«មេគង្គ-ឡានឆាង» ជាយន្តការរបស់ចិនដើម្បីគ្រប់គ្រងទន្លេមេគង្គនិងពង្រឹងឥទ្ធិពលក្នុងតំបន់?
ចុះផ្សាយនៅថ្ងៃ៖
ស្តាប់ - ០៥:១៤
នៅថ្ងៃចន្ទទី២៤សីហានេះ លោកនាយករដ្ឋមន្ដ្រី ហ៊ុន សែន និងមេដឹកនាំនៃប្រទេសចំនួន៥ទៀតនៅតាមបណ្ដោយដងទន្លេមេគង្គ ត្រូវចូលរួមកិច្ចប្រជុំកំពូលមេគង្គ-ឡានឆាង លើកទី៣ ដែលរៀបចំធ្វើតាមប្រព័ន្ធវីដេអូដោយមានប្រទេសឡាវនិងប្រទេសចិនជាសហប្រធាន។ ផ្ដួចផ្ដើមឡើងនៅឆ្នាំ២០១៤ កិច្ចសហប្រតិបត្តិការមេគង្គ-ឡានឆាង ត្រូវអ្នកជំនាញមួយចំនួនមើលឃើញថា គឺជាយន្តការមួយដែលចិនបង្កើតឡើងដើម្បីគ្រប់គ្រងទន្លេមេគង្គនិងពង្រឹងឥទ្ធិពលរបស់ខ្លួននៅក្នុងតំបន់តែប៉ុណ្ណោះ។
ចេញដំណើរពីខ្ពង់រាបទីបេក្នុងកម្ពស់៤៥០០ម៉ែត្រ មេគង្គហូរកាត់ប្រទេសចិន មីយ៉ាន់ម៉ា ឡាវ ថៃ កម្ពុជា និងវៀតណាម មុននឹងរំលាយខ្លួនចូលទៅក្នុងសមុទ្រចិនខាងត្បូង។ ប្រជាជនមិនតិចជាង៦០លាននាក់ទេ ដែលកំពុងរស់នៅអាស្រ័យផលពីទន្លេដ៏សំខាន់នេះ។ សម្រាប់ប្រជាជនទាំងជាង៦០លាននាក់នោះ មេគង្គ គឺជាប្រភពទឹកប្រើប្រាស់សម្រាប់ទទួលទាន សម្រាប់ងូតជម្រះកាយ សម្រាប់ដាំដុះដំណាំ សម្រាប់ចិញ្ចឹមសត្វ និងសម្រាប់ធ្វើដំណើរទៅមក។ មិនត្រឹមតែប៉ុណ្ណោះ ទន្លេមេគង្គប្រវែងជាង៤ពាន់គីឡូម៉ែត្រនេះ ក៏បានផ្ដល់ឲ្យប្រជាជននូវអត្ថប្រយោជន៍ផ្សេងទៀត តាមរយៈលំហូរទឹក ព្រមទាំងធនធានធម្មជាតិដ៏សម្បូរបែបដទៃទៀតផងដែរ។
គឺដោយសារតែមើលឃើញអំពីសារៈសំខាន់ទាំងអស់នេះហើយ ទើបប្រទេសតាមបណ្ដាយដងទន្លេមេគង្គទាំងអស់ព្រមព្រៀងគ្នាបង្កើតឲ្យមានយន្តការផ្សេងៗ ក្នុងគោលដៅការពារនិងបែងចែកភោគផលពីទន្លេមេគង្គប្រកបដោយតម្លាភាព ជាក់ស្ដែងមានជាអាទិ៍ គណៈកម្មការទន្លេមេគង្គ បង្កើតឡើងនៅឆ្នាំ១៩៩៥ និងកិច្ចសហប្រតិបត្តិការមេគង្គ-ឡានឆាង ដែលត្រូវបានផ្ដួចផ្ដើមបង្កើតឡើងនៅឆ្នាំ២០១៤ជាដើម។
ខុសពីគណៈកម្មការទន្លេមេគង្គដែលមានសមាជិកតែ៤ប្រទេសគឺ ឡាវ ថៃ កម្ពុជា និងវៀតណាម, កិច្ចសហប្រតិបត្តិការមេគង្គ-ឡានឆាង មានសមាជិកសរុបចំនួន៦ប្រទេស រួមមាន ចិន មីយ៉ាន់ម៉ា ឡាវ ថៃ កម្ពុជា និងវៀតណាម។ យ៉ាងណាក៏ដោយ កិច្ចសហប្រតិបត្តិការមេគង្គ-ឡានឆាងនេះ ត្រូវបានអ្នកជំនាញមួយចំនួនមើលឃើញថា ជាយន្តការមួយដែលចិនបង្កើតឡើងដើម្បីតែសម្រេចមហិច្ឆតារបស់ខ្លួនក្នុងការគ្រប់គ្រងទន្លេមេគង្គនិងពង្រឹងឥទ្ធិពលរបស់ខ្លួននៅក្នុងតំបន់តែប៉ុណ្ណោះ។
នៅក្នុងកិច្ចប្រជុំកំពូលលើកទី១នៅឆ្នាំ២០១៦ ក្រោមមូលនិធិកិច្ចសហប្រតិបត្តិការមេគង្គ-ឡានឆាង ប្រទេសចិនបានសន្យាផ្ដល់ជំនួយហិរញ្ញវត្ថុចំនួន៣០០លានដុល្លារ ដើម្បីគាំទ្រដល់គម្រោងខ្នាតតូចនិងមធ្យមនានានៅប្រទេសតាមដងទន្លេមេគង្គទាំង៦ សម្រាប់រយៈពេល៥ឆ្នាំ ចាប់ពីឆ្នាំ២០១៨ដល់ឆ្នាំ២០២២។ ចំពោះកម្ពុជា ក្នុងរយៈពេល៣ឆ្នាំជាប់គ្នា មូលនិធិមេគង្គ-ឡានឆាង បានផ្ដល់ជំនួយលើគម្រោងចំនួន៥៥គម្រោង ដែលគិតជាទឹកប្រាក់ជាង២០លានដុល្លារ។ ជាថ្នូរនឹងកញ្ចប់លុយដែលទម្លាក់ឲ្យកម្ពុជានិងបណ្ដាប្រទេសនៅតាមដងទន្លេមេគង្គនេះ ចិនបានបន្តការសាងសង់ទំនប់វារីអគ្គិសនីមួយហើយមួយទៀតនៅផ្នែកខាងលើនៃដងទន្លេមេគង្គ ដែលចិនខ្លួនឯងហៅថា ឡានឆាង។ គិតរហូតមកទល់ពេលនេះ ចិនបានសាងសង់ទំនប់វារីអគ្គិសនីចំនួន១១លើដងទន្លេមេគង្គ និងកំពុងតែរៀបចំសាងសង់ទំនប់វារីអគ្គិសនីចំនួន៨បន្ថែមទៀត។
របាយការណ៍របស់មជ្ឈមណ្ឌល Stimson ប្រចាំតំបន់អាស៊ីអាគ្នេយ៍ រកឃើញថា ទំនប់វារីអគ្គិសនីរបស់ចិននៅផ្នែកខាងលើនៃដងទន្លេមេគង្គ បានធ្វើឲ្យប្រែប្រួលយ៉ាងឆាប់រហ័សនូវលំហូរទឹក ក៏ដូចជាកម្ពស់ទឹកទន្លេ។ ការប្រែប្រួលនេះបានធ្វើឲ្យខូចខាតដល់ប្រព័ន្ធជីវៈចម្រុះក្នុងទន្លេ ប៉ះពាល់ដល់ជំរកត្រី និងធ្វើឲ្យប្រភេទត្រីខ្លះត្រូវរងគ្រោះស្ទើរតែផុតពូជ។ ជាលទ្ធផល ប្រជាជនជាង៦០លាននាក់ដែលរស់នៅតាមដងទន្លេនេះកំពុងក្លាយទៅជាជនរងគ្រោះដោយសារតែសកម្មភាពដ៏គគ្លើនរបស់ចិន។
បន្ថែមពីការគ្រប់គ្រងទន្លេ យន្តការមេគង្គ-ឡានឆាង ក៏ត្រូវបានចិនប្រើប្រាស់ដើម្បីពង្រឹងនិងពង្រីកឥទ្ធិពលរបស់ខ្លួននៅក្នុងតំបន់ផងដែរ។ មេគង្គនិងប្រទេសនៅតាមដងទន្លេនេះ ប្រៀបបានទៅនឹងផ្កាក្រពុំ ដែលមានកន្លង់ជាមហាអំណាចធំៗតាមក្រេបលម្អង។ អាមេរិក ឥណ្ឌា ជប៉ុន និងកូរ៉េខាងត្បូង សុទ្ធតែបានចងសម្ព័ន្ធភាពជាមួយប្រទេសនៅក្នុងតំបន់មេគង្គជាយូរឆ្នាំមកហើយ ដោយមានភ្ជាប់មកជាមួយនូវជំនួយហិរញ្ញវត្ថុរាប់សិបលានដុល្លារក្នុងមួយឆ្នាំៗសម្រាប់ប្រទេសនៅក្នុងតំបន់មេគង្គនេះ។ នៅចំពោះមុខសេណារីយ៉ូដូច្នេះ វត្តមានយន្តការមេគង្គ-ឡានឆាង ដែលបោះមេដោយប្រទេសចិន ទំនងជាចងភ្ជាប់ដោយរបៀបវារៈប្រជែងអំណាចចៀសមិនរួច។
តើនាពេលអនាគត មេគង្គនឹងបន្តស្ថិតជាទន្លេរួមនៃបណ្ដាប្រទេសទាំង៦ទៀតឬយ៉ាងណា? ឬថា ទន្លេដ៏សំខាន់នេះនឹងក្លាយជាកម្មសិទ្ធិផ្ដាច់មុខរបស់ប្រទេសណាមួយ? គឺមានតែប្រទេសទាំង៦នៅតាមបណ្ដោយដងទន្លេមេគង្គទេ ទើបអាចឆ្លើយនឹងសំណួរនេះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ