កម្ពុជាត្រូវធ្វើការងារច្រើនទៀត ដើម្បីទាញប្រយោជន៍ជាអតិបរមាពីកិច្ចព្រមព្រៀង RCEP
ចុះផ្សាយនៅថ្ងៃ៖
ស្តាប់ - ០៣:៣៧
ថ្ងៃទី១៥វិច្ឆិកានេះ ជាថ្ងៃជាប្រវត្តិសាស្ត្រ កម្ពុជានិងប្រទេសសមាជិកអាស៊ាន ព្រមទាំងប្រទេសចំនួន៥ទៀត បានចុះហត្ថលេខាលើកិច្ចព្រមព្រៀងពាណិជ្ជកម្មសេរី ហៅកាត់ថា RCEP។ RCEP គឺជាកិច្ចព្រមព្រៀងដ៏ធំនិងសំខាន់បំផុតនៅលើពិភពលោក ដោយហេតុថា ផលិតផលសរុបរបស់ប្រទេសហត្ថលេខីទាំងអស់ មានទំហំដល់ទៅ៣០ភាគរយនៃផលិតផលក្នុងពិភពលោក។ ក្នុងបរិបទនេះ តើកម្ពុជាត្រូវធ្វើយ៉ាងណា ដើម្បីទាញប្រយោជន៍ជាអតិបរមាពីកិច្ចព្រមព្រៀង RCEP នេះ?
មុននឹងទៅដល់ការទាញប្រយោជន៍ពីកិច្ចព្រមព្រៀងនេះ គេត្រូវស្វែងយល់ពីសវតានៃកិច្ចព្រមព្រៀងនេះបន្តិចសិន។ កិច្ចព្រមព្រៀងភាពជាដៃគូសេដ្ឋកិច្ចតំបន់គ្រប់ជ្រុងជ្រោយ ហៅកាត់ថា RCEP ត្រូវបានស្នើឡើងដំបូងនៅឆ្នាំ២០១២ នាទីក្រុងភ្នំពេញ ដោយមានប្រទេសជាសមាជិកចំនួន១៦ រួមមានប្រទេសអាស៊ានទាំង១០ និងដៃគូសន្ទនាចំនួន៦ផ្សេងទៀត គឺ ចិន ជប៉ុន កូរ៉េខាងត្បូង ឥណ្ឌា អូស្ត្រាលី និងណូវែលសេឡង់។ ប៉ុន្តែកាលពីឆ្នាំ២០១២នោះ កិច្ចព្រមព្រៀង RCEP នេះ មិនសូវទទួលបានការចាប់អារម្មណ៍ឡើយ ដោយសារតែអាមេរិកបានដឹកនាំធ្វើកិច្ចព្រមព្រៀងពាណិជ្ជកម្មអន្ដរប៉ាស៊ីហ្វិក ដែលធំជាងនេះ។ យ៉ាងណាក៏ដោយ បន្ទាប់ពីអាមេរិកសម្រេចដកខ្លួនចេញពីកិច្ចព្រមព្រៀងអន្ដរប៉ាស៊ីហ្វិក ចិនបានឆក់ឱកាសប្រមូលបណ្ដាប្រទេសអាស៊ាននិងប្រទេសក្នុងតំបន់ផ្សេងទៀតឲ្យចូលរួមជាមួយខ្លួន នៅក្នុងកិច្ចព្រមព្រៀង RCEP។ ចិនរំពឹងថា កិច្ចព្រមព្រៀង RCEP នឹងលេចចេញជារូបរាងនៅចុងឆ្នាំ២០១៩។
ប៉ុន្តែនៅចុងឆ្នាំ២០១៩នោះ ឥណ្ឌាបានសម្រេចចិត្តដកខ្លួនចេញពីមហាកិច្ចព្រមព្រៀងពាណិជ្ជកម្មសេរី RCEP។ ដូច្នេះទើបពេលនេះ មហាកិច្ចព្រមព្រៀងសេរី RCEP មានសមាជិកតែ១៥ប្រទេស។
វត្តមាននៃកិច្ចព្រមព្រៀង RCEP និងក្នុងពេលដែលចិននិងអាមេរិកកំពុងមានសង្គ្រាមពាណិជ្ជកម្ម គេប្រមើលឃើញថា ក្រុមប្រទេសអាស៊ានអាចទទួលបានផលប្រយោជន៍ច្រើន ពេលមានកិច្ចព្រមព្រៀង RCEP។ មានប្រយោជន៍ព្រោះថា សង្គ្រាមពាណិជ្ជកម្មរវាងចិននិងអាមេរិក អាចបង្ខំឲ្យក្រុមហ៊ុនអន្ដរជាតិ ងាកមកបង្កើតរោងចក្រនៅតាមបណ្ដាប្រទេសផ្សេងទៀត ក្រៅពីចិន ដើម្បីចៀសផុតពីទណ្ឌកម្មអាមេរិក។ ដូច្នេះ ប្រទេសអាស៊ាន អាចក្លាយទៅជាគោលដៅថ្មីសម្រាប់ប្រទេសទាំងនោះ។ កម្ពុជាក៏ដូច្នោះដែរ។
យ៉ាងណាក៏ដោយ ដើម្បីឲ្យវិនិយោគិនចូលមកដាក់ទុនវិនិយោគក្នុងតំបន់ខ្លួន អាស៊ាន ជាពិសេសកម្ពុជាត្រូវត្រៀមខ្លួន ត្រៀមហេដ្ឋារចនាសម្ព័ន្ធ វត្ថុធាតុដើម ហើយត្រូវមាននីតិវិធីច្បាប់គ្រប់គ្រាន់និងត្រឹមត្រូវ ដើម្បីធានាដល់អ្នកវិនិយោគដែរ។ នេះជាការប្រឈមមួយសម្រាប់អាស៊ាន និយាយជារួម និងសម្រាប់កម្ពុជា និយាយដោយឡែក។
សម្រាប់កម្ពុជា ដើម្បីទាញយកប្រយោជន៍ពីមហាកិច្ចព្រមព្រៀង RCEP នេះ អ្នកជំនាញសេដ្ឋកិច្ចមួយចំនួនបានជំរុញឲ្យកម្ពុជាពន្លឿនការធ្វើពិពិធកម្មមូលដ្ឋានគ្រឹះនៃសេដ្ឋកិច្ចរបស់ខ្លួន ឲ្យបានលឿនរហ័ស។ ក្នុងនោះ មានវិស័យមួយចំនួន ដែលកម្ពុជាអាចយកចិត្តទុកដាក់ ដើម្បីពង្រីកសសរទ្រទ្រង់សេដ្ឋកិច្ចរបស់ខ្លួន។ ទីមួយ គឺការជំរុញវិស័យកសិឧស្សាហកម្ម ដែលជាសសរគ្រឹះគាំទ្រកំណើនវិស័យកសិកម្ម កាត់ដេរ និងទេសចរណ៍។ ទីពីរ ពង្រីកសិប្បកម្មនិងឧស្សាហកម្ម ដើម្បីជំរុញការនាំចេញ និងបំពេញតម្រូវការក្នុងស្រុក។ ទីបីស្វែងរកឧស្សាហកម្មថ្មីៗ និងអភិវឌ្ឍធនធានមនុស្សស្របទៅតាមទីផ្សារការងារអន្ដរជាតិ។
កម្ពុជាដែលត្រូវបានគេវាយតម្លៃថា ជាប្រទេសដែលមានប្រជាជនវ័យក្មេងនិងសកម្មច្រើន គួរតែអាចទាញយកផលប្រយោជន៍កម្លាំងទាំងនេះ តាមរយៈការបង្កើតការងារតាមជំនាញសម្រាប់ពួកគេ។ ប្រសិនបើកម្ពុជាអាចបង្កើតទម្រមូលដ្ឋានគ្រឹះសេដ្ឋកិច្ចបានច្រើនមែននោះ អ្នកជំនាញផ្នែកសេដ្ឋកិច្ចជឿថា កម្ពុជានឹងអាចទាញយកផលចំណេញយ៉ាងមហិមា ពីកិច្ចព្រមព្រៀង RCEP ជាក់ជាពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ