ចិនកំពុងធ្វើឱ្យតម្លៃផលិតផលកសិកម្មឡើងថ្លៃ?
ចុះផ្សាយនៅថ្ងៃ៖
ស្តាប់ - ០៣:៤២
ចិនកំពុងអង្រួនទីផ្សារធញ្ញជាតិ។ ស្រូវសាលី ពោត សណ្តែក... នៅពេលនេះ ប៉េកាំងកំពុងប្រមូលទិញធញ្ញជាតិស្ទើរគ្រប់មុខ និងក្នុងបរិមាណច្រើនមិនធ្លាប់មានទេពីមុនមក។ ជាលទ្ធផល តម្លៃផលិតផលកសិកម្មស្ទុះឡើង តាំងពីតែពីប៉ុន្មានខែមកហើយ។
សម្រាប់អ្នកវិភាគក្នុងវិស័យកសិកម្ម មានជាការិយាល័យវិភាគ Agritel ស្ថានភាពបច្ចុប្បន្នពិតជាពុំធ្លាប់កើតមានពីមុនមកទេ។ សេចក្តីត្រូវការរបស់ចិនផ្នែកធញ្ញជាតិ មានទំហំធំក្រៃ គួរឱ្យភ្ញាក់ផ្អើលណាស់។ តាមទម្លាប់មក និងជាប្រពៃណីចិនត្រូវការ គ្រាប់ធញ្ញជាតិ សណ្តែកខ្លាំងណាស់។ ក្នុងមួយឆ្នាំៗ ប៉េកាំងទិញសណ្តែកជាមធ្យម ៦០%នៃផលិតផលពិភពលោក។ ប៉ុន្តែអ្វីដែលចម្លែកនិងថ្មី គឺឆ្នាំនេះ ចិនក៏ត្រូវការទិញ ស្រូវសាលី ស្រូវអ័ក និងពោត ក្នុងបរិមាណដ៏ច្រើនលើសលុបដែរ។
ជាឧទាហរណ៍ជាក់ស្តែង ចិនដែលតាមធម្មតាអាចដាំដុះពោតបម្រើទីផ្សារក្នុងស្រុកបានយ៉ាងគ្រប់គ្រាន់នោះ ស្រាប់តែបញ្ជាទិញពោតពីបរទេសក្នុងបរិមាណជាង២០លានតោន នៅឆ្នាំនេះ។ អ្នកជំនាញពិតជាងើយឆ្ងល់នឹងការប្តូរផ្លាស់ឥរិយាបថរបស់ចិនយ៉ាងខ្លាំង និងសាកល្បងកាត់យល់ និងផ្តល់ការសន្និដ្ឋានផ្សេងៗ។ ប៉េកាំងទំនងជាត្រៀមលក្ខណៈជាមុន ខ្លាចស្ថានភាពសុខភាពពិភពលោកបង្កឡើងកូវីដ១៩ ទៅបង្អាក់ប្រព័ន្ធស្បៀងអាហារ។ ចិនទំនងប្រឹងបំពេញជង្រុកស្តុកវិញ ព្រោះរវល់មិនបានធ្វើកាលពីដើមឆ្នាំ។ កត្តាមួយទៀត គឺចិន សកម្មភាពចិញ្ចឹមសត្វជ្រូក ដែលងាប់រាលកាលពីពីរឆ្នាំមុនដោយជំងឺគ្រុនជ្រូកទំនងដល់ពេលត្រូវឡើងខ្លាំង ដូច្នេះទើបត្រូវការធញ្ញជាតិច្រើនសម្រាប់ប្រើជាចំណីអាហារសត្វ។
ទោះដោយហេតុផលអ្វី ក៏ឥទ្ធិពលបានស្តែងយ៉ាងជាក់ហើយ។ តាំងពីប៉ុន្មានខែចុងក្រោយមកនេះ តម្លៃគ្រាប់ធញ្ញជាតិ បានឡើងក្រឺតៗ។ កត្តាអាកាសធាតុ ភាពរាំងស្ងួត បានធ្វើឱ្យទិន្នផលកសិកម្ម ដាំដុះពោត សណ្តែក ស្រូវសាលី នៅអឺរ៉ុប អឺរ៉ុបខាងកើត និងនៅអាមេរិក ធ្លាក់ និងបានមកពង្រឹងតម្លៃពោតនិងស្រូវសាលី ឱ្យនៅខ្ពស់ តាំងពីប៉ុន្មានសប្តាហ៍មកហើយ។ ឥលូវត្រូវមកជួបនឹងតម្រូវការដ៏ធំធេងរបស់ចិនទៀត តើឱ្យតម្លៃអាចធ្លាក់ចុះម្តេចទៅកើត។
ក្រៅពីនេះ នៅមានកត្តាមួយទៀត ដែលចូលរួមរក្សាតម្លៃគ្រាប់ធញ្ញជាតិឱ្យនៅខ្ពស់ គឺឥរិយាបថរបស់កសិករ ផលិតករស្រូវសាលីរុស្ស៊ី។ កសិកររុស្ស៊ីភាគច្រើន សុខចិត្តស្តុកទុកទិន្នផលស្រូវសាលីរបស់ខ្លួន ជាជាងបញ្ចេញយកទៅលក់នៅលើផ្សារ ព្រោះពេលនេះ ដោយហេតុតែវិបត្តិប្រេងឥន្ធនៈប្រាក់រូប្លរុស្ស៊ីធ្លាក់ថ្លៃខ្លាំង។
តម្លៃស្រូវសាលី គ្រាប់ធញ្ញជាតិឡើងថ្លៃមែន តែទីផ្សារនេះមិនរងការគំរាមកំហែងខ្វះខាត ឬអស់ទេ។ ថ្វីបើគ្រាប់ធញ្ញជាតិមានតម្លៃខ្ពស់មែន ប៉ុន្តែមិនខ្ពស់ជ្រុលហួសហេតុគួរឱ្យព្រួយបារម្ភឡើយ។ វាស្ថិតនៅជាតម្លៃមធ្យម បើគិតក្នុងរយៈពេល១៥ឆ្នាំចុងក្រោយមកនេះ។ គ្រាន់តែថាសម្រាប់ប្រទេសដែលធ្លាប់តែនាំចូលធញ្ញជាតិច្រើនខ្លាំង ដូចយ៉ាងអេហ្ស៊ីប ឬអាល់ហ្សេរី ស្រូវសាលីឡើងថ្លៃមិនមែនជាដំណឹងទេ ព្រោះពេលនេះប្រទេសកំពុងឆ្លងកាត់ដំណាក់កាលនៃសេដ្ឋកិច្ចដើរបន្ថយល្បឿន និងធ្លាក់ចុះចំណូលព្រមទាំងសមត្ថភាពចាយវាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ