លោកអូបាម៉ា រៀបរាប់ពីជីវិតនិងបទពិសោធន៍ នៅក្នុងសៀវភៅ « A Promised Land »
ចុះផ្សាយនៅថ្ងៃ៖
ស្តាប់ - ០៨:៤៦
លោកបារ៉ាក់ អូបាម៉ា អតីតប្រធានាធិបតីសហរដ្ឋអាមេរិក បានសរសេរសៀវភៅមួយក្បាល មានចំណងជើងជាភាសាអង់គ្លេសថា « A Promised Land »។ ជាសៀវភៅដែលលោកបានសរសេរអស់រយៈពេលជាង៣ឆ្នាំ ដែលរៀបរាប់ពីដំណើរជីវិតផ្ទាល់ខ្លួន ព្រមទាំងបទពិសោធន៍ការងារ និងនយោបាយរបស់លោក ក្នុងនាមជាប្រធានាធិបតីស្បែកខ្មៅ ដំបូងគេបង្អស់ នៃសហរដ្ឋអាមេរិក។ រហូតមកទល់ពេលនេះ លោកអូបាម៉ា នៅតែមានប្រជាប្រិយភាពយ៉ាងខ្លាំង នៅទូទាំងពិភពលោក ហើយសៀវភៅរបស់លោក ត្រូវបានបោះពុម្ពផ្សាយ ជាច្រើនភាសា។
ពេញមួយសប្តាហ៍កន្លងមកនេះ ឈ្មោះលោកបារ៉ាក់ អូបាម៉ា មាននៅសឹងតែគ្រប់បណ្តាញផ្សព្វផ្សាយព័ត៌មានអាមេរិក និងនៅអឺរ៉ុប។ មិនថាវិទ្យុ ទូរទស្សន៍ និងបណ្ណាធិការធំៗនៅទូទាំងពិភពលោក បានដណ្តើមគ្នា អញ្ជើញលោកអូបាម៉ា ឲ្យផ្តល់បទសម្ភាសន៍ ស្តីពីសៀវភៅ ដែលលោកទើបតែចេញផ្សាយ។
"A Promised Land" ជាសៀវភៅ ដែលលោកអូបាម៉ា បានចំណាយពេលសរសេរ រយៈពេល៣ឆ្នាំ៨ខែ។ មានកម្រាស់ប្រមាណជិត៨០០ទំព័រ សៀវភៅនេះ គ្រាន់តែជាភាគទី១ប៉ុណ្ណោះ។ ភាគទី២ ដែលលោកកំពុងតែសរសេរបន្ត នឹងត្រូវបោះពុម្ពផ្សាយនាពេលខាងមុខ។ គ្រាន់តែចេញលក់នៅថ្ងៃទី១ សៀវភៅនេះ ត្រូវបានលក់ដាច់អស់ ដល់ទៅប្រមាណ៩សែនក្បាល។
នៅក្នុងសៀវភៅនេះ លោកអូបាម៉ា បានជ្រើសរើស ចាប់ផ្តើមសរសេរ អំពីពេលវេលាដ៏សំខាន់បំផុតរបស់លោក គឺឱកាសដែលលោកបានជួបគ្នាដំបូង ជាមួយភរិយាលោក គឺលោកស្រី មីឈែល អូបាម៉ា នៅទីក្រុងឈីកាហ្គោ នៅឆ្នាំ១៩៨៩។ ចំណែកនៅចុងបញ្ចប់នៃសៀវភៅ លោកបានទំលាក់ប៉ាកាចុះ បន្ទាប់ពីបានសរសេររៀបរាប់អំពី បេសកកម្មសម្លាប់មេក្លោងក្រុមតាលីបង់ អ៊ូសាម៉ា ប៊ីនឡាដិន ថ្ងៃទី១ ឧសភា ឆ្នាំ២០១១។ ជាបេសកកម្មដែលលោកបានតាមដាន ដោយយកចិត្តទុកដាក់បំផុតពីសេតវិមាន ជាមួយក្រុមជំនាញយោធា ហើយដែលលោកបានទទួលស្គាល់ថា ជាការសម្រេចចិត្តដ៏លំបាកមួយ នៅក្នុងបទពិសោធន៍ការងាររបស់លោក។
ពីមួយទំព័រទៅមួយទំព័រ លោកអូបាម៉ា បានរៀបរាប់ រំលឹក និងស្រង់វិភាគនូវបទពិសោធន៍របស់លោក ក្នុងនាមជាប្រធានាធិបតី។ លោកទទួលស្គាល់ថា លោកជាមនុស្សដែលប្រយ័ត្នមាត់បំផុត មិននិយាយអ្វីឲ្យលឿនជ្រុលនោះឡើយ។ ហេតុដូច្នេះហើយ បានជាក្នុងចំណោមអតីតប្រធានាធិបតីអាមេរិក គឺរូបលោកត្រូវគេទទួលស្គាល់ថា ជាអ្នកដែលមិនសូវនិយាយផ្តេសផ្តាស់ ឬច្រឡំមាត់ច្រើននោះទេ។ លោកបានអះអាងទៀតថា លោកជាមនុស្សម្នាក់ ដែលមិនចូលចិត្តសង្ស័យ ឬមានមន្ទិលក្នុងចិត្តឡើយ។
លោកអូបាម៉ា បានព្យាយាមចោទសួរខ្លួនឯង ថាមូលហេតុអ្វីបានជាជំរុញឲ្យលោក ឈានជើងចូលក្នុងការប្រកួត ដណ្តើមយកតំណែងប្រធានាធិបតី ទាំងដែលកាលណោះ លោកមានវ័យត្រឹមតែ៤៥ឆ្នាំ ហើយថែមទាំងមានបទពិសោធន៍ក្នុងព្រឹទ្ធសភា មិនទាន់ទាំងបាន៤ឆ្នាំស្រួលបួលផងនោះ។ លោកសួរខ្លួនឯងថា តើវាគ្រាន់តែជាមហិច្ឆិតាផ្ទាល់ខ្លួន ឬក៏មានមូលហេតុអ្វី ស៊ីជំរៅជាងនេះ ដែលកប់ក្នុងមនសិកា ព្រមទាំងក្រឳកបេះដូងរបស់លោក? ឬមួយក៏លោក ចង់បង្ហាញ ឲ្យឪពុករបស់លោក ដែលបានបោះបង់លោកតាំងតែពីអាយុ១០ បានឃើញនឹងភ្នែកថាលោកជាមនុស្សម្នាក់ ដែលមិនអត់ប្រយោជន៍? ឬមួយក៏លោកចង់តបស្នងសងគុណ ចំពោះការប្រឹងប្រែងរបស់ម្តាយលោក ដែលបានបីបាច់ថែរក្សា តម្រង់ផ្លូវឲ្យលោក បានមកដល់ជោគជ័យ? ឬមួយក៏លោកចង់យកឈ្នះ ភាពទន់ខ្សោយ ដែលបានកើតមកជាកូនកាត់ស្បែកខ្មៅ?
លោកអូបាម៉ា បានទទួលស្គាល់ថា ក្រោយចូលកាន់តំណែងបានប៉ុន្មានខែ លោកចាប់ផ្តើមដឹងខ្លួន ថាលោកមិនមែនជា « អ្នកបដិវត្ត » ទេ តែលោកគឺជា « មនុស្សដែលចង់ធ្វើកំណែទម្រង់ »។ លោកអះអាងថា នេះគឺជាចរិកលក្ខណៈនយោបាយដ៏សំខាន់បំផុត របស់លោក។ នៅឆ្នាំទី២នៃអាណត្តិទីមួយរបស់លោក លោកតែងតែយល់សប្តិ ជាញឹកញាប់ ឃើញថាលោក ដើរតាមផ្លូវស្ងាត់ ក្នុងទីក្រុងមួយ។ អ្វីដែលចំលែកបំផុត ក្នុងសុបិននេះ គឺមនុស្សគ្រប់គ្នា គ្មាននរណាមើលមកលោក ឬក៏ស្គាល់ថាលោកជានរណាឡើយ។ ត្រង់ចំណុចនេះ អ្នកនិពន្ធជនជាតិនីហ្សេរីយ៉ាដ៏ល្បីម្នាក់ ឈ្មោះ Chimamanda Ngozi Adichie បានលើកឡើងនៅក្នុងកាសែត New York Times ថា៖ គឺដោយសារលោកអូបាម៉ា ជាមនុស្សដែលសំឡឹង មើលខ្លួនឯងជានិច្ច ថាខ្លួនកំពុងតែធ្វើអ្វី។
លោកអូបាម៉ា បានសរសេររៀបរាប់ផងដែរ អំពីការហាត់រៀនអំពីប្រូតូកូលយោធា និងប្រូតូកូលផ្លូវការនានា នៅពេលចាប់ផ្តើមចូលកាន់តំណែងដំបូង។ ក្រៅពីនេះទៀត លោកបានរៀបរាប់ អំពីការចាត់ចែងការចំណាយផ្ទាល់ខ្លួន ក្នុងនាមក្រុមគ្រួសារលោក ដែលរស់នៅសេតវិមាន។ មុខតំណែងប្រធានាធិបតី អនុញ្ញាតឲ្យលោកនឹងក្រុមគ្រួសារ ស្នាក់នៅនិងហូបចុកនៅសេតវិមានដោយឥតគិតថ្លៃមែនពិត តែការចំណាយលើទំនិញប្រើប្រាស់ផ្ទាល់ខ្លួន គឺជាប្រាក់ផ្ទាល់ខ្លួនរបស់លោក ជាក់ស្តែងដូចជាការចំណាយទិញសាប៊ូ ទិញថ្នាំដុសធ្មេញ ឬក្រដាសបង្គន់ជាដើម។
តាមរយៈពាក្យពេចន៍សំណេរ លោកអូបាម៉ា បានចាត់ទុកខ្លួនថា គឺជាមនុស្សកណ្តាលនិយម ជាមនុស្សដែលចូលចិត្តការសម្របសម្រួល ផ្សះផ្សារ និងព្យាយាមយល់ពីគ្រប់ភាគីទាំងអស់ ដោយចង់ចៀសឲ្យបាន ពីការប្រឈមមុខដាក់គ្នា។ ក្នុងនាមជាស្វាមី ជាឪពុក និងជាប្រធានាធិបតីស្បែកខ្មៅ លោកតែងតែចាំទុកក្នុងចិត្តជានិច្ច ថាលោកត្រូវតែអត់ធ្មត់ មិនបញ្ចេញកំហឹងក្រេវក្រោធ មិនបង្ហាញអាក្បកិរិយាច្រង៉េងច្រង៉ាង ដើម្បីកុំឲ្យមនុស្សដែលអង្គុយចាំតែរិះគន់លោក គេនិយាយថាលោក ជា « មនុស្សស្បែកខ្មៅហឹង្សា » នោះឡើយ។
ទន្ទឹមនឹងនេះ លោកក៏បានទទួលស្គាល់ថា ចរិកលក្ខណៈចង់ផ្សះផ្សារ ចង់សម្របសម្រួលរបស់លោកនេះ ក៏ជាភាពល្ងង់ឆោតរបស់លោកមួយដែរ ព្រោះការពិត នៅក្នុងឆាកនយោបាយ និងជាពិសេសនៅក្នុងការងារដឹកនាំ និងសម្រេចនានា ក្នុងនាមជាប្រធានាធិបតី គឺត្រូវតែហ៊ានអារកាត់ ចំណែកក្រុមម្ខាងទៀតដែលចាំប្រឆាំងជំទាស់ មិនបន្ធូរដៃឲ្យឡើយ។
ក្នុងចំណោមបទពិសោធន៍ដ៏លំបាក លោកអូបាម៉ា បានរំលឹកអំពី ហេតុការណ៍គ្រោះថ្នាក់ធ្លាយបំពង់បង្ហូរប្រេងឆៅ របស់ក្រុមហ៊ុន BP នៅខែឧសភា ឆ្នាំ២០១០ ក្នុងឈូងសមុទ្រមិកស៊ិកកូ។ វាគឺជាគ្រោះមហន្តរាយដ៏ធំមួយ នៅសហរដ្ឋអាមេរិក ដែលបានបំផ្លាញធនធានធម្មជាតិសមុទ្រ។ លោកអូបាម៉ា បានលើកឡើងថា លោកមានកំហឹងខ្លាំងណាស់ តែលោកព្យាយាមទប់។ លោកខឹងនឹងប្រព័ន្ធសេដ្ឋកិច្ចមូលធននិយម ព្រមទាំងមនុស្សដែលបូមជញ្ជក់ផលប្រយោជន៍ ដោយគ្មានការទទួលខុសត្រូវ ចំពោះធនធានធម្មជាតិដែលជាសម្បតិ្តរួម របស់មនុស្សជាតិ។
ក្នុងចំណោមបទពិសោធន៍ជោគជ័យ ដែលធ្វើឲ្យលោកញញឹម កក់ក្តៅក្នុងចិត្តបំផុតនោះ គឺនៅថ្ងៃដែលច្បាប់ Obama Care ត្រូវបានអនុម័តយល់ព្រមដោយសភាខុសហ្គ្រេស គឺថ្ងៃទី ២១ មីនា ២០១០។ លោកថា លោកសប្បាយចិត្តណាស់ ដែលបានបំពេញការសន្យារបស់លោក ជូនចំពោះប្រជាជនអាមេរិក ដើម្បីអាចមានប្រព័ន្ធធានារ៉ាប់រងសុខភាព ដែលមានតម្លៃថោកសមរម្យ។ វាក៏ជាការសន្យារបស់លោក ជូនចំពោះម្តាយលោក ដែលបានស្លាប់ទាំងវ័យក្មេងដោយជម្ងឺមហារីក បន្ទាប់ពីបានប្រវ៉ាយប្រតប់ជាមួយ ក្រុមអ្នកលក់បណ្ណធានារ៉ាប់រងសុខភាព ដែលមិនព្រមទទួលជួយចំណាយថ្លៃព្យាបាលជម្ងឺ។ នៅថ្ងៃដែលសភាអនុម័តច្បាប់ Obama Care នោះដែរ លោកអូបាម៉ា ក៏បានសម្រេចចិត្តឈប់ជក់បារីជារៀងរហូត បន្ទាប់ពីបានលួចជក់ម្តងម្កាល មិនឲ្យប្រពន្ធកូនឃើញ។
ទាក់ទិននឹងលោក ដូណាល់ ត្រាំ វិញ លោកអូបាម៉ា បានសរសេរលើកឡើងថា លោកដូណាល់ ត្រាំ គឺប្រៀបបីដូចជា ទស្សនីយភាពកំសាន្ត ឬឈុតសម្តែងលើឆាកមួយ ដែលមនុស្សម្នានាំគ្នា អង្គុយតាមមើលសើចសប្បាយ។ លោកថានៅសហរដ្ឋអាមេរិក ទស្សនីយភាព ការសម្តែងឈុតឆាក គឺមានទំរង់ជាអំណាចមួយ ដែលជះឥទ្ធិពលយ៉ាងខ្លាំង ទៅលើការយល់ឃើញរបស់មហាជន។
លោកអូបាម៉ា សរសេរថា មនុស្សដូចលោកដូណាល់ ត្រាំ គឺជាគ្រោះថ្នាក់មួយធំណាស់ ដល់លទ្ធិប្រជាធិបតេយ្យអាមេរិក។ លោកទទួលស្គាល់ថា ការដែលលោក បានក្លាយជាប្រធានាធិបតីស្បែកខ្មៅ បានជាប់ឆ្នោតកាន់តំណែងបាន២អាណត្តិជាប់គ្នា គឺវាហាក់ដូចជាបានទៅដាស់សតិស្មារតី របស់ក្រុមមនុស្សស្បែកស មានគំនិតចាស់គំរិលនិយម ឲ្យភ្ញាក់ឡើង រួមគ្នាធ្វើអ្វីម្យ៉ាង ដើម្បីទប់ស្កាត់ចរន្តប្រែប្រួលនេះ។ គឺកត្តានេះហើយ ដែលបានជួយជំរុញ ឲ្យពួកអ្នកគាំទ្រទ្រឹស្តីគំនិត បែបប្រជាភិថុត ដូចលោកដូណាល់ ត្រាំនេះ បានផុសផុលឡើង។ លោកដូណាល់ ត្រាំ បានទាញយក « ភាពភ័យខ្លាច » របស់ក្រុមមនុស្សមួយចំនួនធំ យកទៅច្នៃធ្វើជានុយនយោបាយ។
តែយ៉ាងណាក៏ដោយ លោកអូបាម៉ា បានលើកឡើងថា លោកមិនទាន់អស់សង្ឃឹមទេ។ លោកថា សហរដ្ឋអាមេរិក គឺប្រៀបបីដូចជា « គំនិត » មួយ ដែលលោកមិនអាចបោះបង់ចោលងាយៗឡើយ។ លោកជឿថា ថ្ងៃណាមួយ សហរដ្ឋអាមេរិក នឹងសម្រេចបាននូវ ការកសាងសង្គមមួយ ដែលឈរលើមូលដ្ឋានពេញលេញ នៃពហុវប្បធម៌និយម ចម្រុះជាតិសាសន៍ និងចម្រុះសាសនា ដោយស្មើភាពគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ