញមានការតវ៉ា អំពីប្រាក់ឈ្នួល ក៏ដូចជា អំពីលក្ខខណ្ឌការងាររបស់បុគ្គលិក Amazon។
នៅពេលនេះ លោក ជែហ្វ បេសូស៍ លាឈប់ពីមុខតំណែងជាអគ្គនាយកក្រុមហ៊ុន Amazon ក៏ប៉ុន្តែ ក្នុងវ័យ ៥៧ឆ្នាំ លោកក៏មិនប្រាកដថាជាការចូលនិវត្តន៍នោះដែរ ពីព្រោះថា ក្រៅតែពីស្ថិតនៅជាប្រធានក្រុមប្រឹក្សាភិបាលរបស់ Amazon លោកបេសូស៍ នៅមានមុខជំនួញធំៗជាច្រើនផ្សេងទៀត ជាពិសេស លោកគឺជាម្ចាស់កាសែតដ៏ល្បីល្បាញមួយនៅអាមេរិក គឺកាសែត The Washington Post និងជាម្ចាស់ក្រុមហ៊ុនអវកាសដ៏សំខាន់មួយ គឺក្រុមហ៊ុន Blue Origin ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ