អ្នកទេសចរដែលចាក់វ៉ាក់សាំងកូវីដ១៩រួច ជាក្ដីសង្ឃឹមសម្រាប់វិស័យទេសចរណ៍កម្ពុជា?
ចុះផ្សាយនៅថ្ងៃ៖
ស្តាប់ - ០៤:១០
វិស័យទេសចរណ៍ដែលជាសសរស្ដម្ភដ៏សំខាន់មួយសម្រាប់ទ្រទ្រង់សេដ្ឋកិច្ចកម្ពុជា បានធ្លាក់ចុះយ៉ាងគំហុក ដោយសារវិបត្តិកូវីដ១៩។ ដើម្បីស្ដារវិស័យនេះឡើងវិញ កម្ពុជាកំពុងតែសិក្សាពីក្របខណ្ឌនៃការបើកទ្វារទទួលភ្ញៀវទេសចរអន្ដរជាតិដែលចាក់វ៉ាក់សាំងកូវីដ១៩ ឲ្យចូលមកកាន់កម្ពុជាឡើងវិញ។ តើទេសចរបរទេសទាំងនេះ ពិតជាអាចស្រោចស្រង់វិស័យទេសចរកម្ពុជាបានមែនឬយ៉ាងណា? តើកម្ពុជាត្រូវធ្វើការអ្វីបន្ថែមទៀត ដើម្បីឲ្យវិស័យទេសចរណ៍ ដំណើរការបានប្រសើរឡើងវិញ?
វិស័យដែលរងគ្រោះដោយសារតែវិបត្តិកូវីដ១៩ដំបូងគេនិងធ្ងន់ធ្ងរជាងគេ គឺវិស័យទេសចរណ៍។ វិស័យទេសចរណ៍នៅគ្រប់ប្រទេសទាំងអស់ ក្នុងនោះរួមទាំងកម្ពុជាផង បានជួបប្រទះនូវផលវិបាកដ៏ធ្ងន់ធ្ងរ នៅពេលអ្នកទេសចរលែងអាចធ្វើដំណើរបានដោយសេរីដូចមុន។ កៅអីយន្តហោះដែលធ្លាប់ផ្ទុកមនុស្សពេញៗ ប្រែជាទំនេរ។ សភាពអ៊ូអរនៅតាមទីរមណីយដ្ឋាន ប្រែជាស្ងប់ស្ងាត់។ អ្នកបម្រើសេវាកម្មក្នុងវិស័យទេសចរណ៍ដែលធ្លាប់តែមមាញឹក ប្រែជាបាត់បង់ការងារធ្វើ។ ចំណែកចំណូលរបស់ប្រទេសដែលធ្លាប់ទទួលបានពីវិស័យទេសចរណ៍ ក៏ធ្លាក់ចុះយ៉ាងគំហុក។
កាលពីឆ្នាំ២០២០ កម្ពុជាទទួលបានភ្ញៀវទេសចរអន្តរជាតិប្រមាណតែ១លាន៣សែននាក់ប៉ុណ្ណោះ។ ចំនួននេះ ថយចុះប្រមាណ ៨០% បើធៀបនឹងឆ្នាំ២០១៩កន្លងទៅ។ ក្រសួងទេសចរណ៍កម្ពុជា បានសង្កត់ធ្ងន់ថា ការធ្លាក់ចុះនៃចំនួនភ្ញៀវទេសចរអន្តរជាតិកាលពីឆ្នាំមុននេះ បានធ្វើឱ្យឧស្សាហកម្មទេសចរណ៍កម្ពុជា បាត់បង់ចំណូលជាង៣ពាន់លានដុល្លារអាមេរិកឯណោះ។
នៅក្នុងឆ្នាំ២០២១នេះទៀតសោត របាយការណ៍ពីក្រសួងទេសចរណ៍បង្ហាញថា ស្ថានការណ៍នៃវិស័យទេសចរណ៍នៅតែមិនទាន់ល្អប្រសើរ ដោយគិតត្រឹមរយៈពេល៣ខែដើមឆ្នាំ២០២១ មានភ្ញៀវបរទេសតែជាង៧ម៉ឺននាក់ប៉ុណ្ណោះ ដែលមកកម្សាន្តនៅកម្ពុជា។ បើប្រៀបធៀបនឹងរយៈពេលដូចគ្នាក្នុងឆ្នាំ២០២០ ចំនួននេះ ធ្លាក់ចុះរហូតដល់ទៅជិត៩៤ភាគរយ។ សម្រាប់ត្រីមាសទី១នៃឆ្នាំ២០២១នេះ ភ្ញៀវទេសចរបរទេសដែលមកកម្សាន្តនៅកម្ពុជាច្រើនជាងគេ គឺទេសចរជនជាតិថៃ តាមពីក្រោយដោយភ្ញៀវទេសចរជនជាតិចិន និងជនជាតិវៀតណាម ឥណ្ឌូនេស៊ី កូរ៉េខាងត្បូង តៃវ៉ាន់ អាមេរិក បារាំង និងជប៉ុនជាដើម។
នៅចំពោះមុខអត្រាធ្លាក់ចុះនៃភ្ញៀវទេសចរបរទេសដែលជាប្រភពចំណូលដ៏សំខាន់មួយផ្នែកសម្រាប់សេដ្ឋកិច្ចកម្ពុជានេះ ក្រសួងទេសចរណ៍កម្ពុជាកំពុងជំរុញការសិក្សាអំពីការបើកទទួលភ្ញៀវទេសចរអន្តរជាតិដែលបានចាក់វ៉ាក់សាំងបង្ការជំងឺកូវីដ១៩ចូលមកប្រទេសកម្ពុជាឡើងវិញនៅក្នុងត្រីមាសទី៤ ឆ្នាំ២០២១។ ក្រសួងទេសចរណ៍សង្ឃឹមថា ការទទួលទេសចរអន្ដរជាតិដែលបានចាក់វ៉ាក់សាំងរួច អាចស្ដារឧស្សាហកម្មទេសចរណ៍របស់កម្ពុជា ដែលកំពុងជួបវិបត្តិយ៉ាងធ្ងន់ធ្ងរ ដោយសារវិបត្តិកូវីដ១៩ក្នុងរយៈពេលជាងមួយឆ្នាំកន្លងមកនេះ។
ជាជំហានដំបូង ក្រសួងទេសចរណ៍អះអាងថា ខ្លួននឹងពិភាក្សាជាមួយក្រសួងសុខាភិបាល ថាតើត្រូវតម្រូវឲ្យភ្ញៀវទេសចរអន្តរជាតិដែលបានចាក់វ៉ាក់សាំងបង្ការជំងឺកូវីដ១៩រួចរាល់ហើយចូលមកប្រទេសកម្ពុជា ធ្វើចត្តាឡីស័កក្នុងកម្រិតណា ឬមិនចាំបាច់ធ្វើចត្តាឡីស័ក។
អ្នកជំនាញផ្នែកទេសចរណ៍ បានសម្ដែងការស្វាគមន៍ចំពោះគម្រោងនេះ។ ប៉ុន្តែថា ការណ៍នេះនៅមិនទាន់គ្រប់គ្រាន់ទេ។ ដើម្បីអាចឲ្យវិស័យទេសចរណ៍កម្ពុជាដំណើរការដោយរលូនឡើងវិញ អ្នកធ្វើការក្នុងវិស័យនេះ និយាយដោយឡែក និងពលរដ្ឋកម្ពុជា និយាយជារួម ត្រូវតែទទួលបានវ៉ាក់សាំងបង្ការជំងឺកូវីដ១៩ផងដែរ។ ការចាក់វ៉ាក់សាំងដល់អ្នកផ្តល់សេវាកម្មទេសចរណ៍និងពលរដ្ឋទូទៅ ចាំបាច់ណាស់ ដើម្បីបង្កើនទំនុកចិត្ត និងធានាសុវត្ថិភាពដល់ភ្ញៀវទេសចរអន្តរជាតិ។ នេះបើតាមអ្នកជំនាញ។
គួរបញ្ជាក់ថា ចាប់តាំងពីខែកុម្ភៈរហូតមក កម្ពុជាបានសម្រុកចាក់វ៉ាក់សាំងដល់ពលរដ្ឋរបស់ខ្លួនជាបន្តបន្ទាប់។ គិតត្រឹមពេលនេះ កម្ពុជាបានចាក់វ៉ាក់សាំងដូសទី១ ដល់ពលរដ្ឋចំនួនជាង២លាននាក់។ ចំនួននៃការចាក់វ៉ាក់សាំងនេះ មានអត្រាស្មើនឹង២០ភាគរយ នៃអត្រាប្រជាជនគោលដៅចាក់វ៉ាក់សាំងសរុប ដែលមានចំនួន១០លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ