សមត្ថកិច្ចបំបែកយុវជនបក្សសង្គ្រោះជាតិដែលជួបជុំនៅទីលានប្រជាធិបតេយ្យ
យុវជនគណបក្សសង្គ្រោះជាតិមួយក្រុមដែលមានគ្នា៩នាក់ បានប៉ុនប៉ងជួបជុំគ្នានៅទីលានប្រជាធិបតេយ្យនៅព្រឹកថ្ងៃព្រហស្បតិ៍នេះ ដើម្បីទាមទាររកយុត្តិធម៌ជូនជនរងគ្រោះដែលបានស្លាប់ក្នុងអំពើហិង្សា កាលពីថ្ងៃទី៣មករា។ ប៉ុន្តែ ពួកគេត្រូវបាន កម្លាំងសមត្ថកិច្ចបំបែក។ អង្គការសិទ្ធិមនុស្ស អះអាងថា គ្មានទីកន្លែងសម្រាប់បញ្ចេញមតិទៀតទេ។ ប៉ុន្តែ មន្ត្រីអាជ្ញាធរបញ្ជាក់ថា ការជួបជុំធ្វើបាតុកម្មនឹងបើកឲ្យធ្វើឡើងវិញនៅពេលណាដែលស្ថានការណ៍វិលទៅរកភាពប្រក្រតីឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់
យុវជនគណបក្សសង្គ្រោះជាតិមួយក្រុមដែលមានគ្នាតែ៩នាក់ប៉ុណ្ណោះ បានមកជួបជុំគ្នានៅទីលានប្រជាធិបតេយ្យនៅព្រឹកថ្ងៃព្រហស្បតិ៍ទី០៩មករានេះ ដើម្បីសម្តែងមតិតវ៉ា។ ប៉ុន្តែ ពួកគេត្រូវបានសមត្ថកិច្ចបំបែកភ្លាម។ ក្រុមអ្នកកាសែត និងក្រុមអង្គការសង្គមស៊ីវិលដែលបានតាមដានបញ្ហានេះក៏ត្រូវបានសមត្ថកិច្ចបណ្តេញដែរ។
កញ្ញា លីម គីមស័រ តំណាងយុវជនគណបក្សសង្គ្រោះជាតិ និងជាជំនួយការរបស់អ្នកស្រី មួរ សុខហួរ បានប្រាប់វិទ្យុបារាំងថា បានជាក្រុមយុវជនគណបក្សសង្គ្រោះជាតិ៩នាក់បានមកជុំគ្នានៅលើទីលានប្រជាជាធិបតេយ្យ ពីព្រោះអាជ្ញាធរបានហាមមិនឲ្យមានការជួបជុំគ្នាចាប់ពី១០នាក់ឡើងទៅ។
ក្រុមយុវជនទាំងនោះមានបំណងជួបជុំគ្នាសម្តែងមតិស្វែងរកយុត្តិធម៌ជូនជនរងគ្រោះដែលត្រូវបានស្លាប់ និងរងរបួសក្នុងការប៉ះទង្គិចគ្នា និងទាមទារឲ្យមានការបោះឆ្នោតសាឡើងវិញ។ បន្ទាប់ពីការបំបែកនោះ ក្រុមយុវជនគណបក្សសង្គ្រោះជាតិក៏បានធ្វើដំណើរទៅអង្គការលីកាដូ ដើម្បីរក្សាសុវត្ថិភាពជាបណ្តោះអាសន្ន ពីព្រោះពួកគេយល់ថា សមត្ថកិច្ចបានតាមដានពួកគេពីក្រោយ។ នេះបើយោងតាមកញ្ញា លីម គីមស័រ ។
ប៉ុន្តែ លោក ឡុង ឌីម៉ង់ អ្នកនាំពាក្យរបស់សាលារាជធានីភ្នំពេញបដិសេធថា អាជ្ញាធរមិនបានចេញបម្រាមមិនឲ្យមានការជួបជុំមនុស្ស១០នាក់ ដូចការលើកឡើងរបស់យុវជនគណបក្សប្រឆាំងទេ។ លោកបញ្ជាក់ថា ការបំបែកក្រុមយុវជនរបស់គណបក្សសង្គ្រោះជាតិនៅលើទីលានប្រជាធិបតេយ្យគឺ ដោយសារតែពួកគាត់មិនបានសុំច្បាប់អនុញ្ញាតពីអាជ្ញាធរមុននឹងប្រមូលផ្តុំគ្នា។
លោក ឡុង ឌីម៉ង់ បានអះអាងថា សាលាក្រុងភ្នំពេញនិងអនុញ្ញាតឲ្យមានការជួបជុំ និងធ្វើបាតុកម្មវិញ នៅពេលណាដែលស្ថានការណ៍នៅក្នុងសង្គម វិលមករកភាពប្រក្រតីឡើងវិញ។
ភ្លាមៗនោះដែរ អង្គការអាដហុក បានចេញសេចក្តីថ្លែងការណ៍មួយរិះគន់ការបំបិទសិទ្ធិសេរីភាពសម្តែងមតិ។ អាដហុកក៏បានរម្លឹកដល់រដ្ឋាភិបាលកម្ពុជាថា សិទ្ធក្នុងការប្រមូលផ្តុំគ្នាដោយសេរី គឺជាមូលដ្ឋានគ្រឹះដ៏សំខាន់របស់លទ្ធិប្រជាធិបតេយ្យ ដែលត្រូវបានទទួលស្គាល់ ទាំងច្បាប់នៅក្នុងស្រុក និងអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ