គោលនយោបាយ «ភូមិ-ឃុំ-សង្កាត់ មានសុវត្ថិភាព» ត្រូវបានកែសម្រួលឲ្យស្របតាមស្ថានភាពបច្ចុប្បន្ន
រដ្ឋាភិបាលកម្ពុជា បានសម្រេចកែលម្អលក្ខណសម្បត្តិនៃគោលនយោបាយ «ភូមិ-ឃុំ-សង្កាត់ មានសុវត្ថិភាព» ឲ្យសមស្របទៅតាមស្ថានភាពបច្ចុប្បន្ន ខណៈវិធានការការពារជំងឺឆ្លងក៏ត្រូវបានដាក់បញ្ចូលទៅក្នុងគោលនយោបាយថ្មីនេះដែរ។ ការកែសម្រួលគោលនយោបាយនេះគឺធ្វើឡើងបន្ទាប់ពីបានដាក់ឲ្យអនុវត្តន៍អស់រយៈពេល១០ឆ្នាំកន្លងមក។
ចុះផ្សាយនៅថ្ងៃ៖
ស្តាប់ - ០១:៤៩
ក្នុងគោលនយោបាយកម្រាស់១០ទំព័រ រដ្ឋាភិបាលកម្ពុជាបានកំណត់ថា លក្ខណសម្បត្តិរបស់ភូមិ-ឃុំ-សង្កាត់ មានសុវត្ថិភាព គឺត្រូវមាន៧ចំណុច៖ ការផ្តល់សេវាសាធារណៈប្រកបដោយគុណភាព តម្លាភាព និងជឿទុកចិត្ត។ គ្មានបទល្មើស លួច ឆក់ ប្លន់ គ្រឿងញៀន ល្បែងស៊ីសង និងបទល្មើសគ្រប់ប្រភេទ។ មានសណ្តាប់ធ្នាប់ល្អ ពិសេសមិនមានគ្រោះថ្នាក់ចរាចរណ៍។ គ្មានអំពើអនាចារ គ្មានការជួញដូរមនុស្ស គ្មានអំពើហិង្សា និងក្មេងទំនើង។ ដោះស្រាយវិវាទនៅថ្នាក់មូលដ្ឋានក្រៅប្រព័ន្ធតុលាការប្រកបដោយប្រសិទ្ធិភាព។ មានអនាម័យ សោភ័ណ្ឌភាព និងបរិស្ថានល្អ។ ឆ្លើយតបបានទាន់ពេលចំពោះគ្រោះមហន្តរាយ និងជំងឺឆ្លងផ្សេងៗ។
ដើម្បីឆ្លើយតបនឹងលក្ខណសម្បត្តិទាំងនេះ អាជ្ញាធរថ្នាក់មូលដ្ឋានត្រូវរៀបចំវេទិកាសាធារណៈយ៉ាងហោចណាស់១ខែម្តង ហើយត្រូវចាត់ឲ្យមានការប្រឡងប្រណាំងបង្កើតស្នាដៃ សំដៅរកអង្គភាព និងបុគ្គលដែលខំពុះពារបំពេញកាត្វកិច្ច ហើយធ្វើជាគំរូក្នុងការអនុវត្តន៍គោលនយោបាយនេះ។ ជាងនេះទៅទៀត គ្រប់ក្រសួងស្ថាប័ន និងគណៈបញ្ជការឯកភាពរដ្ឋបាលគ្រប់ថ្នាក់ ត្រូវប្រជុំរៀងរាល់៦ខែម្តង ដើម្បីមានមូលដ្ឋានក្នុងការវាយតម្លៃ ដកពិសោធន៍ និងដាក់ចេញគោលដៅអនុវត្តន៍បន្ត។ ជាមួយគ្នានេះ បញ្ហាថវិកាក៏ត្រូវបានគិតគូរសម្រាប់អនុវត្តន៍គោលនយោបាយ ភូមិ-ឃុំ-សង្កាត់ មានសុវត្ថិភាពនេះដែរ។
សូមបញ្ជាក់ថា គោលនយោបាយភូមិ-ឃុំ-សង្កាត់ មានសុវត្ថិភាពចាស់ ត្រូវបានដាក់ឲ្យអនុវត្តន៍អស់រយៈពេល១០ឆ្នាំមកហើយ។
បើតាមក្រសួងមហាផ្ទៃ ទោះបីមានសន្តិភាព ស្ថិរភាពយ៉ាងរឹងមាំ ប៉ុន្តែសន្តិសុខ សណ្តាប់ធ្នាប់សាធារណៈ បញ្ហាសុខមាលភាពរបស់ប្រជាពលរដ្ឋ និងការផ្តល់សេវាចាំបាច់នានា នៅតែជាបញ្ហាអាទិភាពដែលត្រូវយកចិត្តទុកដាក់ជាប្រចាំ ដើម្បីធានាឲ្យជនគ្រប់រូប និងសង្គមទាំងមូល មានសុវត្ថិភាពយ៉ាងល្អប្រសើរ ជីវភាពរុងរឿង និងសុខដុមរមនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ