លោក ឡុង ឌីម៉ង់៖ពលករខ្មែរ១រូបប្រឈមនឹងចំណាត់ការផ្លូវច្បាប់ និងបណ្តេញចេញពីកូរ៉េ បន្ទាប់ពីល្មើសនឹងបំរាមកូវីដ១៩
ចុះផ្សាយនៅថ្ងៃ៖
ស្តាប់ - ១៥:២៦
ក្រសួងការងារកម្ពុជាក៏ដូចជាស្ថានទូតកម្ពុជាប្រចាំនៅកូរ៉េខាងត្បូង បានអំពាវនាវព្រមៗគ្នា សុំឲ្យពលករខ្មែរ ដែលកំពុងបំរើការងារតាមវិស័យផ្សេងៗនៅប្រទេសកូរ៉េខាងត្បូង មានការអត់ធ្មត់កុំអាលមកលេងស្រុកខ្មែរ នៅក្នុងដំណាក់កាលនៃការរាតត្បាតមេរោគកូវីដ១៩នេះ។ ទោះយ៉ាងណា លោក ឡុង ឌីម៉ង់ ឯកអគ្គរាជទូតកម្ពុជាប្រចាំកូរ៉េខាងត្បូងបានបង្ហើបប្រាប់វិទ្យុបារាំងRFI នៅថ្ងៃនេះថា មានពលករខ្មែរ២នាក់ហើយ ដែលបានព្រមានដោយអាជ្ញាធរកូរ៉េ ខណៈពួកគាត់បានរត់ចេញពីកន្លែងចត្តាឡីស័កមុនកាលកំណត់ បន្ទាប់ពីត្រលប់ពីកម្ពុជាវិញក្រោយបុណ្យចូលឆ្នាំខ្មែរ។ លោក ឡុង ឌីម៉ង់ ក៏បានបញ្ជាក់ដែរថា ពលករម្នាក់ក្នុងចំណោម២នាក់នេះ កំពុងប្រឈមនឹងចំណាត់ការផ្លូវច្បាប់ និងអាចបណ្តេញចេញពីប្រទេសកូរ៉េ។ ដោយឡែកនិស្សិតស្រីខ្មែរម្នាក់ទៀតក៏កំពុងឆ្លងមេរោគកូវីដ១៩ម្នាក់ដែរ ក្រោយពីគាត់ធ្វើដំណើរពីអង់គ្លេសមកកម្ពុជា ហើយប្តូរជើងហោះហើរនៅប្រទេសកូរ៉េ។
