លោកស៊ូរិយ៉ា ស៊ូបេឌីទស្សនកិច្ចពិនិត្យប្រព័ន្ធបោះឆ្នោតនៅកម្ពុជា
អ្នករាយការណ៍ពិសេសរបស់អង្គការសហប្រជាជាតិស្តីពី "បញ្ហាសិទ្ធិមនុស្ស"នៅកម្ពុជា លោកស៊ូរិយ៉ា ស៊ូបេឌី នឹងបំពេញទស្សនកិច្ច ៧ ថ្ងៃនៅកម្ពុជានៅក្នុងសប្តាហ៍ក្រោយនេះ។ ដំណើរទស្សនកិច្ចលើកទី ៦ របស់អ្នករាយការណ៍ពិសេសអង្គការសហប្រជាជាតិនឹងផ្តោតទៅលើប្រព័ន្ធ និងការរៀបចំការបោះឆ្នោតនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២២
អ្នករាយការណ៍ពិសេសរបស់អង្គការសហប្រជាជាតិស្តីពីបញ្ហាសិទ្ធិមនុស្សនៅកម្ពុជា លោកស៊ូរិយ៉ា ស៊ូបេឌីនឹងផ្តើមទស្សនកិច្ចរបស់លោកនៅកម្ពុជាចាប់ពីថ្ងៃទី៥ដល់ថ្ងៃទី១១ខែធ្នូ។ ប្រព័ន្ធបោះឆ្នោត និងការរៀបចំការបោះឆ្នោតគឺជាប្រធានបទនៃតំណើរទស្សនកិច្ចលើទី៦របស់លោកស៊ូរិយ៉ា ស៊ូបេឌីនៅកម្ពុជា។ នេះបើតាមសេចក្តីប្រកាសព័ត៌មានរបស់ការិយាល័យសិទ្ធិមនុស្សអង្គការសហប្រជាជាតិប្រចាំទីក្រុងហ្សឺណែវ។
លោកស៊ូរិយ៉ា ស៊ូបេឌី បានសរសេរប្រាប់នៅក្នុងសេចក្តីប្រកាសព័ត៌មានរបស់លោកថា នៅក្នុងដំណើរទស្សនកិច្ចរបស់លោកលើកនេះ លោកនឹងវិភាគលើប្រព័ន្ធបោះឆ្នោត និងស្ថាប័នពាក់ព័ន្ធមួយចំនួនទៅតាមទស្សនៈវិស័យសិទ្ធិមនុស្ស ហើយលោកក៏នឹងបន្តតាមដានមើលផងដែរ ទៅលើទិដ្ឋភាពផ្សេងៗនៃស្ថានភាពសិទ្ធិមនុស្សកម្ពុជា។
នៅក្នុងដំណើរទស្សនកិច្ចរយៈពេល៧ថ្ងៃនេះ អ្នករាយការណ៍ពិសេសអង្គការសហប្រជាជាតិគ្រោងជួបពិភាក្សាជាមួយមន្ត្រីរដ្ឋាភិបាល សង្គមស៊ីវិល គណៈកម្មាធិការរៀបចំការបោះឆ្នោតថ្នាក់ជាតិ និងថ្នាក់ខេត្ត ក្រុមប្រឹក្សាធម្មនុញ្ញ ហើយលោកក៏រំពឹងជួបជាមួយ អគ្គស្នងការនគរបាលជាតិផងដែរ។
លោកស៊ូរិយ៉ា ស៊ូបេឌី ត្រូវបានការិយាល័យសិទ្ធិមនុស្សអង្គការសហប្រជាជាតិតែងតាំងជាអ្នករាយការណ៍ពិសេសស្តីពីបញ្ហាសិទ្ធិមនុស្សនៅកម្ពុជានៅខែមិនាឆ្នាំ២០០៩។
ដំណើរទស្សនកិច្ចក្នុងពេលកន្លងទៅរបស់អ្នករាយការណ៍ពិសេស បានផ្តោតទៅលើបញ្ហាការបណ្តេញចេញដោយបង្ខំបញ្ហាតុលាការនិងបញ្ហាសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ