កម្ពុជាបដិសេធបញ្ជូនអ្នកដំណើរលើនាវា Viking Cruise Journey ឲ្យមកស្នាក់នៅភ្នំពេញ
ប្រមុខរដ្ឋាភិបាលកម្ពុជាលោក ហ៊ុន សែន នៅល្ងាចម្សិលមិញនេះ បានប្រតិកម្មខ្លាំងៗទៅនឹងអង្គទូតនៃប្រទេសមួយចំនួន ដែលចង់ឲ្យកម្ពុជានាំយកជនជាតិខ្លួន ដែលជាអ្នកដំណើរលើនាវា Viking Cruise Journey មកសម្រាកនៅសណ្ឋាគារផ្កាយប្រាំក្នុងទីក្រុងភ្នំពេញ។ សូមបញ្ជាក់ថា នៅលើនាវានេះ មានជនបរទេសចំនួន៧សញ្ញាតិ។ ប៉ុន្តែយ៉ាងណាក៏ដោយ លោកនាយករដ្ឋមន្ត្រី ហ៊ុន សែន លើកឡើងថា លោកមិនប្រថុយយកអាយុជីវិតពលរដ្ឋខ្មែរ១៦លាននាក់ ទៅប្តូរនឹងអាយុជីវិតរបស់ជនបរទេសប៉ុន្មាននាក់ នេះឡើយ។—
ចុះផ្សាយនៅថ្ងៃ៖
ស្តាប់ - ០២:១៩
បើតាមការពន្យល់របស់លោកនាយករដ្ឋមន្ត្រី ហ៊ុន សែន ករណីនាវា Viking Cruise Journey នៅខេត្តកំពង់ចាម គឺមិនដូចករណីនាវា Westerdam នៅក្នុងខេត្តព្រះសីហនុនោះឡើយ។ មិនដូច គឺនៅលើនាវា Viking Cruise Journey នៅខេត្តកំពង់ចាម បានរកឃើញថា មានអ្នកផ្ទុកជំងឺកូវីដ១៩ចំនួន៣នាក់ ក្នុងចំណោមអ្នកដំណើរនិងបុគ្គលិកលើនាវាទាំងអស់៦៤នាក់។ ចំណែកឯករណីនាវា Westerdam ផ្ទុកមនុស្សជាងពីរពាន់នាក់ ដែលកម្ពុជាអនុញ្ញាតឲ្យចូលចតនៅក្នុងកំពង់ផែខេត្តព្រះសីហនុ កាលពីថ្ងៃទី ១៤ កុម្ភៈ គឺមិនមានករណីអ្នកផ្ទុកជំងឺកូវីដ១៩ ដែលកម្ពុជាបានរកឃើញនោះឡើយ។
ថ្លែងនៅក្នុងពិធីបើកពិធីបុណ្យទន្លេលើកទី០៦នៅក្នុងខេត្តបាត់ដំបង កាលពីល្ងាចម្សិលមិញនេះ ប្រមុខរដ្ឋាភិបាលកម្ពុជា លោក ហ៊ុន សែន ក៏បានបញ្ចេញប្រតិកម្មខ្លាំងៗទៅនឹងអង្គទូតនៃប្រទេសមួយចំនួន ដែលចង់ឲ្យកម្ពុជានាំយកជនជាតិខ្លួន ដែលជាភ្ញៀវទេសចរនៅលើនាវា Viking Cruise Journey នៅខេត្តកំពង់ចាមនេះ មកសម្រាកនៅសណ្ឋាគារផ្កាយប្រាំក្នុងទីក្រុងភ្នំពេញ។ បើទោះបីជាលោកមិនបញ្ចេញឈ្មោះអង្គទូតប្រទេសណាមួយក្តី ប៉ុន្តែលោកនាយករដ្ឋមន្ត្រី ហ៊ុន សែន បានអះអាងថា លោកមិនអាចធ្វើបានទេ ហើយលោកក៏មិនអាចយកអាយុជីវិតប្រជាជនខ្មែរ១៦លាននាក់ ទៅប្ដូរនឹងជីវិតរបស់ជនបរទេសប៉ុន្មាននាក់នេះឡើយ។
គួរជំរាបជូនថា នាវា Viking Cruise Journeyធ្វើដំណើរមកពីប្រទេសវៀតណាមនេះ មានផ្ទុកអ្នកដំណើរនិងបុគ្គលិកសរុប៦៤នាក់ ដែលរួមមាន៧សញ្ញាតិ ក្នុងនោះរួមមាន សហរដ្ឋអាមេរិកចំនួន១៤នាក់ (ស្រី៧ ប្រុស៧) អង់គ្លេស១១នាក់ (ស្រី៧ ប្រុស៤) កាណាដា ៤នាក់ (ស្រី២ ប្រុស២) ហូឡង់ ១ នាក់ (ស្រី) ភូមា ១ នាក់ (ប្រុស) វៀតណាម ៧ នាក់ (ប្រុស) និងកម្ពុជាចំនួន២៤នាក់ (ស្រី៦ ប្រុស១៨)។ ក្នុងចំណោមអ្នកដំណើរនិងបុគ្គលិកទាំង៦៤នាក់នេះ មានអ្នកដំណើរ បុរសនិងស្ត្រីជនជាតិអង់គ្លេស៣នាក់ ត្រូវបានគេរកឃើញមានជំងឺកូវីដ១៩ ហើយបច្ចុប្បន្នកំពុងសម្រាកព្យាបាលនៅក្នុងទីក្រុងភ្នំពេញ។ ចំណែកឯអ្នកដំណើរ និងបុគ្គលិកលើនាវាចំនួន៦១នាក់ ដែលនៅសេសសល់នៅលើនាវា ត្រូវបានអាជ្ញាធរខេត្តកំពង់ចាម បញ្ជូនឲ្យទៅស្នាក់នៅក្នុងសណ្ឋាគារមួយកន្លែង ក្នុងខេត្តកំពង់ចាម ដើម្បីរងចាំតាមដានសុខភាពក្នុងរយៈពេល១៤ថ្ងៃ បើទោះបីលទ្ធផលធ្វើតេស្តកាលពីថ្ងៃទី ១១ មីនា អវិជ្ជមានក៏ដោយ។ លោក អ៊ុន ចាន់ដា អភិបាលខេត្តកំពង់ចាមបានប្រាប់វិទ្យុបារំាងអន្តរជាតិថា បច្ចុប្បន្នអ្នកទាំង៦១នាក់នោះ មានសុខភាពល្អធម្មតា ប៉ុន្តែចាំបាច់ត្រូវធ្វើការតាមដានរយៈ១៤ថ្ងៃសិន ទើបអនុញ្ញាតអោយពួកគេចាកចេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ