ក្រសួងមហាផ្ទៃបញ្ជាឲ្យអាជ្ញាធរថ្នាក់ក្រោមលុបបំបាត់ចោលការបង្កសំឡេងខ្លាំងៗដោយយានយន្ត
ក្រសួងមហាផ្ទៃនៅថ្ងៃទី១៥មករា២០២១ បានចេញសេចក្តីណែនាំមួយទៅកាន់អាជ្ញាធរថ្នាក់ក្រោមដែលពាក់ព័ន្ធឲ្យលុបបំបាត់ចោលឲ្យអស់នូវការបង្កសំឡេងរំខានខ្លាំងៗលើសកម្រិតដោយយាន្តយន្តគ្រប់ប្រភេទ។ នេះជាបទបញ្ជាថ្មីមួយបន្ទាប់ពីស្នងការនគរបាលក្រុងភ្នំពេញបានប្រកាសផ្អាកការចាប់ផាកពិន័យម៉ូតូធំដែលបង្កសំឡេងខ្លាំងៗ រំខានដល់ប្រជាពលរដ្ឋ ដោយរង់ចាំបទបញ្ជាថ្មី។
ចុះផ្សាយនៅថ្ងៃ៖
ស្តាប់ - ០២:០៣
តាមរយៈសេចក្តីណែនាំចុះថ្ងៃទី១៥មករា២០២១ រដ្ឋមន្ត្រីក្រសួងមហាផ្ទៃ លោក ស ខេង បានគូសបញ្ជាក់ថា ការលុបបំបាត់ចោលឲ្យអស់នូវការបង្កសំឡេងរំខានលើសកម្រិតដោយយានយន្តគ្រប់ប្រភេទនេះក្នុងគោលបំណងពង្រឹងការអនុវត្តន៍ច្បាប់ សំដៅលុបបំបាត់សកម្មភាពអាណាធិបតេយ្យ ដើម្បីលើកកម្ពស់សេចក្តីថ្លៃថ្នូរក្នុងសង្គម។
ចំពោះចំណាត់ការដែលអាជ្ញាធរគ្រប់ថ្នាក់ត្រូវធ្វើ គឺត្រូវយកចិត្តទុកដាក់ធ្វើការអប់រំ និងផ្សព្វផ្សាយឲ្យបានទូលាយដល់អ្នកប្រើប្រាស់យានយន្ត ឬ ម៉ូតូធំដែលកែច្នៃបំពង់ស៊ីម៉ាំង ត្រូវតែបញ្ឈប់សកម្មភាពបង្កសំឡេងរំខានដល់ប្រជាពលរដ្ឋ។ ជាមួយគ្នានោះ សមត្ថកិច្ចក៏ត្រូវចុះត្រួតពិនិត្យ និងអប់រំដល់ម្ចាស់ទីតាំងកែច្នៃយានយន្តខុសបច្ចេកទេស ឲ្យបញ្ឈប់សកម្មភាពនេះ។ ក្នុងករណីដែលនៅតែបន្តគឺត្រូវចាត់វិធានការតាមច្បាប់ឲ្យបានម៉ឺងមាត់បំផុត។
បើតាម លោក ស ថេត ស្នងការនគរបាលរាជធានីភ្នំពេញ មានម៉ូតូយ៉ាងហោចណាស់៦០គ្រឿង ត្រូវបានចាប់ឃាត់ទុក ដោយសារតែបំពាក់បំពង់ស៊ីម៉ាំងកែច្នៃ បង្កសំឡេងលាន់ឮខ្លាំងរំខានការរស់នៅរបស់ប្រជាពលរដ្ឋ។
សូមរំឭកថា មុនពេលចេញសេចក្តីណែនាំឲ្យលុបបំបាត់ការបង្កសំឡេងរំខានដោយយានយន្តនេះ លោក ស ខេង កាលពីថ្ងៃទី ៨ មករា ក៏បានបញ្ជាឲ្យកម្លាំងនគរបាល និងក្រសួងសាធារណការ ត្រូវពិនិត្យ និងស្រាវជ្រាវកំណត់អត្តសញ្ញាណម៉ូតូធំដែលបង្កសំឡេងរំខានដល់ពលរដ្ឋ។ បទបញ្ជារបស់រដ្ឋមន្ត្រីមហាផ្ទៃបែបនេះ ដោយលោកឃើញថា មានក្មេងទំនើងមួយចំនួន ជិះម៉ូតូធំកែច្នៃបំពង់ស៊ីម៉ាំងខុសបច្ចេកទេស បង្កសំឡេងឮខ្លាំង មិនត្រឹមតែរំខានប្រជាពលរដ្ឋធម្មតានោះទេ ពោលប្រមុខរដ្ឋាភិបាល លោក ហ៊ុន សែន ក៏ត្រូវបានរំខានដោយសំឡេងម៉ូតូដែលបើកបរនៅម្តុំវិមានឯករាជ្យផងដែរ។
យោងតាមអនុក្រឹត្យស្តីពីការពិន័យអន្តរការណ៍ គឺត្រូវពិន័យទឹកប្រាក់ចំនួន ១០ ម៉ឺនរៀលចំពោះអ្នកបើកយានយន្តដែលបង្កសំឡេងឮខ្លាំងឬមានផ្សែងច្រើនខុសពីបទដ្ឋានបច្ចេកទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ