ការនាំចេញអង្ករ១លានតោន៖ សហព័ន្ធស្រូវអង្ករចាប់ផ្តើមចុះកុងត្រាទិញស្រូវពីកសិកររាប់សិបតោន
តាមរយៈសមាជិករបស់ខ្លួន សហព័ន្ធស្រូវអង្ករកម្ពុជាបានចុះកុងត្រាទិញស្រូវពីសហគមន៍កសិករបានប្រមាណជាង១០០សហគមន៍ហើយ ក្នុងគោលដៅសម្រេចឲ្យបានការនាំចេញអង្ករ១លានតោន។ នេះបើតាមការបញ្ជាក់របស់សហព័ន្ធស្រូវអង្ករកម្ពុជា។ ការនាំចេញអង្ករ១លានតោន ដែលគ្រោងនឹងសម្រេចឲ្យបាននាឆ្នាំ២០២១ខាងមុខ ខណៈការនាំចេញអង្ករកម្ពុជាទៅកាន់ទីផ្សារអន្តរជាតិកំពុងមានកំណើន នារយៈពេលចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:២៨
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានអះអាងប្រាបវិទ្យុបារាំងអន្តរជាតិនៅថ្ងៃទី១៥ ខែសីហានេះ ថា ការចុះកិច្ចសន្យាផលិតកម្មកសិកម្ម ក្នុងការផលិត និងផ្គត់ផ្គង់ស្រូវនិរន្តរភាព គឺជាផ្នែកមួយនៃផែនការសកម្មភាពរបស់សហព័ន្ធ ក្នុងការជំរុញការនាំចេញឲ្យឆ្លើយតបនឹងតម្រូវការទីផ្សារ។ លោកបន្ថែមថា កាលពីពេលកន្លងទៅគឺប្រជាពលរដ្ឋដាំស្រូវបានទើបមានការចុះទៅទិញស្រូវ ប៉ុន្តែនៅពេលនេះគឺកសិករមានទីផ្សារមុនការផលិតស្រូវ។
កាលពីថ្ងៃទី១០ ខែកក្កដា ឆ្នាំ២០២០ កន្លងទៅ ក្នុងខេត្តបាត់ដំបង ក៏មានការចុះកុងត្រារវាងសហគមន៍ចំនួន៨ លើបរិមាណផ្គត់ផ្គង់ និងទទួលទិញស្រូវចំនួន ១៨ ០០០តោន។ ចំណែកកាលពីថ្ងៃទី១៣ ខែសីហា ក្រុមហ៊ុន អេមរុរ៉ាយយ៍ ដែលជាសមាជិករបស់សហព័ន្ធស្រូវអង្ករកម្ពុជា ក៏បានចុះកិច្ចសន្យាជាមួយសហគមន៍២២ ក្នុងខេត្តកំពង់ចាម កំពង់ធំ និងសៀមរាប លើបរិមាណផ្គត់ផ្គង់ប្រមាណជាង៥ ៥០០តោន។ នៅចុងខែសីហា ខាងមុខនេះ ក៏នឹងមានការចុះកិច្ចសន្យាសម្រាប់សហគមន៍ចំនួន៥០ទៀត លើបរិមាណស្រូវនិរន្តរភាព ប្រមាណជាង ១០ ០០០តោន ជាមួយសហគមន៍កសិកម្មមកពីខេត្តព្រះវិហារ កំពត កំពង់ឆ្នាំ តាកែវ និងមណ្ឌលគិរី។ នេះបើតាមសេចក្តីប្រកាសរបស់សហព័ន្ធស្រូវអង្ករកម្ពុជា។
លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា ធ្លាប់បានអះអាងប្រាប់វិទ្យុបារាំងអន្តរជាតិថា កម្ពុជា ដែលពេលនេះមានទីផ្សារដោយខ្លួនឯង នឹងសម្រេចបានយ៉ាងជាក់លាក់នាំចេញអង្ករទៅក្រៅប្រទេសចំនួន ១លានតោន នៅឆ្នាំ២០២១។
ឆ្លើយនឹងសំនួរថាកម្ពុជានៅមានការប្រឈមអ្វីទៀត ចំពោះការនាំចេញអង្ករឲ្យមាន១លានតោននោះ, លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានកត់សម្គាល់ថាបញ្ហាធំជាងគេគឺការប្រែប្រួលអាកាសធាតុ ដែលធ្វើឲ្យប៉ះពាល់ដល់ការផលិតស្រូវ ជាក់ស្តែងនៅក្នុងខែសីហានេះមិនមានបរិមាណស្រូវគ្រប់គ្រាន់ ហើយក្រៅពីនេះគឺបញ្ហាទីផ្សារ។
សូមជម្រាបជូនថា ការនាំចេញអង្ករកម្ពុជាទៅកាន់ទីផ្សារអន្តរជាតិនៅក្នុងរយៈពេល៧ខែ ឆ្នាំ២០២០នេះ មានចំនួន ៤២៦ ០៧៣តោន ដែលគិតជាកំណើន មានប្រមាណជា ៣៨.៣៣%ធៀបទៅនឹងរយៈពេលដូចគ្នា ឆ្នាំ២០១៩។ សម្រាប់រយៈពេល៧ខែនៃឆ្នាំ២០២០ នេះដែរ ចំណូលដុលពីការនាំចេញអង្ករបានចំនួន ២៨៥.៨០លានដុល្លាសហរដ្ឋអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ