ការដោះលែងសកម្មជន បង្ហាញពីជំហរកម្ពុជាកំពុងដោះស្រាយបញ្ហាផ្ទៃក្នុងក្រោមក្រសែភ្នែកអន្តរជាតិឬ?
ចុះផ្សាយនៅថ្ងៃ៖
ស្តាប់ - ០៤:៥៤
សកម្មជនបរិស្ថាន សង្គម សកម្មជនសិទ្ធិមនុស្ស និងគណបក្សនយោបាយប្រឆាំង ច្រើនជាង១០នាក់ ត្រូវបានអាជ្ញាធរកម្ពុជា ធ្វើការដោះលែងជាបន្តបន្ទាប់ក្នុងរយៈពេលប្រមាណ ២សប្តាហ៍ចុងក្រោយនេះ។ ដោយសារការដោះលែងសកម្មជនទាំងអស់នេះ ជួនពេលនឹងប្រទេសកម្ពុជាត្រូវធ្វើម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុប និងធ្វើជាប្រធានអាស៊ានប្តូរវេននៅឆ្នាំក្រោយ ជាហេតុនាំឲ្យមានការសន្និដ្ឋានថា ការដោះលែងសកម្មជនទាំងអស់នេះ ទំនងជាជាប់ពាក់ព័ន្ធនឹងព្រឹត្តិការណ៍ធំៗ ដែលជាមុខមាត់កម្ពុជា។
គ្រាន់តែឈានចូលដល់ខែ វិច្ឆិកាភា្លម ដំណឹងនៃការដោះលែងសកម្មជននយោបាយបរិស្ថាន និងសង្គម ក៏បានធ្លាយចេញមកដែរ។ សកម្មជនច្រើនជាង១០នាក់ ត្រូវបានអាជ្ញាធរដោះលែង និងគ្រោងដោះលែងជាបន្តបន្ទាប់ ក្នុងនោះមានលោក រ៉ុង ឈុន មេដឹកនាំសហជីពកម្មករ និងគ្រូបង្រៀនផងដែរ។
ដោយហេតុថាសកម្មភាពនៃការដោះលែងសកម្មជន ឬភាសាអ្នកមាននិន្នាការផ្ទុយពីរដ្ឋាភិបាលថា ជាអ្នកទោសមនសិការនោះ ធ្វើឡើងគាប់ជួនប្រទេសកម្ពុជាគ្រោងនឹងបំពេញតួនាទីសំខាន់ជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុប នៅថ្ងៃទី២៥-២៦ ខែវិច្ឆិកានេះ និងត្រូវធ្វើជាប្រធានអាស៊ានប្តូរវេននៅឆ្នាំក្រោយ ជាហេតុនាំឲ្យមានការទាញភ្ជាប់បញ្ហានេះ ទៅនឹងការទទួលខុសត្រូវធំៗរបស់កម្ពុជាទាំងអស់នោះតែម្តង។
ហេតុផលដែលមានការទាញភា្ជប់សកម្មភាពទាំងពីរនេះថាមានការពាក់ព័ន្ធគ្នា គឺដោយសារតែប្រទេសកម្ពុជា ជាទូទៅតែងមានបញ្ហាអរិភាពខាងនយោបាយជាមួយនឹងប្រទេសលោកខាងលិច ដែលឲ្យតម្លៃធំទៅលើលទ្ធិប្រជាធិបតេយ្យ និងសិទ្ធិមនុស្ស។ បញ្ហាដ៏រសើបនេះ កម្ពុជាពិតជាមិនចង់ឃើញ ចង់ឮការរិះគន់ណាមួយ ខណៈដែលប្រទេសនេះ ត្រូវរៀបចំជាលើកដំបូងនូវកិច្ចប្រជុំកំពូលអាស៊ី-អឺរ៉ុប ឬ ASEM-13 នៅចុងខែវិច្ឆិកានេះ។
វត្តមានរបស់ប្រទេសជាដៃគូនៅក្នុងកិច្ចប្រជុំនេះ ត្រូវគេចាត់ទុកថាមានសារៈសំខាន់ បើទោះណាជាកិច្ចប្រជុំនេះធ្វើតាមប្រព័ន្ធអនឡាញក៏ដោយ។ ជាមួយគ្នានេះ កិច្ចប្រជុំដែលរលូន និងចេញបាននូវសេចក្តីថ្លែងការណ៍ ដែលគ្មានភាពចម្រូងចម្រាស់ គឺជាជោគជ័យដ៏ធំមួយផងដែររបស់កម្ពុជា ក្នុងនាមជាអ្នករៀបចំ។
មួយវិញទៀតកាយវិការបស់រដ្ឋាភិបាលនៅពេលនេះ ចង់មិនចង់ក៏ត្រូវគេមើលឃើញថាជាចំណុចដ៏វិជ្ជមានមួយដែរ ដែលនេះជាការបង្ហាញនូវឆន្ទៈ បើកទូលាយសេរីភាព និងលំហរប្រជាធិបតេយ្យមុនកិច្ចប្រជុំ បើទោះណាជាការដោះលែងសកម្មជនជាច្រើននៅពេលនេះ ត្រូវបានរិះគន់ថាស្ថិតនៅក្នុងរង្វង់នៃការឃ្លាំមើលរបស់តុលាការរហូតដល់ទៅ៣ឆ្នាំក៏ដោយ។
ដូចគ្នាដែរ កិច្ចប្រជុំកំពូលអាស៊ាននៅឆ្នាំក្រោយ ដែលមានកម្ពុជាជាប្រធានប្តូរវេននោះ ក៏ត្រូវការចាំបាច់ការគាំទ្រដែរ ជាពិសេសពីបណ្តាប្រទេសនៅក្នុងតំបន់ ដោយហេតុថា ក្នុងតួនាទីជាប្រធាន កម្ពុជាចាំបាច់ត្រូវតែដោះស្រាយបញ្ហាផ្ទៃក្នុងខ្លួនឯងជាមុនសិន មុននឹងឈានទៅលូកសំណុំរឿងធំៗ ដូចជាបញ្ហាភូមា បញ្ហាសមុទ្រចិនខាងត្បូង បញ្ហាជំងឺកូវីដជាដើម។ ជាការពិតសហគមន៍អាស៊ាន មានសរសរស្តុំមួយ ដែលនិយាយពីនយោបាយ និងសន្តិសុខ ពាក់ព័ន្ធទៅនឹងសេរីភាពនៃការបញ្ចេញមតិ សិទ្ធិជាមូលដ្ឋានរបស់ពលរដ្ឋ។ ប្រសិនបើបរិយាកាសនយោបាយនៅកម្ពុជាមានភាពអាប់អួរ នោះក៏វាជាការលំបាកមួយដែរ ក្នុងនាមជាប្រធានអាស៊ាន។
មួយវិញទៀត កាលពីពេលថ្មីៗនេះ ដំណើរទស្សនកិច្ចរបស់រដ្ឋមន្ត្រីការបរទេសអូស្ត្រាលីនៅកម្ពុជា ថ្វីត្បិតមិនបានទម្លាយព័ត៌មាននយោបាយអ្វីច្រើន ក៏ប៉ុន្តែត្រូវគេមើលឃើញថាទស្សនកិច្ចរបស់ប្រមុខការទូតអូស្ត្រាលី ទំនងជាបង្កប់នូវប្រធានបទនយោបាយសំខាន់លើសពីអ្វីដែលជាកិច្ចសហប្រតិបត្តិការ និងការគាំទ្រគ្នាទៅវិញទៅមករវាងប្រទេសទាំងពីរដែរ។
ផ្ទុយពីការមើលឃើញរបស់អ្នកតាមដានសង្គម និងនយោបាយ រដ្ឋាភិបាលកម្ពុជា តែងអះអាងថាការដោះលែងសកម្មជនដ៏គួរឲ្យភ្ញាក់ផ្អើលពេលនេះ គឺមិនជាប់ពាក់ព័ន្ធទៅនឹងគំនាបពីបរទេសណានោះទេ ហើយក៏មិនដើម្បីតែកម្ពុជាព្រោះតែជាអ្នកមានតួនាទីសំខាន់នៅក្នុងកិច្ចប្រជុំកំពូលធំៗចំនួន២ខាងមុខនេះដែរ។
ជារឿងធម្មតា មន្ត្រីរដ្ឋាភិបាលកម្ពុជា តែងអះអាងការពារមុខមាត់របស់ខ្លួនថា យន្តការដោះលែងអ្នកទោសដែលជាសកម្មជនទាំងអស់នេះ គឺជាការធ្វើឡើង ដោយអនុវត្តទៅតាមច្បាប់ពង្រឹងនីតិរដ្ឋរបស់ប្រទេសប៉ុណ្ណោះ។ ការដោះលែងសកម្មជននយោបាយ និងសង្គម សកម្មជនបរិស្ថាន នៅពេលនេះត្រូវអ្នកវិភាគ យល់ថា គឺជាការបង្ហាញនូវការថយក្រោយមួយជំហានរបស់រដ្ឋាភិបាល ក៏ប៉ុន្តែសកម្មជនទាំងអស់ត្រូវស្ថិតនៅក្រោមលក្ខខណ្ឌនៃការត្រួតពិនិត្យរបស់តុលាការដល់ទៅ៣ឆ្នាំឯណោះ។ ចំណុចនេះ ត្រូវគេមើលឃើញថា រដ្ឋាភិបាល នៅតែរក្សាទុកសន្លឹកអាត់នៅក្នុងដៃនៅឡើយ។
យ៉ាងណាក៏ដោយ បញ្ហាទាំងអស់នេះ នឹងឆ្លុះបញ្ចាំងបន្ថែមទៀត ក្រោយពេលកម្ពុជាអស់ភារកិច្ច និងការទទួលខុសត្រូវធំៗ ថាតើភាពតានតឹងផ្នែកនយោបាយ សិទ្ធិមនុស្ស និងប្រជាធិបតេយ្យ នឹងអាចប្រែប្រួលយ៉ាងណានៅពេលខាងមុខ ខណៈប្រទេសកម្ពុជា នឹងត្រូវរៀបចំការបោះឆ្នោតធំៗចំនួន២ថែមទៀត នៅឆ្នាំ២០២២ និង២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ