កូវីដ១៩៖ កម្ពុជារកឃើញ១២ករណីថែមទៀត ភាគច្រើនជាបុរសជនជាតិខ្មែរឥស្លាម
គិតត្រឹមថ្ងៃទី ១៧ មីនា កម្ពុជាបានរកឃើញអ្នកផ្ទុកជំងឺកូវីដ១៩ចំនួន១២ករណីថែមទៀត ភាគច្រើន គឺជាបុរសជនជាតិខ្មែរឥស្លាម និងបុរសជនជាតិខ្មែរម្នាក់ដែលទើបធ្វើដំណើរវិលត្រលប់មកពីប្រទេសថៃវិញ។ នេះគឺជាករណីឆ្លងច្រើនបំផុតមិនធ្លាប់មាននៅកម្ពុជា ដែលធ្វើឲ្យតួលេខអ្នកឆ្លងជំងឺកូវីដ១៩នៅកម្ពុជា បានកើនឡើងពី១២ករណី ដល់២៤ករណី គិតត្រឹមព្រឹកថ្ងៃទី ១៧ មីនានេះ។
ចុះផ្សាយនៅថ្ងៃ៖
ស្តាប់ - ០២:១១
អ្នកផ្ទុកជំងឺកូវីដ១៩ទាំង១២នាក់ដែលកម្ពុជាទើបនឹងរកឃើញថ្មីនេះ គឺ១១នាក់ជាបុរសជនជាតិខ្មែរឥស្លាម ដែលទើបធ្វើដំណើរវិលត្រលប់មកពីចូលរួមពិធីសាសនានៅប្រទេសម៉ាឡេស៊ី និងម្នាក់ទៀតជាបុរសជនជាតិខ្មែរ ដែលទើបធ្វើដំណើរត្រលប់មកពីប្រទេសថៃ។
យោងតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា នៅថ្ងៃទី ១៧ មីនានេះ បានឲ្យដឹងថា ក្នុងចំណោម១២ករណីថ្មីដែលកម្ពុជាបានរកឃើញវិជ្ជមានកូវីដ១៩នេះ គឺ២ករណីរកឃើញនៅក្នុងខេត្តបន្ទាយមានជ័យ គឺជាបុរសជនជាតិខ្មែរឥស្លាមម្នាក់ រស់នៅក្រុងសេរីសោភ័ណ និងម្នាក់ទៀតជាបុរសជនជាតិខ្មែរដែលទើបធ្វើដំណើរវិលត្រលប់មកពីប្រទេសថៃ។ បច្ចុប្បន្នពួកគេទាំងពីរនាក់ ត្រូវបានដាក់ឲ្យស្ថិតនៅក្រោមការព្យាបាលនៅមន្ទីរពេទ្យបង្អែកខេត្តបន្ទាយមានជ័យ។
ចំណែក១០ករណីទៀត ដែលសុទ្ធសឹងជាបុរសជនជាតិខ្មែរឥស្លាមនោះ គឺ២ករណីរកឃើញនៅភ្នំពេញក្នុងនៅតំបន់ព្រែកប្រា ២ករណីនៅខេត្តកំពង់ឆ្នាំង ៤ករណីនៅខេត្តបាត់ដំបង ០១ករណីនៅខេត្តកំពត និង០១ករណីទៀតនៅខេត្តត្បូងឃ្មុំ។ បច្ចុប្បន្នពួកគេទាំង១០នាក់ ត្រូវបានដាក់ឲ្យសម្រាកព្យាបាលនៅតាមមន្ទីរពេទ្យបង្អែកតាមខេត្តរៀងៗខ្លួន។ អ្វីជាការកត់សំគាល់ បុរសជនជាតិខ្មែរឥស្លាមទាំង១១នាក់ខាងលើនេះ គឺជាអ្នកក្នុងចំណោមអ្នកដែលបានវិលត្រលប់មកពីការចូលរួមពិធីសាសនានៅក្នុងប្រទេសម៉ាឡេស៊ីសរុបចំនួន៧៩នាក់។
គួរជំរាបជូនថា នេះគឺជាករណីឆ្លងជាក្រុមនិងច្រើនបំផុតមិនធ្លាប់មាននៅកម្ពុជា ដែលធ្វើឲ្យតួលេខអ្នកឆ្លងជំងឺកូវីដ១៩នៅកម្ពុជា បានកើនឡើងពី១២ករណី ដល់២៤ករណី គិតត្រឹមព្រឹកថ្ងៃទី ១៧ មីនា។ យ៉ាងណាក៏ដោយ ក្រុមឆ្លើយតបបន្ទាន់និងក្រុមគ្រូពេទ្យថ្នាក់ជាតិនិងថ្នាក់ក្រោមជាតិនៃក្រសួងសុខាភិបាល កំពុងបន្តតាមដានរកអ្នកដែលប៉ះពាល់សកម្ម ជាពិសេសអ្នកដែលបានទៅចូលរួមនៅក្នុងពិធីសាសនាឥស្លាម នៅក្នុងប្រទេសម៉ាឡេស៊ីកន្លងមកនេះថែមទៀត។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា នៅថ្ងៃទី ១៧ មីនានេះ។ សូមបញ្ជាក់ដែរថា នៅមុននេះ ស្រ្តីខ្មែរឥស្លាមពីរនាក់នៅក្នុងខេត្តព្រះវិហារក្នុងចំណោម១០នាក់ ក៏ត្រូវបានរកឃើញមានផ្ទុកជំងឺកូវីដ១៩ផងដែរ បន្ទាប់ពីវិលត្រលប់មកពីចូលរួមពិធីបុណ្យសាសនានៅក្នុងប្រទេសម៉ាឡេស៊ីកាលពីថ្ងៃទី ២៩ កុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ