អាជ្ញាធរខេត្តកំពង់ចាមបន្តរកអ្នកប្រាស្រ័យទាក់ទងផ្ទាល់ជាមួយស្ត្រីជនជាតិខ្មែរ-អាមេរិក
នៅព្រឹកថ្ងៃទី១៩ ខែកក្កដានេះ អាជ្ញាធរខេត្តកំពង់ចាមកំពុងបន្តស្វែងរកអ្នក ដែលបានប្រាស្រ័យទាក់ទងផ្ទាល់ជាមួយស្ត្រីជនជាតិខ្មែរ-អាមេរិក ដើម្បីពិនិត្យសុខភាព បើទោះបីជាស្ត្រីរូបនេះមានសុខភាពល្អក្តី។ នេះបើតាមអភិបាលខេត្តកំពង់ចាមលោក អ៊ុន ចាន់ដា បន្ទាប់ពីសមត្ថកិច្ចខេត្តបានរកឃើញស្ត្រីជនជាតិខ្មែរ-អាមេរិករូបនេះ នៅខេត្តកំពង់ចាម កាលពីថ្ងៃម្សិលមិញ។
ចុះផ្សាយនៅថ្ងៃ៖
ស្តាប់ - ០២:៣០
ថ្លែងប្រាប់វិទ្យុបារាំងអន្តរជាតិនៅថ្ងៃទី១៩ ខែកក្កដានេះ លោក អ៊ុន ចាន់ដា អភិបាលខេត្តកំពង់ចាម បានបញ្ជាក់ថា រហូតមកដល់ពេលនេះ អាជ្ញាធរខេត្តបានរកឃើញអ្នករត់ម៉ូតូឌុបម្នាក់ ដែលឌុបស្ត្រីជនជាតិខ្មែរ-អាមេរិករូបនេះ ហើយកំពុងបន្តស្វែងរកអ្នកផ្សេងទៀត ដោយសារស្ត្រីខាងលើនេះបានធ្វើដំណើរតាមរយៈរថយន្តឈ្នួល និងចូលទៅកន្លែងធ្វើសក់មួយ។ លោក អ៊ុន ចាន់ដា បញ្ជាក់ថា មនុស្សប្រហែល១០នាក់ ដែលប្រាស្រ័យទាក់ទងជាមួយស្ត្រីជនជាតិខ្មែរ-អាមេរិក។
ស្ត្រីជនជាតិខ្មែរ-អាមេរិក បានរត់ចេញពីកន្លែងធ្វើចត្តាឡីស័កក្នុងសណ្ឋាគារមួយនៅរាជធានីភ្នំពេញ កាលពីយប់ថ្ងៃទី១៧ ខែកក្កដា បន្ទាប់ពីគាត់បានធ្វើដំណើរពីសហរដ្ឋអាមេរិក មកដល់ប្រទេសកម្ពុជា កាលពីថ្ងៃទី១៥ ខែកក្កដា។ គាត់គឺជាអ្នកដំណើរក្នុងជើងហោះហើរ KE689 ជាមួយជនជាតិអាមេរិកកាំងពីរនាក់ ដែលត្រូវបានរកឃើញវិជ្ជមានកូវីដ១៩ កាលពីថ្ងៃទី១៦ ខែកក្កដាកន្លងទៅ។
បន្ទាប់ពីបានរត់គេចខ្លួនពីរាជធានីភ្នំពេញ ស្ត្រីជនជាតិខ្មែរ-អាមេរិក រូបនេះបានធ្វើដំណើរទៅខេត្តកំពង់ចាម ហើយត្រូវបានអាជ្ញាធរខេត្តរកឃើញនៅក្នុងផ្ទះសំណាក់មួយក្នុងកុ្រងកំពង់ចាម កាលពីថ្ងៃទី១៨ ខែកក្កដា។ បើតាមលោកអភិបាលខេត្ត បច្ចុប្បន្នស្ត្រីខាងលើត្រូវបានដាក់ឲ្យនៅដាច់ដោយឡែកពីគេ នៅក្នុងសណ្ឋាគារមេគង្គ ដែលជាមណ្ឌលចត្តាឡីស័កកម្រិត២របស់ខេត្ត។ ក្រោយពីបានរកឃើញស្ត្រីខាងលើនេះ អ្នកជំនាញសុខាភិបាលខេត្តក៏បានពិនិត្យ សុខភាព និងយកសំណាករបស់គាត់ ដើម្បីវិភាគនៅវិទ្យាស្ថានប៉ាស្ទ័ររាជធានីភ្នំពេញ។
ជុំវិញមូលហេតុ ដែលស្ត្រីខាងលើនេះ រត់ទៅខេត្តកំពង់ចាម, លោក អ៊ុន ចាន់ដា អភិបាលខេត្តបានអះអាងថា សមត្ថកិច្ចកំពុងធ្វើការសាកសួរគាត់ ហើយបើតាមអ្វីដែលលោកបានដឹង គាត់មិនមានផ្ទះនៅក្នុងខេត្តនេះទេ បើទោះបីជាគាត់មានស្រុកកំណើតនៅក្នុងខេត្តនេះក៏ពិតមែន។ ការរត់ចេញពីមណ្ឌលចត្តាឡីស័កនៅរាជធានីភ្នំពេញ ដោយសារគាត់យល់ថា គាត់មិនមានបញ្ហាសុខភាពអ្វី ដែលចាំបាច់ត្រូវធ្វើចត្តាឡីស័កនោះទេ។
លោក អ៊ុន ចាន់ដា ក៏បានបញ្ជាក់ថា ករណីស្ត្រីជនជាតិខ្មែរ-អាមេរិក គឺមិនមែនជាអ្នកជំងឺកូវីដ១៩នោះទេ ពោលគឺគាត់គ្រាន់តែជាអ្នករួមដំណើរជាមួយអ្នកជំងឺកូវីដ១៩ប៉ុណ្ណោះ ដូច្នេះតម្រូវឲ្យគាត់ធ្វើចត្តាឡីស័ករយៈពេល១៤ថ្ងៃ ដើម្បីតាមដានសុខភាពរបស់គាត់។ លោកអភិបាលខេត្តរូបនេះ អំពាវនាវកុំឲ្យសាធារណជនមានការព្រួយបារម្ភ ព្រោះស្ត្រីជនជាតិខ្មែរ-អាមេរិករូបនេះ មិនមានអាការណាមួយទាក់ទងនឹងជំងឺកូវីដ១៩ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ