ទិវាសេរីភាពសារព័ត៌មាន៖ លោក ហ៊ុន សែនថា កូវីដ១៩មិនបង្កគ្រោះថ្នាក់ពិសពុល ដូចការផ្សព្វផ្សាយព័ត៌មានក្លែងក្លាយ
ទិវាសេរីភាពសារព័ត៌មាន ០៣ ឧសភា លោកនាយករដ្ឋមន្ត្រីហ៊ុន សែនថាការឆ្លងរីករាលដាលកូវីដ១៩ មានលក្ខណៈកាចសាហាវ និងបង្កគ្រោះថ្នាក់យ៉ាងធ្ងន់ធ្ងរដល់អាយុជីវិតមនុស្ស តែជំងឺនេះមិនបង្កគ្រោះថ្នាក់ពិសពុលកាចសាហាវ ដូចការផ្សព្វផ្សាយព័ត៌មានក្លែងបន្លំតាមប្រព័ន្ធផ្សព្វផ្សាយ និងបណ្តាញទំនាក់ទំនងសង្គមហ្វេសប៊ុកឡើយ។ ការអះអាងបែបនេះរបស់លោកនាយករដ្ឋមន្ត្រី ខណៈពិន្ទុសេរីភាពសារព័ត៌មានរបស់កម្ពុជាបន្តថយចុះមួយលេខទៀត អំឡុងពេលវិបត្តិកូវីដ១៩។ —
ចុះផ្សាយនៅថ្ងៃ៖
ស្តាប់ - ០២:០៥
បើតាមលោកនាយករដ្ឋមន្ត្រីហ៊ុន សែន ការបង្កើតព័ត៌មានក្លែងក្លាយ គឺបង្កឡើងដោយជនមួយក្តាប់តូចដែលតែងប្រើគ្រប់មធ្យោបាយ ដើម្បីបំផ្លិចបំផ្លាញសេចក្តីសុខ ការរស់ឡើងវិញរបស់ប្រជាជនកម្ពុជា និងប៉ុនប៉ងផ្តូលរំលំរដ្ឋាភិបាល។
លោកនាយករដ្ឋមន្ត្រីក្នុងសារលិខិត ក្នុងឱកាសទិវាសេរីភាពសារព័ត៌មានពិភពលោក ដែលធ្វើឡើង នៅថ្ងៃទី០៣ ឧសភា បានអះអាងទៀតថា ក្នុងកាលៈទេសៈដែលប្រទេសកម្ពុជា ក៏ដូចជាសកលលោកទាំងមូលកំពុងជួបប្រទះមហន្តរាយនៃការឆ្លងរីករាលដាលនៃកូវីដ១៩ ពួកគេបានផ្សព្វផ្សាយព័ត៌មានក្លែងបន្លំបង្កចលាចល ភាពវឹកវរនៅក្នុងសង្គម និងធ្វើឲ្យប្រជាជនកើតជំងឺភ័យខ្លាច និងវាយប្រហារលើរដ្ឋាភិបាលរបស់លោក។
លោកហ៊ុន សែន តាមរយៈលិខិតដដែលនេះ ក៏បានអំពាវនាវដល់អ្នកសារព័ត៌មានទាំងអស់ចូលរួមឲ្យបានសកម្មថែមទៀតក្នុងការប្រយុទ្ធប្រឆាំងនឹងព័ត៌មានក្លែងក្លាយតាមប្រព័ន្ធផ្សព្វផ្សាយ និងបណ្តាញទំនាក់ទំនងសង្គមនានា ដោយការផ្សាយព័ត៌មានពិត។
ទិវាសេរីភាពសារព័ត៌មានសកលលើកទី២៧នាឆ្នាំនេះ ត្រូវបានធ្វើឡើងក្នុងកាលៈទេសៈដែលសកលលោកទាំងមូលកំពុងប្រឈមនឹងវិបត្តិកូវីដ១៩។ សម្រាប់ប្រទេសកម្ពុជា នៅក្នុងឆ្នាំ២០២០នេះដែរ សេរីភាពសារព័ត៌មានរបស់កម្ពុជាបានថយចុះមួយលេខទៀត ពោលគឺទទួលបានជាប់ចំណាត់ថ្នាក់លេខ១៤៤ ក្នុងចំណោមប្រទេសចំនួន១៨០។ នេះបើតាមអង្គការអ្នកកាសែតគ្មានព្រំដែន(RSF) កាលពីថ្ងៃទី១៩ ខែមេសា។
ការធ្លាក់ចុះនៃពិន្ទុសេរីភាពសារព័ត៌មាននៅកម្ពុជា គឺបន្ទាប់ពីនាយកនៃការផ្សាយ TVFB ត្រូវចាប់ខ្លួន ក្រោមបទចោទញុះញង់ឲ្យប្រព្រឹត្តបទល្មើសជាអាទិ៍ តាមមាត្រា ៤៩៥ នៃក្រមព្រហ្មទណ្ឌកម្ពុជា ជុំវិញការផ្សព្វផ្សាយទាក់ទងនឹងជំងឺកូវីដ១៩។ រឿងក្តីប្រឆាំងនឹងអតីតអ្នកសារព័ត៌មាន ដែលនៅតែបន្តអូសបន្លាយ រួមនឹងការរៀបចំច្បាប់គ្រប់គ្រងប្រទេសក្នុងភាពអាសន្ន ដែលត្រូវបានអ្នកជំនាញសិទ្ធិមនុស្សអន្តរជាតិយល់ថាអាចបង្កគ្រោះថ្នាក់ដល់សិទ្ធិមនុស្ស។
ឆ្លៀតក្នុងឱកាសនៃទិវាសេរីភាពសារព័ត៌មាន ០៣ ឧសភា អង្គការអ្នកកាសែតនិងសិទ្ធិមនុស្សចំនួន៧៤ ក្នុងនោះក៏មានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងសម្ព័ន្ធអ្នកសារព័ត៌មានកម្ពុជា បានចេញលិខិតចំហរួមគ្នាមួយ ដោយអំពាវនាវជាថ្មី ទៅដល់បណ្តាមេដឹកនាំនៅក្នុងតំបន់អាស៊ី ក្នុងនោះក៏មានកម្ពុជាដែរ ដើម្បីឲ្យដោះលែងអ្នកកាសែតដែលកំពុងជាប់ឃុំ ក្នុងអំឡុងពេលដែលជំងឺកូវីដ១៩ កំពុងរាតត្បាតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ