អង្គការភ្លែនអន្តរជាតិ ព្រួយបារម្ភពីការបោះបង់ចោលការសិក្សារបស់សិស្សស្រី ក្នុងអំឡុងពេលនៃកូវីដ១៩
អង្គការភ្លែនអន្តរជាតិប្រចាំនៅកម្ពុជា បានលើកឡើងពីការព្រួយបារម្ភរបស់ខ្លួនថា សិស្សស្រីមួយចំនួនប្រឈមនឹងការបោះបង់ចោលការសិក្សា ក្នុងអំឡុងពេលនៃវិបត្តិនៃជំងឺកូវីដ១៩។ មន្ត្រីអង្គការអន្តរជាតិមួយនេះ បានអំពាវនាវឲ្យរដ្ឋាភិបាលកម្ពុជានិងអង្គការសង្គមស៊ីវិល ធ្វើយុទ្ធនាការរួមគ្នាមួយ ដើម្បីអោយក្មេងស្រីទាំងនោះវិលមករៀនឡើងវិញ។
ចុះផ្សាយនៅថ្ងៃ៖
ស្តាប់ - ០១:៤៦
ផ្អែកតាមកម្មវិធីពិភាក្សាជាមួយក្រុមក្មេងស្រីនៅតាមតំបន់ការងាររបស់អង្គការភ្លែនអន្តរជាតិ អង្គការនេះបានរកឃើញថា ក្មេងស្រីមួយចំនួនពិសេសនៅតាមតំបន់ដាច់ស្រយាលនៃខេត្តរតនគីរី ស្ទឹងត្រែង និងខេត្តសៀមរាប បានប្រឈមនឹងការបោះបង់ចោលការសិក្សា នៅក្នុងអំឡុងពេលនៃវិបត្តិជំងឺកូវីដ១៩នេះ។
លោក យី គឹមថាន នាយករងប្រចាំប្រទេសទទួលបន្ទុកកម្មវិធីនៃអង្គការភ្លែនអន្តរជាតិកម្ពុជា បានថ្លែងថា សិស្សស្រីមួយចំនួនបានប្រឈមនឹងការបោះបង់ចោលការសិក្សា និងបានធ្វើចំណាកស្រុកដើម្បីស្វែងរកការងារធ្វើ នៅក្នុងអំឡុងពេលដែលមានវិបត្តិនៃជំងឺកូវីដ១៩នេះ។ អង្គការភ្លែនអន្តរជាតិនៅមិនទាន់កំណត់តួលេខជាក់លាក់នៅឡើយទេ ប៉ុន្តែបើផ្អែកតាមកិច្ចពិភាក្សាជាមួយក្រុមក្មេងស្រីៗនៅតាមតំបន់គោលដៅរបស់ខ្លួន ពួកគេមានការព្រួយបារម្ភថា ក្រោមកត្តាជីវភាព បានធ្វើឲ្យសិស្សស្រីមួយចំនួនបោះបង់ចោលការសិក្សា និងធ្វើចំណាកស្រុកទៅស្វែងរកការងារធ្វើនៅកន្លែងផ្សេងទៅវិញ។ មូលហេតុ គឺបណ្តាលមកពីបញ្ហាជីវភាព ការប្រឈមនឹងកង្វះខាតការសិក្សាតាម Online ឬការសិក្សាពីចំងាយ និងការបង្ខំអោយរៀបការប្តីទាំងនៅវ័យក្មេងជាដើម។ បើតាមនាយករងប្រចាំប្រទេសទទួលបន្ទុកកម្មវិធីនៃអង្គការភ្លែនអន្តរជាតិកម្ពុជា លោក យី គឹមថាន បានអំពាវនាវអោយរដ្ឋាភិបាលកម្ពុជា និងអង្គការសង្គមស៊ីវិល ធ្វើយុទ្ធនាការរួមគ្នាមួយ ដើម្បីអោយក្មេងស្រីទាំងនោះវិលត្រលប់មករៀនឡើងវិញ។
គួរជំរាបជូនថា រហូតមកទល់ពេលនេះ គ្មានការបញ្ជាក់ជាផ្លូវការណាមួយបង្ហាញថា អត្រាបោះបង់ការសិក្សានៅកម្ពុជាអំឡុងកូវីដ១៩មានកម្រិតខ្ពស់ប៉ុណ្ណានោះទេ តែបើតាមរបាយការណ៍របស់អង្គការ Save the Children ចេញផ្សាយ កាលពីថ្ងៃទី១៣កក្កដា បានគូសបញ្ជាក់ថា កុមារជិត១០លាននាក់ អាចត្រូវបង្ខំចិត្តបោះបង់ចោលការសិក្សាជារៀងរហូត ដោយសារវិបត្តិកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ