ទិវាសេរីភាពសារព័ត៌មានពិភពលោក៖ «កម្ពុជាត្រូវការអ្នកសារព័ត៌មាន ដែលអាចរាយការណ៍ដោយសេរី»
ថ្ងៃទី ០៣ ឧសភា ឆ្នាំ ២០២០នេះ គឺជាទិវាសេរីភាពសារព័ត៌មានពិភពលោកលើកទី២៧ ធ្វើឡើងក្រោមប្រធានបទ «សារព័ត៌មានគ្មានភាពភ័យខ្លាច ឬ ភាពលម្អៀង»។ អ្វីជាការកត់សំគាល់ ក្នុងឱកាសទិវាសេរីភាពសារព័ត៌មានពិភពលោក ០៣ ឧសភានេះ អង្គការ សមាគមសារព័ត៌មាននានានៅក្នុងប្រទេសកម្ពុជា បានចេញសេចក្តីថ្លែងការណ៍រៀងៗខ្លួន ដោយក្រុមអង្គការ សមាគមសារព័ត៌មានទាំងនោះ បានប្រើប្រាស់សេចក្តីថ្លែងការណ៍របស់ពួកគេជំនួសឲ្យការជួបជុំគ្នា នៅថ្ងៃទី០៣ ឧសភា ដោយសារដំណាក់កាលនេះ ពិភពលោកក៏ដូចជាកម្ពុជា កំពុងរងនូវការរាតត្បាតពីវីរុសកូវីដ១៩។
ចុះផ្សាយនៅថ្ងៃ៖
ស្តាប់ - ០៣:១០
សម្រាប់សម្ព័ន្ធអ្នកសារព័ត៌មានកម្ពុជា (ខេមបូចា) និងក្លឹបអ្នកសារព័ត៌មានបរទេសនៅកម្ពុជា(OPCC) ទិវាសេរីភាពសារព័ត៌មានពិភពលោកឆ្នាំ២០២០នេះ គឺជាឱកាសមួយសម្រាប់អ្នកកាសែតជាតិនិងអន្តរជាតិ រួមគ្នាបង្ហាញនូវសារសំខាន់នៃស្ថាប័នព័ត៌មាន និងអ្នកសារព័ត៌មានឯករាជ្យដែលនៅសល់តិចតួចនៅកម្ពុជា។ ប៉ុន្តែមានការប្តេជ្ញាចិត្តក្នុងការបន្តផ្តល់ព័ត៌មានឥតលម្អៀងទៅកាន់សាធារណជន ទោះបីជាត្រូវប្រឈមនឹងហានិភ័យជាច្រើន ក្នុងអំឡុងពេលនៃការរាតត្បាតជំងឺកូវីដ១៩ និងក្នុងលំហសេរីភាពដ៏តូចចង្អៀតក្តី។
តាមរយៈសេចក្តីថ្លែងការណ៍រួម កម្រាស់០៣ទំព័រ នៅថ្ងៃទី ០៣ ឧសភានេះ សម្ព័ន្ធអ្នកសារព័ត៌មានកម្ពុជា (ខេមបូចា) និងក្លឹបអ្នកសារព័ត៌មានបរទេសនៅកម្ពុជា(OPCC) នៅតែបានសំដែងការព្រួយបារម្ភជាខ្លាំងជុំវិញការបន្តរឹតបន្តឹងសេរីភាពបញ្ចេញមតិ និងសេរីភាពសារព័ត៌មាន ជាពិសេសក្នុងរយៈពេល៤ខែចុងក្រោយនេះ។ ការប្រារព្ធទិវាសេរីភាពសារព័ត៌មានពិភពលោក ០៣ ឧសភា ឆ្នាំ២០២០នេះ ធ្វើឡើងក្រោមប្រធានបទ «សារព័ត៌មានគ្មានភាពភ័យខ្លាច ឬភាពលម្អៀង»។ ប៉ុន្តែសម្រាប់សម្ព័ន្ធអ្នកសារព័ត៌មានកម្ពុជា (ខេមបូចា) និងក្លឹបអ្នកសារព័ត៌មានបរទេសនៅកម្ពុជា(OPCC) បានកត់សំគាល់ថា វាជារឿងគួរឲ្យសោកស្តាយដែលនេះ គឺជាបញ្ហាសម្រាប់ប្រទេសកម្ពុជា ដោយសារអ្នកសារព័ត៌មានមានភាពភ័យខ្លាច។ ពួកគេបារម្ភថា ការរាយការណ៍ព័ត៌មានរសើបនឹងនាំទុក្ខដល់ពួកគេ ដូចជាការចោទប្រកាន់ពីតុលាការ ឬជាប់ពន្ធនាគារជាដើម។
សម្រាប់ក្លឹបអ្នកកាសែតកម្ពុជាឯណោះវិញ ក៏បានចេញសេចក្តីថ្លែងការណ៍មួយដែរកាលពីថ្ងៃទី ០១ ឧសភា ដោយបានកត់សំគាល់ថា វិស័យសារព័ត៌មាននៅកម្ពុជា មានការរីកដុះដាលគួរឲ្យកត់សម្គាល់ទាំងសារព័ត៌មានបែបប្រពៃណី (កាសែត វិទ្យុ និងទូរទស្សន៍) និងសារព័ត៌មានបែបថ្មី(អនឡាញ) ដែលបានផ្ដល់ជម្រើសកាន់តែងាយស្រួល និងសម្បូរបែបដល់ប្រជាពលរដ្ឋ។ ប៉ុន្តែទន្ទឹមនឹងភាពរីកដុះដាលនេះ ក្លិបអ្នកកាសែតកម្ពុជា បានសង្កេតឃើញថា អ្នកសារព័ត៌មានភាគច្រើនកំពុងបំពេញការងារ និងតួនាទីតាមវិជ្ជាជីវៈបានយ៉ាងល្អ ខណៈដែលអ្នកសារព័ត៌មានមួយចំនួនតូច កំពុងធ្វើឲ្យប៉ះពាល់ដល់តម្លៃរបស់អ្នកកាសែត។ នោះក៏ព្រោះតែពួកគេនៅខ្វះខាតក្រមសីលធម៌ និងវិជ្ជាជីវៈ។ ចំណែកឯសហភាពសហព័ន្ធអ្នកសារព័ត៌មានកម្ពុជាឯណោះវិញ ក៏បានចេញសេចក្តីថ្លែងការណ៍ស្រដៀងគ្នាដែរ ប៉ុន្តែសមាគមមួយនេះ បានប្រែក្លាយទិវាសេរីភាពសារព័ត៌មាននៅឆ្នាំនេះ ទៅជាការប្តេជ្ញាចិត្តរួមចំណែកជាមួយរដ្ឋាភិបាល បន្តចូលរួមផ្សព្វផ្សាយវិធានការនានាបម្រើការយល់ដឹងអំពីសុវត្ថិភាព សុខមាលភាពរបស់សាធារណជន។
យ៉ាងណាក៏ដោយ តាមរបាយការណ៍របស់អង្គការអ្នកកាសែតគ្មានព្រំដែន (RSF) កាលពីថ្ងៃទី១៩ ខែមេសា បានទម្លាក់ចំណាត់ថ្នាក់សេរីភាពសារព័ត៌មានកម្ពុជានៅក្នុងឆ្នាំ២០២០នេះមួយលេខទៀត ពោលគឺ ទទួលបានជាប់ចំណាត់ថ្នាក់លេខ១៤៤ ក្នុងចំណោមប្រទេសចំនួន១៨០។ បើតាមអង្គការអ្នកកាសែតគ្មានព្រំដែន (RSF) ការធ្លាក់ចុះនៃពិន្ទុសេរីភាពសារព័ត៌មាននៅកម្ពុជា គឺបន្ទាប់ពីមានការចាប់ខ្លួននាយកនៃការផ្សាយ TVFB លោក សុវណ្ណ រិទ្ធី ក្រោមបទចោទញុះញង់ឲ្យប្រព្រឹត្តបទល្មើសជាអាទិ៍ រឿងក្តីប្រឆាំងនឹងអតីតអ្នកសារព័ត៌មាន ដែលនៅតែបន្តអូសបន្លាយ រួមនឹងការរៀបចំច្បាប់ស្តីពីការគ្រប់គ្រងប្រទេសជាតិស្ថិតក្នុងភាពអាសន្ន ដែលត្រូវបានអ្នកជំនាញសិទ្ធិមនុស្សអន្តរជាតិយល់ថា អាចបង្កគ្រោះថ្នាក់ដល់សិទ្ធិមនុស្សជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ