OHCHR៖ សមត្ថកិច្ចកម្ពុជា បានប្រើកម្លាំងហួសប្រមាណ លើការជួបជុំដោយសន្តិវិធី
ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) នៅថ្ងៃទី១៤សីហាម្សិលមិញ បានអំពាវនាវអោយអាជ្ញាធរពាក់ព័ន្ធរបស់កម្ពុជាគោរពសិទ្ធិរបស់អ្នកតវ៉ាក្នុងការជួបប្រជុំ និងសូមឲ្យការពារអ្នកដែលប្រើសិទ្ធិជួបប្រជុំនេះថែមទៀត។ ការអំពាវនាវនេះ ធ្វើឡើងបន្ទាប់ពីការិយាល័យនេះសង្កេតឃើញថា សមត្ថកិច្ចកម្ពុជា បានប្រើកម្លាំងហួសប្រមាណលើការជួបជុំដោយសន្តិវិធីក្នុងការទាមទារអោយដោះលែងលោក រ៉ុង ឈុន នារយៈពេលចុងក្រោយនេះ។
ចុះផ្សាយនៅថ្ងៃ៖
ស្តាប់ - ០៣:១៦
ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ប្រចាំនៅកម្ពុជា បានលើកឡើងថា មួយរយៈពេលចុងក្រោយនេះ ខ្លួនបានតាមដាននិងឃ្លាំមើលការជួបប្រជុំដោយសន្តិវិធី ដែលរៀបចំឡើងដោយបុគ្គលផ្សេងៗ។ ប៉ុន្តែទោះបីជាការជួបប្រជុំទាំងនោះ មានលក្ខណៈសន្តិវិធីក្តី ក៏ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) បានសង្កេតឃើញនូវការចាប់ខ្លួននិងឧប្បត្តិហេតុមួយចំនួននៃការប្រើប្រាស់កម្លាំងហួសប្រមាណ ដើម្បីទប់ទល់នឹងក្រុមបាតុករ ដែលភាគច្រើនគឺជាស្ត្រីនិងយុវជនកម្ពុជា។
ការលើកឡើងរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស(OHCHR) នេះ ធ្វើឡើងបន្ទាប់ពីអាជ្ញាធរខណ្ឌ៧មករា កាលពីថ្ងៃទី ១៣ សីហា បានប្រើប្រាស់អំពើហិង្សាលើអ្នកតវ៉ាដែលជាយុវជន និងស្ត្រី ដើម្បីទាមទារឲ្យមានការដោះលែងលោក រ៉ុង ឈុន។ ការបង្ក្រាបកាលនោះ ជាលទ្ធផល យុវតី២នាក់បានរងរបួសធ្ងន់ ដោយម្នាក់បាក់ដៃ និងម្នាក់ទៀតហើមភ្នែក។ រីឯយុវជន៦នាក់ត្រូវបានឃាត់ខ្លួន ប៉ុន្តែ៤នាក់ត្រូវបានដោះលែងមកវិញ ខណៈពីរនាក់ទៀត គឺកញ្ញា ឈឿន ដារ៉ាវី និង លោក ហ៊ុន វណ្ណៈ ត្រូវបានកសាងសំណុំរឿងបញ្ជូនទៅកាន់តុលាការក្រោមការចោទប្រកាន់ពីបទ «ញុះញង់អោយមានភាពវឹកវរដល់សន្តិសុខសង្គម»។
ចំណាត់ការលើក្រុមអ្នកតវ៉ាយ៉ាងដូច្នេះ ត្រូវបានការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ប្រចាំនៅកម្ពុជា ចាត់ទុកថាជាការប្រើកម្លាំងហួសប្រមាណរបស់អាជ្ញាធរ។ OHCHR បានអំពាវនាវឲ្យអាជ្ញាធរពាក់ព័ន្ធរបស់កម្ពុជា គោរពសិទ្ធិរបស់អ្នកតវ៉ាក្នុងការជួបប្រជុំ និងសូមឲ្យការពារអ្នកដែលប្រើសិទ្ធិជួបប្រជុំនេះផង។ នេះបើតាមការសរសេររបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) ប្រចាំនៅកម្ពុជាតាមរយៈទំព័រហ្វេសប៊ុកផ្លូវការរបស់ខ្លួន នៅថ្ងៃទី ១៤ សីហា។
លោក អំ សំអាត នាយករងផ្នែកឃ្លាំមើលសិទ្ធិមនុស្សនៃអង្គការលីកាដូ បានគាំទ្រចំពោះការលើកឡើងរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) នេះ។ លោក អំ សំអាត ការិយាល័យនេះ គឺតែងតែបានបញ្ជូនតំណាងរបស់ខ្លួន ដើម្បីឃ្លាំមើលរាល់ការជួបប្រជុំតវ៉ារបស់ប្រជាពលរដ្ឋកម្ពុជា ដែលបានប្រើប្រាស់សិទ្ធិជាមូលដ្ឋានរបស់ខ្លួន និងដែលបានធានាដោយរដ្ឋធម្មនុញ្ញដែលជាច្បាប់កំពូលរបស់កម្ពុជា។ បើតាមលោក អំ សំអាត អាជ្ញាធរត្រូវប្រើវិធីសាស្ត្រចរចាឲ្យអស់លទ្ធភាពជាមុនសិន មុននឹងធ្វើសកម្មភាពរុញច្រាន ឬ បង្ក្រាបទៅលើអ្នកតវ៉ាអហិង្សានានា។
ប៉ុន្តែទោះជាយ៉ាងនេះក្តី លោក ជិន ម៉ាលីន អនុប្រធានគណៈកម្មការសិទ្ធិមនុស្សរដ្ឋាភិបាលកម្ពុជា បានការពារចំណាត់ការរបស់អាជ្ញាធរថា គឺមិនបានបង្ក្រាបទៅលើបាតុកម្មអហិង្សា ឬ ការប្រមូលផ្តុំបែបអហិង្សានោះទេ។ ប៉ុន្តែអ្វីដែលសមត្ថកិច្ចបានធ្វើ គឺជាការអនុវត្តច្បាប់ ក្នុងការការពារនិងថែរក្សាសណ្តាប់ធ្នាប់សាធារណៈទប់ទល់ទៅនឹងការតវ៉ា និងការជួបជុំដែលខុសច្បាប់ ដែលមិនបានអនុវត្តន៍ទៅតាមបញ្ញត្តិច្បាប់ ស្តីពី ការធ្វើបាតុកម្មដោយសន្តិវិធីតែប៉ុណ្ណោះ។ លោក ជិន ម៉ាលីន ដែលមានតួនាទីជារដ្ឋលេខាធិការក្រសួងយុត្តិធម៌ផងនោះ បានចាត់ទុកការលើកឡើងរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) និងភាគីពាក់ព័ន្ធ គឺមិនបានវាយតម្លៃអោយគ្រប់ទិដ្ឋភាពច្បាប់របស់កម្ពុជានោះទេ។ លោកបានស្នើសុំអោយភាគីពាក់ព័ន្ធ គួរសិក្សានិងពិនិត្យមើលអោយបានស៊ីជម្រៅជាងនេះ ជាជាងការវាយតម្លៃដោយគ្រាន់តែមើលរូបភាពពីខាងក្រៅ។ នេះបើតាមលោក ជិន ម៉ាលីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ