លោកនាយករដ្ឋមន្រ្តីចិនទៅទស្សនកិច្ចនៅអាល្លឺម៉ង់ដើម្បីពង្រឹងទំនាក់ទនងសេដ្ឋកិច្ច
នៅថ្ងៃសុក្រ ទី១០ តុលានេះ លោកនាយករដ្ឋមន្រ្តីចិនលី ខឺឈាំងបានផ្តើមទស្សនកិច្ចនៅក្នុងប្រទេសអាល្លឺម៉ង់។ អាល្លឺម៉ង់ និងចិនដែលជាប្រទេសជើងឯកខាងនំាទំនិញចេញដូចគ្នា។ កម្មវត្ថុនៃទស្សនកិច្ចរបស់លោកប្រមុខរដ្ឋាភិបាលចិន គឺដើម្បីពង្រឹងបន្ថែមទៀតនូវទំនាក់ទំនងឯកសិទ្ធិរវាងប្រទេសមហាអំណាចពាណិជ្ជកម្មទំាងពីរ។ ដោយឡែក និងក្រៅពីប្រយោជន៍សេដ្ឋកិច្ចរវាងគ្នា ក៏នៅមានប្រធានរឿងខ្លះដែលចិនមិនចង់ឮ ពិសេសទាក់ទងនឹងរឿងសិទ្ធិមនុស្សក្នុងប្រទេសចិន។
ចុះផ្សាយនៅថ្ងៃ៖
ស្តាប់ - ០២:១៩
ដំណើរទស្សនកិច្ចរបស់លោកនាយករដ្ឋមន្រ្តីចិនលឺ ខឺឈាំងនៅក្នុងប្រទេសអាល្លឺម៉ង់ថ្ងៃនេះបានអមដំណើរដោយសមាជិករដ្ឋាភិបាលចិនចំនួន ១៤រូបផ្សេងទៀត។ វត្តមានសមាជិករដ្ឋាភិបាលចិនដ៏ច្រើននេះក៏ដោយសារថា អាល្លឺម៉ង់ជាប្រទេសតែមួយគត់នៅក្នុងលោកដែលចិនបន្តរក្សាទំនាក់ទំនងជាលក្ខណៈអន្តររដ្ឋាភិបាល។ គឺជាទំនាក់ទំនងឯកសិទ្ធិមួយក្នុងនាមអាល្លឺម៉ង់ជាប្រទេសដៃគូទី១ របស់ចិននៅក្នុងទ្វីបអឺរ៉ុប និងក្នុងនាមចិនជាប្រទេសដៃគូទី៣ របស់អាល្លឺម៉ង់នៅក្នុងពិភពលោក។ ទស្សនកិច្ចនៅអាល្លឺម៉ង់របស់លោកប្រមុខរដ្ឋាភិបាលចិនពេលនេះបានធ្វើឡើងតែប៉ុន្មានខែប៉ុណ្ណោះ បន្ទាប់ពីទស្សនកិច្ចរបស់លោកប្រធានាធិបតីចិនស៊ី ជីនពីង។ រីឯលោកស្រីនាយករដ្ឋមន្រ្តីអាល្លឺម៉ង់បានទៅទស្សនកិច្ចក្នុងប្រទេសចិនចំនួន ៧ដងដែលចង់ក្រោយកាលពីខែកក្កដាកន្លងទៅថ្មីៗនេះ។
អាល្លឺម៉ង់ និងចិន គឺជាប្រទេសមហាអំណាចពាណិជ្ជកម្មមានជើងឯកក្នុងវិស័យនំាចេញ និងដែលការដោះដូរពាណិជ្ជកម្មរវាងគ្នាកាលពីឆ្នំា ២០១៣ មានទឹកប្រាក់ដល់ទៅ ១៤០ ០០០លានអឺរ៉ូ ក្នុងនោះ អាល្លឺម៉ង់បានទិញទំនិញចិនក្នុងទឹកប្រាក់ ៧៣ ០០០លានអឺរ៉ូ រីឯចិនវិញបានទិញទំនិញអាល្លឺម៉ង់តែក្នុងទឹកប្រាក់ ៦៧ ០០០លានអឺរ៉ូប៉ុណ្ណោះ។ ជារួម សេដ្ឋកិច្ចអាល្លឺម៉ង់កំពុងពឹងពាក់យ៉ាងខ្លំាងលើសេដ្ឋកិច្ចចិន។ អ៊ីចឹងហើយបានកំណើនសេដ្ឋកិច្ចចិនធ្លាក់ចុះកំពុងធ្វើឲ្យក្រុមអ្នកសេដ្ឋកិច្ចអាល្លឺម៉ង់ព្រួយបារម្ភយ៉ាងខ្លំាង។ យ៉ាងណាក៏ដោយ រដ្ឋាភិបាលនៃប្រទេសទំាងពីរបានសន្យាបង្កើនការដោះដូរពាណិជ្ជកម្មរវាងគ្នាឲ្យបាន ២០០ ០០០លានអឺរ៉ូសម្រាប់ឆ្នំាខាងមុខ។ ក្រៅពីកិច្ចសហប្រតិបត្តិការក្នុងផ្នែកសុខាភិបាល និងការការពារបរិស្ថាន ក៏នៅមានកិច្ចសន្យាពាណិជកម្មផ្សេងទៀតដែលនឹងចុះហត្ថលេខានាដំណើរទស្សនកិច្ចរបស់លោកលី ខឺឈាំងថ្ងៃនេះ។ កិច្ចសន្យាពាណិជ្ជកម្មដែលនឹងអាចមានទឹកប្រាក់ ២ ០០០លានដុល្លារ នេះបើតាមលោករដ្ឋមន្រ្តីសេដ្ឋកិច្ចអាល្លឺម៉ង់។
ក្រៅពីរឿងសេដ្ឋកិច្ច ក៏នៅមានរឿងចម្រូងចម្រាសមួយចំនួន ដូចយ៉ាងសិទ្ធិសេរីភាពក្នុងការបញ្ចេញមតិ និងការគោរពសិទ្ធិមនុស្សនៅក្នុងប្រទេសចិន។ គឺជាប្រធានរឿងដែលលោកស្រីនាយរដ្ឋមន្រ្តីអាល្លឺម៉ង់មិនអាចបោះបង់បាន តែលោកស្រីក៏មិនចង់ប្រើពាក្យពេចន៍ដែលនំាឲ្យចិនក្តៅក្រហាយដែរ។ ក្រសួងការបរទេសចិនបានធានាថា ចិនត្រៀមខ្លួននឹងនិយាយពីបញ្ហាសិទ្ធិមនុស្ស តែដោយផ្អែកលើមូលដ្ឋាននៃការគោរពគ្នាទៅវិញ ទៅមក និងមិនត្រូវមានការចូលជ្រៀតជ្រែកកិច្ចការផ្ទៃក្នុងរបស់អ្នកដទៃទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ