ការចូលរួមរបស់ពលរដ្ឋ ជាគន្លឹះសំខាន់មួយដើម្បីឈានទៅបិទបញ្ចប់ការឆ្លងកូវីដ១៩ក្នុងសហគមន៍
ចុះផ្សាយនៅថ្ងៃ៖
ស្តាប់ - ០៥:០២
គិតត្រឹមពេលនេះ ព្រឹត្តិការណ៍ឆ្លងកូវីដ១៩ក្នុងសហគមន៍ ២០កុម្ភៈ បានអូសបន្លាយអស់រយៈពេល៥ខែរួចមកហើយ។ ចាប់តាំងពីផ្ទុះឡើងដំបូងរហូតមកទល់ពេលនេះ កម្ពុជាបានរកឃើញអ្នកឆ្លងរាប់ពាន់នាក់ និងមានអ្នកស្លាប់បន្តបន្ទាប់ជារៀងរាល់ថ្ងៃ។ ចំណែកមនុស្សរាប់ម៉ឺននាក់ទៀត កំពុងដាក់ខ្លួនឲ្យនៅដាច់ដោយឡែកដោយសារតែបានប៉ះពាល់ជាមួយអ្នកជំងឺកូវីដ១៩។ នៅក្នុងស្ថានភាពដូច្នេះ អ្នកជំនាញបានទទូចឲ្យប្រជាពលរដ្ឋចូលរួមអនុវត្តវិធានសុខាភិបាល ដើម្បីឈានទៅបិទបញ្ចប់ការឆ្លងកូវីដ១៩ក្នុងសហគមន៍ឲ្យបានឆាប់ មុនពេលកម្ពុជាធ្លាក់ទៅក្នុងមហន្តរាយសុខាភិបាលនាពេលខាងមុខ។
«ឆាប់ភ័យ ឆាប់បាត់» នេះគឺជាចរិតលក្ខណៈរបស់ពលរដ្ឋខ្មែរដែលគេសង្កេតឃើញមានជាយូរមកហើយ។ កាលពីឆ្នាំមុន ពេលដែលកូវីដ១៩កំពុងផ្ទុះឡើងដំបូងៗ ពលរដ្ឋខ្មែរនាំគ្នាភ័យស្លន់ស្លោ នាំគ្នាដណ្ដើមទិញម៉ាសនិងអាល់កុលលាងដៃរហូតទាល់តែអស់ពីស្តុក។ ការជួបជុំផ្សេងៗត្រូវគេកាត់បន្ថយ ចំណែកការដើរហើរជាទូទៅក៏មិនសូវអ៊ូអរ។ គួរបញ្ជាក់ថា កាលណោះ ករណីកូវីដ១៩នៅកម្ពុជាទាំងអស់ សុទ្ធសឹងតែជាករណីនាំចូលពីបរទេស។
រហូតមកដល់ឆ្នាំនេះ ពោលគឺនៅខែកុម្ភៈ កម្ពុជាស្រាប់តែរកឃើញករណីឆ្លងកូវីដ១៩នៅក្នុងសហគមន៍។ ជាករណីឆ្លងដែលមានវិសាលភាពធំធេង រហូតតម្រូវឲ្យអាជ្ញាធរសម្រេចដាក់បម្រាមគោចរ និងក្រោយមក មានការបិទខ្ទប់រាជធានីភ្នំពេញដើម្បីកាត់បន្ថយហានិភ័យនៃការឆ្លងកូវីដ១៩។ ការឆ្លងកូវីដ១៩តាមរយៈព្រឹត្តិការណ៍សហគមន៍២០កុម្ភៈ រហូតមកទល់ពេលនេះ មិនត្រឹមតែមិនទាន់ថមថយឥទ្ធិពលនៅឡើយទេ តែវាបានឆ្លងពីរាជធានីភ្នំពេញ ទៅកាន់បណ្ដាខេត្តផ្សេងៗទូទាំងប្រទេសកម្ពុជាទៀតផង។ រថយន្តសង្គ្រោះបន្ទាន់បើកទៅមកចុះឡើងគ្មានឈប់ឈរ។ មនុស្សរាប់ម៉ឺននាក់ ត្រូវធ្វើចត្តាឡីស័ក ដាក់ខ្លួនឯងឲ្យនៅដាច់ដោយឡែករយៈពេល១៤ថ្ងៃ។ បើទោះបីអ៊ីចឹងក៏ដោយ គេសង្កេតឃើញថា ពលរដ្ឋទូទៅ ហាក់ដូចជាពុំបានចាប់អារម្មណ៍ឬភ័យខ្លាចទាល់តែសោះ ចំពោះជំងឺកូវីដ១៩។
មែនទែនទៅ នៅក្នុងបរិបទកម្ពុជាសព្វថ្ងៃ ពលរដ្ឋគួរតែត្រឡប់ទៅបារម្ភនិងការពារខ្លួន ដូចកាលពីដំបូងៗវិញ ព្រោះសូមកុំភ្លេចថា ជំងឺកូវីដ១៩នេះ ឆ្លងដោយពុំរើសមុខទេ។ សូម្បីតែថ្នាក់ដឹកនាំនៅប្រទេសខ្លះក៏មានឆ្លងជំងឺនេះដែរ។ ពលរដ្ឋខ្មែរត្រូវយល់ថា ក្ដីព្រួយបារម្ភនិងភាពភ័យខ្លាចរបស់ខ្លួន ពុំមានអ្វីខុសប្រក្រតីទេ ប៉ុន្តែជារឿងត្រឹមត្រូវទៅវិញ ដើម្បីកុំឲ្យឆ្លងជំងឺដ៏កាចសាហាវនេះទៅក្នុងសហគមន៍ខ្មែរ។ ហេតុអ្វីការបារម្ភពីកូវីដ១៩គឺជារឿងត្រឹមត្រូវ? នោះក៏ព្រោះតែការឆ្លងរាតត្បាតនៃជំងឺកូវីដ១៩ អាចកើតឡើងដោយអ្នកជំងឺខ្លួនឯងពុំដឹងខ្លួន, ថ្នាំព្យាបាលក៏គ្មាន, ចំណែកករណីស្លាប់ក៏ចេះតែកើនឡើងឥតឈប់ឈរពីមួយថ្ងៃទៅមួយថ្ងៃ។
ជាការកត់សម្គាល់ ដើម្បីទប់ស្កាត់ការឆ្លងរាលដាលនៃជំងឺកូវីដ១៩ អាជ្ញាធរនៅតាមបណ្ដាខេត្តនានាទូទាំងប្រទេស បានដាក់ចេញនូវវិធានការចាំបាច់ផ្សេងៗ ដូចជាការបិទខ្ទប់តំបន់ប្រឈម និងហាមឃាត់ការជួបជុំដែលមានលក្ខណៈទ្រង់ទ្រាយធំ។ ទន្ទឹមនឹងវិធានការទាំងនេះ រដ្ឋាភិបាលកម្ពុជាក៏កំពុងតែពង្រីកវិសាលភាពនៃការចាក់វ៉ាក់សាំងបង្ការជំងឺកូវីដ១៩ដល់ពលរដ្ឋនៅតាមបណ្ដាខេត្តផងដែរ ដោយគិតរហូតមកទល់ពេលនេះ កម្ពុជាសម្រេចបានការចាក់វ៉ាក់សាំងដល់ពលរដ្ឋចំនួនប្រមាណ៥លាន៧សែននាក់ ឬស្មើនឹងប្រមាណ៥៧ភាគរយនៃគោលដៅចាក់វ៉ាក់សាំងសរុបចំនួន១០លាននាក់។
ទោះជាដូច្នេះក៏ដោយ បន្ថែមពីលើកិច្ចខិតខំប្រឹងប្រែងរបស់រដ្ឋាភិបាលនិងអាជ្ញាធរពាក់ព័ន្ធ គេត្រូវការការចូលរួមរបស់ប្រជាពលរដ្ឋគ្រប់គ្នាៗ។ អ្វីដែលពលរដ្ឋខ្មែរអាចធ្វើបាន គឺនាំគ្នាប្រុងប្រយ័ត្នសុខភាពនិងថែទាំអនាម័យខ្លួនប្រាណឲ្យបានដិតដល់៖ លាងដៃឲ្យបានញឹកញាប់ តាមដានសុខភាពខ្លួនឯង ហើយត្រូវប្រញាប់រាយការណ៍ជាបន្ទាន់ទៅកាន់មន្ដ្រីជំនាញប្រសិនបើមានរោគសញ្ញាសង្ស័យនៃជំងឺកូវីដ១៩។
ចំណែកនៅតាមបណ្ដាញសង្គម ពលរដ្ឋអាចបន្តតាមដាននិងចែករំលែកព័ត៌មានត្រឹមត្រូវអំពីការវិវត្តនៃជំងឺកូវីដ១៩។ ការទទួលព័ត៌មាននិងចែករំលែកព័ត៌មានត្រឹមត្រូវនេះ មានសារៈសំខាន់ណាស់សម្រាប់អាជ្ញាធរក្នុងការឆ្លើយតបទៅនឹងការឆ្លងរាតត្បាតនៃជំងឺកូវីដ១៩ បានទាន់ពេលវេលា។ ទន្ទឹមគ្នានេះ វាក៏អាចរួមចំណែកជួយកាត់បន្ថយក្ដីបារម្ភនិងភាពភ័យខ្លាចជ្រួលច្របល់នៅក្នុងសង្គមបានផងដែរ។
គេត្រូវចងចាំថា បញ្ហាចំពោះមុខនាពេលនេះ គឺការប្រយុទ្ធប្រឆាំងនឹងការឆ្លងរាតត្បាតនៃមេរោគកូរ៉ូណាថ្មី ឬជំងឺកូវីដ១៩ ដែលការងារនេះតម្រូវឲ្យពលរដ្ឋទូទៅចូលរួមជាមួយអាជ្ញាធរ។ ការចូលរួមសំខាន់បំផុត គឺនាំគ្នារក្សាគម្លាតសង្គម ចៀសវាងការប្រមូលផ្ដុំ ប្រយ័ត្នប្រយែង និងថែទាំអនាម័យព្រមទាំងសុខភាពខ្លួនឯង។ ការងារនេះសំខាន់ខ្លាំងណាស់ដើម្បីធានាថា យើងម្នាក់ៗ មិនធ្លាក់ខ្លួនជាជនរងគ្រោះនៃជំងឺកូវីដ១៩ និងមិនក្លាយជាភ្នាក់ងារចម្លងជំងឺនេះទៅកាន់អ្នកដទៃ ជាពិសេសមនុស្សចាស់និងអ្នកដែលមានសុខភាពទន់ខ្សោយ។ នេះគឺការរួមចំណែកដ៏ធំធេងមិនអាចកាត់ថ្លៃបានរបស់ពលរដ្ឋម្នាក់ៗ ដើម្បីកាត់បន្ថយនិងទប់ស្កាត់ការឆ្លងនៃជំងឺកូវីដ១៩នៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ