តើរបបលោកស៊ី ជីនពីងកំពុងចាត់វិធានការប្រឆាំងនឹងលោកជេក ម៉ា?
ចុះផ្សាយនៅថ្ងៃ៖
ស្តាប់ - ០៤:១៧
ទំនាក់ទំនងរវាងលោកជេក ម៉ា ដែលជាមហាសេដ្ឋីដ៏ល្បីឈ្មោះរបស់ចិន និងមេដឹកនាំក្រុងប៉េកាំងលោកស៊ី ជីនពីង ហាក់ធ្លាក់ក្នុងភាពស្មុគស្មាញនាពេលថ្មីៗនេះ។ ក្រោយប្រព័ន្ធផ្សព្វផ្សាយរដ្ឋបានលាតត្រដាងពីសមាសភាពរបស់លោកជេក ម៉ា ថាជាសមាជិកម្នាក់នៃបក្សកុម្មុយនិស្តចិន ក្រុមអ្នកវិភាគយល់ឃើញថាស្ថាបនិកក្រុមហ៊ុនអាលីបាបារូបនេះ កាន់តែមានមុខលេចធ្លោនៅក្នុងជួរនយោបាយចិន។ ប៉ុន្តែ គេមានការភ្ញាក់ផ្អើលជាខ្លាំងនៅពេលបានឮអំពីសេចក្តីប្រកាសបើកការអង្កេតប្រឆាំងនឹងក្រុមហ៊ុនអាលីបាបាពីសំណាក់អាជ្ងាធរចិនកាលពីថ្ងៃទី ២៤ ធ្នូកន្លងទៅនេះ។ តើមានអាថ៌កំបាំងអ្វីនៅពីក្រោយការស៊ើបអង្កេតរបស់អាជ្ញាធរក្រុងប៉េកាំងលើក្រុមហ៊ុនអាលីបាបា? តើក្រុមហ៊ុនអាលីបាបា គឺជាការគំរាមកំហែងចំពោះអំណាចបក្សកុម្មុយនិស្តចិនឬ?
ជាច្រើនឆ្នាំមកហើយដែលមហាសេដ្ឋីបច្ចេកវិទ្យាមានបំផុតចិនលោកជេក ម៉ា ត្រូវបានគេចាត់ទុកថាជានិមិត្តរូបនៃភាពជោគជ័យនៅក្នុងប្រទេសចិន និងជាបុគ្គលដ៏គំរូមួយរូប។
ចាប់កំណើតនៅក្នុងទីក្រុងហង់ចូដែលជាទីក្រុងមួយដ៏ស្រស់ត្រកាលរបស់ចិន កុមារជេក ម៉ា មានឱកាសរៀន និងនិយាយភាសាអង់គ្លេសជាមួយភ្ញៀវទេសចរបរទេសដែលទៅលេងស្រុកកំណើតរបស់ខ្លួនមុនពេលចូលរៀនភាសានៅឯសាកលវិទ្យាល័យទៅទៀត។ ក្រោយបានបញ្ចប់ការសិក្សាអំពីផ្នែកបច្ចេកវិទ្យាអ៊ីនធ័រនែតនៅអាមេរិក ក្នុងឆ្នាំ ១៩៩៩ លោកបានវិលត្រឡប់ទៅស្រុកកំណើតក្នុងប្រទេសចិនវិញ និងបានបង្កើតក្រុមហ៊ុនអាលីបាបាឡើង។
បច្ចុប្បន្ននេះ សម្ព័ន្ធក្រុមហ៊ុនអាលីបាបាដែលមានប្រាក់ចំណូលប្រចាំឆ្នាំជាង ៧០ ពាន់លានដុល្លារត្រូវបានគេមើលឃើញថាជាអង្គភាពចិនតែមួយគត់ ដែលមានសមត្ថភាពអាចប្រជែងជាមួយក្រុមហ៊ុន Amazon អាមេរិករបស់លោកជេហ្វ បេហ្សូ (Jeff Bezo) បាន។
យ៉ាងណាក៏ដោយ ទំនាក់ទំនងរវាងមហាសេដ្ឋីជេក ម៉ា និងរដ្ឋាភិបាលក្រុងប៉េកាំង ហាក់លេចចេញរូបភាពជូរចត់នៅមួយរយៈពេលចុងក្រោយនេះ។ គេកត់សម្គាល់ឃើញពីសម្ព័ន្ធភាពមិនសូវជាល្អនេះ នៅក្រោយពេលដែលក្រុមមន្រ្តីរដ្ឋាភិបាលចិនដាក់ចេញនូវវិធានការទប់ស្កាត់ការពង្រីកដើមទុនដែលគ្មានការគ្រប់គ្រងត្រឹមត្រូវ ដើម្បីប្រឆាំងនឹងការរកស៊ីផ្តាច់មុខរបស់ក្រុមហ៊ុនណាមួយនៅក្នុងប្រទេស។
អាជ្ញាធរចិន ធ្លាប់បានព្រមានក្រុមហ៊ុនអាលីបាបាអំពីការបង្ខំឲ្យឈ្មួញរកស៊ី ចុះហត្ថលេខាលើកិច្ចព្រមព្រៀងផ្តាច់មុខដែលរារាំងពួកគេពីការផ្គត់ផ្គង់ផលិតផលនៅក្នុង ទីផ្សារដែលមានលក្ខណៈប្រកួតប្រជែង។ ក្រៅតែពីបានប្រកាស បើកការស៊ើបអង្កេតលើក្រុមហ៊ុនអាលីបាបា រដ្ឋាភិបាលក្រុងប៉េកាំង ថែមទាំងបានពន្យារពេលដាក់ចូលទីផ្សារមូលប័ត្ររបស់ក្រុមហ៊ុនហិរញ្ញវត្ថុ (Alibaba's Ant Group) របស់លោកជេក ម៉ាទៀតផង។
ក្រុមអ្នកវិភាគមួយចំនួនយល់ឃើញថាចំណាត់ការផ្ទួនៗគ្នា របស់អាជ្ញាធរក្រុងប៉េកាំងនេះ ហាក់បង្ហាញឲ្យឃើញច្បាស់ថារបបគ្រប់គ្រងរបស់លោកស៊ី ជីនពីង ពិតជាឃ្នើសចិត្តនឹងលោកជេក ម៉ាមែនហើយ។
តើរបបគ្រប់គ្រងរបស់លោកស៊ី ជីនពីងកំពុងចាត់វិធានការប្រឆាំងនឹងលោកជេក ម៉ាមែនឬ?
ការស៊ើបអង្កេតរបស់អាជ្ញាធរចិន លើក្រុមហ៊ុនអាលីបាបា ត្រូវគេបានរាយការណ៍ថាជាលទ្ធផលនៃការអនុវត្តន៍ច្បាប់ប្រឆាំងនឹងការរកស៊ីផ្តាច់មុខ និងដើម្បីការពារការរកស៊ីបែបទីផ្សារប្រកួតប្រជែង។ ក៏ប៉ុន្តែ អ្នកវិភាគខ្លះបានកត់សម្គាល់ថាវាមានហេតុផលមានច្រើនជាងនេះ ពោលគឺច្រើនជាងអ្វីដែលគេមើលនឹងឃើញនៅពីមុខឆាក។
មានអាយុ ៥៦ ឆ្នាំ មហាសេដ្ឋីបច្ចេកវិទ្យាល្បីឈ្មោះជេក ម៉ា ក៏ជាសមាជិកម្នាក់ដែររបស់បក្សកុម្មុយនិស្តចិន។ លោក ត្រូវបានសារព័ត៌មានរដ្ឋចិន ផ្សព្វផ្សាយពីសមាជិកភាពរបស់លោកក្នុងជួរបក្សក្នុងឆ្នាំ ២០១៨។ ជាញឹកញយ លោកតែងតែបង្ហាញពីការគាំទ្ររបស់លោកចំពោះបក្ស។
ក្នុងនាមជាសមាជិកនៃបក្សកុម្មុយនិស្តចិន លោកម៉ា ត្រូវបង្ហាញភាពស្មោះត្រង់ជាដាច់ខាតចំពោះរបៀបដឹកនាំរបស់បក្ស។ ប៉ុន្តែនាពេលថ្មីៗនេះ គេកត់សម្គាល់ឃើញថា សហគ្រិនរូបនេះ ហាក់បង្ហាញពីគោលគំនិត មិនស្របទៅតាមគណៈកម្មាធិការកណ្តាលរបស់បក្សដែលដឹកនាំដោយលោកប្រធានាធិបតីស៊ី ជីនពីងឡើយ។
ជាក់ស្តែង បើតាមព័ត៌មានចុះផ្សាយដោយកាសែតជប៉ុន The Nikkei នៅពេលថ្លែងក្នុងសន្និសីទស្តីអំពីហិរញ្ញវត្ថុនៅទីក្រុងសៀងហៃ កាលពីថ្ងៃទី ២៤ ខែតុលា លោកម៉ាបានរិះគន់សមាជិកសភាប្រជាជនចិន ដោយលើកឡើងថាច្បាប់ហិរញ្ញវត្ថុ កំពុងទាញភាពភាពជឿនលឿននៃបច្ចេកវិទ្យាឲ្យដើរធ្លាក់ចូលផ្លូវគ្រហិកគ្រហុក។
ក្រៅពីនេះ ការអធិប្បាយមួយដាច់ទៀតផ្សេងទៀតរបស់លោកជេក ម៉ា ដែលគេកត់សម្គាល់ថា បានធ្វើឲ្យថ្នាក់ដឹកនាំចិនក្តៅស្លឹកត្រចៀកខ្លាំងជាងមុននោះ គឺនៅឯពិព័រណ៌ពាណិជ្ជកម្មមួយកាលពីដើមខែវិច្ឆិកាកន្លងទៅ។
គ្រានោះលោកមានប្រសាសន៍ថាបើតាមគំនិតផ្ទាល់ខ្លួន លោកគិតថា រដ្ឋាភិបាលចិនគួរធ្វើអ្វីដែលរដ្ឋាភិបាលគួរធ្វើ ហើយក្រុមហ៊ុនគួរធ្វើអ្វី ដែលខ្លួនគួរធ្វើ។
មតិយោបល់របស់លោកជេក ម៉ាបែបនេះ ប្រាកដណាស់នឹងត្រូវក្រុមមន្ត្រីចិនយកទៅរាយការណ៍ប្រាប់ថ្នាក់ដឹកនាំកំពូល ហើយវាច្បាស់ណាស់ថា សម្តីទាំងនោះបានធ្វើឲ្យលោកស៊ី ដែលជាក្បាលម៉ាស៊ីនដឹកនាំប្រទេសមិនសប្បាយចិត្តឡើយ។ ភ្លាមៗបន្ទាប់មក គេឃើញចំណាត់ការរបស់អាជ្ញាធរចិន ប្រឆាំងទៅនឹងសម្ព័ន្ធក្រុមហ៊ុនអាលីបាបារបស់លោកជេក ម៉ា ធ្លាក់មកជាបន្តបន្ទាប់គ្នានៅចុងឆ្នាំ២០២០នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ