កូវីដ១៩៖ កម្ពុជាព្យាបាលជាសះស្បើយ០១ករណីថែមទៀត នៅសល់០២ករណី
គិតត្រឹមវេលាម៉ោង ៧និង៣០នាទីព្រឹក ថ្ងៃទី ០២ ឧសភា ២០២០នេះ កម្ពុជាពុំទាន់រកឃើញករណីជំងឺកូវីដ១៩ថ្មីទេទៀតនោះឡើយ ខណៈចំនួនអ្នកជាសះស្បើយបានកើនឡើងដល់១២០នាក់។ យោងតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា នៅថ្ងៃទី ០២ ឧសភានេះ កម្ពុជាបានព្យាបាលអ្នកជំងឺកូវីដ១៩ឲ្យជាសះស្បើយ០១ករណីថែមទៀត គឺជាបុរសជនជាតិខ្មែរអាយុ៥៨ឆ្នាំ ដែលស្នាក់នៅក្នុងសណ្ឋាគារមួយស្ថិតនៅក្នុងខេត្តព្រះសីហនុ។—
ចុះផ្សាយនៅថ្ងៃ៖
បុរសជនជាតិខ្មែររូបនេះ ជាអ្នកប៉ះពាល់ផ្ទាល់ជាមួយនឹងក្រុមអ្នកទេសចរបារាំងមានវីរុសកូវីដ១៩នៅក្នុងខេត្តព្រះសីហនុ និងជាអ្នកគ្រប់គ្រង និងធ្វើបដិសណ្ឋារកិច្ចផ្ទាល់ជាមួយភ្ញៀវទេសចរបារាំងទាំងអស់នោះ ត្រូវបានអនុញ្ញាតឲ្យចាកចេញពីបន្ទប់ព្យាបាលក្នុងសណ្ឋាគារមួយនៅក្រុងព្រះសីហនុ បន្ទាប់ពីទទួលការធ្វើតេស្តអវិជ្ជមានកូវីដ១៩ចំនួន ០២ដង។
សូមជំរាបជូនថា ស្ថានភាពជំងឺកូវីដ១៩នៅកម្ពុជា គិតត្រឹមថ្ងៃទី ០២ ឧសភានេះ គឺមាន១២២ករណីដដែល និងករណីជាសះស្បើយសរុបមានចំនួន១២០នាក់ ស្លាប់គ្មាន និងអ្នកជំងឺនៅសល់សំរាកព្យាបាលនៅពេទ្យចំនួន០២នាក់ទៀតប៉ុណ្ណោះ។ ប្រទេសកម្ពុជា បានរកឃើញករណីជំងឺកូវីដ១៩ដំបូងបំផុត នៅថ្ងៃទី ២៧ មករា ២០២០។
គួរកត់សំគាល់ដែរថា គិតត្រឹមថ្ងៃទី ០២ ឧសភានេះ គឺមានរយៈពេលជិត២០ថ្ងៃជាប់ៗគ្នាហើយ ដែលកម្ពុជាគ្មានករណីឆ្លងថ្មីនៃកូវីដ១៩នោះឡើយ ខណៈក្រសួងសុខាភិបាលបានឲ្យដឹងថា ខ្លួនបានធ្វើតេស្តចំនួន ១២២២២ ស្មើនឹង ៧៥២ ក្នុង១លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ