ក្រសួងផែនការរកឃើញពលរដ្ឋជាង៤ពាន់គ្រួសារបន្លំខ្លួនធ្វើជាក្រីក្រ ដើម្បីបានទទួលប្រាក់ឧបត្ថម្ភ
ក្រសួងផែនការបានរកឃើញពលរដ្ឋដែលមានជីវភាពធូរធាជាង៤ពាន់គ្រួសារបន្លំធ្វើជាពលរដ្ឋក្រីក្រ ដើម្បីបានទទួលប្រាក់ឧបត្ថម្ភពីរដ្ឋាភិបាលក្នុងអំឡុងកូវីដ១៩នេះ ខណៈការបើកប្រាក់ឧបត្ថម្ភក្នុងជុំទី១បានប្រហែល៩០%នៃពលរដ្ឋក្រីក្រជាង៥៦ម៉ឺនគ្រួសារ។ ប៉ុន្តែក្នុងចំណោមពលរដ្ឋជាង៤ពាន់គ្រួសារដែលបន្លំខ្លួននោះ គឺមានតែប្រមាណ១ពាន់គ្រួសារប៉ុណ្ណោះដែលបានទទួលប្រាក់ឧបត្ថម្ភរួចហើយ ពោលក្រៅពីនោះត្រូវបានដកហូតប័ណ្ណក្រីក្រមកវិញទាន់ពេល។
ចុះផ្សាយនៅថ្ងៃ៖
ស្តាប់ - ០២:១៧
លោក ថេង បញ្ញាធន ប្រតិភូរដ្ឋាភិបាលទទួលបន្ទុកអគ្គនាយកផែនការបានថ្លែងថា ការរកឃើញភាពមិនប្រក្រតីនេះដោយសារតែមានប្រតិកម្មពីប្រជាពលរដ្ឋដូចគ្នានៅពេលពួកគេទៅបើកប្រាក់ឧបត្ថម្ភ តួយ៉ាងនៅខេត្តកែបជាដើម។ ក្នុងចំណោមពលរដ្ឋមិនមែនជាជនក្រីក្រទាំងជាង៤ពាន់គ្រួសារនោះគឺមានជាង១ពាន់គ្រួសារ ដែលបានទទួលប្រាក់ឧបត្ថម្ភ ក្រៅពីនោះត្រូវបានអាជ្ញាធរដកហូតប័ណ្ណក្រីក្រមកវិញ។ នេះបើតាម លោក ថេង បញ្ញាធន។
លោក ថេង បញ្ញាធន អះអាងថា ករណីនេះលោកពិបាកបន្ទោសទៅលើកំហុសរបស់អាជ្ញាធរមូលដ្ឋានក្នុងការផ្តល់ប័ណ្ណសមធម៌ឲ្យទៅជនក្រីក្រ ដោយសារអាជ្ញាធរខ្លះខ្វះការយល់ដឹង និងដោយសារតែពលរដ្ឋទាំងនោះជាអ្នកចេញមុខស្នើសុំដោយខ្លួនឯងផ្ទាល់។ ប៉ុន្តែលោកថា ក្រោយពី មានសរាចរណែនាំពីក្រសួងមហាផ្ទៃ ករណីនេះត្រូវបានរឹតបន្តឹងឡើងវិញ ហើយមន្ត្រីផែនការត្រូវតែចុះធ្វើការងារដោយផ្ទាល់ លែងពឹងលើអាជ្ញាធរមូលដ្ឋានទាំងស្រុងទៀតហើយ។
នៅពេលសួរថា តើវាជាការប្រព្រឹត្តអំពើពុករលួយក្នុងការចេញប័ណ្ណឲ្យជនក្រីក្រទេ? លោក ថេង បញ្ញាធន មិនអាចសន្និដ្ឋានបានទេ តែលោកទទួលស្គាល់ថា វាជាមនោសញ្ចេតនារវាងអាជ្ញាធរមូលដ្ឋាននិងប្រជាពលរដ្ឋ។
បើតាមមន្ត្រីដដែល ការរកឃើញភាពមិនប្រក្រតីនេះនៅមិនទាន់មានការដាក់ទណ្ឌកម្មយ៉ាងណានៅឡើយទៅលើមន្ត្រីពាក់ព័ន្ធ ខណៈប្រមុខរដ្ឋាភិបាល កាលពីថ្ងៃទី៣០មិថុនា បានព្រមានចាត់វិធានការក្ដៅទៅលើមេភូមិ និងក្រុមប្រឹក្សាឃុំ/សង្កាត់ ប្រសិនបើរកឃើញថា មានករណីមិនប្រក្រតី ក្នុងការផ្ដល់សាច់ប្រាក់ជូនពលរដ្ឋក្រីក្រ។
សូមបញ្ជាក់ថា ជនក្រីក្រដែលរងគ្រោះដោយជំងឺកូវីដ១៩ គឺទទួលបានថវិកាឧបត្ថម្ភ ចន្លោះពី១ម៉ឺន៦ពាន់ដល់១២ម៉ឺនរៀលក្នុងខែៗសម្រាប់មនុស្សម្នាក់។ ហើយរដ្ឋត្រូវចំណាយថវិកាជាតិប្រហែល២៥លានដុល្លារក្នុងមួយខែសម្រាប់ជនក្រីក្រក្នុងជុំទី១ ជាង៥៦ម៉ឺនគ្រួសារ ឬជាង២លាននាក់។ ប៉ុន្តែនៅមានពលរដ្ឋជាង៥ម៉ឺនគ្រួសារទៀតនឹងទទួលបានប្រាក់ឧត្ថម្ភពីរដ្ឋាភិបាលក្នុងជុំទី២ ដែលធ្វើឲ្យចំនួនពលរដ្ឋក្រីក្រដែលត្រូវទទួលបានប្រាក់ឧបត្ថម្ភ កើនឡើងដល់ជាង៦០ម៉ឺនគ្រួសារ។ នេះបើតាមក្រសួងផែនការ។ ជាមួយគ្នានោះ ប្រទេសអាល្លឺម៉ង់ក៏បានបន្ថែមថវិកាជាង១លានដុល្លារទៀតសម្រាប់ជួយកម្ពុជាក្នុងការធ្វើប័ណ្ណក្រីក្រនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ