ប្រជាជនទាមទារឲ្យអភិបាលរដ្ឋចុះចេញពីតំណែងបន្ទាប់ពីមានករណីរំលោភសេពសន្ថវៈថ្មីទៀតនៅឥណ្ឌា
មានករណីរំលោភសេពសន្ថវៈ និងសម្លាប់ស្ត្រី ថ្មីៗផ្សេងទៀត បានកើតឡើងនៅរដ្ឋ ឧត្តាប្រដេហ្ស ប្រទេសឥណ្ឌា។ អាជ្ញាធរមូលដ្ឋានត្រូវបានប្រជាជន ទាមទារឲ្យចុះចេញពីដំណែង ដោយសារតែអាជ្ញាធរនេះអសមត្ថភាព ក្នុងការលុបបំបាត់បទឧក្រិដ្ឋ និងអំពើហិង្សាទៅលើស្រ្តី។ កាលពីចុងខែឧសភាកន្លងមកនេះ មានយុវតីអាយុ១២ឆ្នាំម្នាក់ និង ១៤ឆ្នាំម្នាក់ ត្រូវបានគេរកឃើញស្លាប់ ដោយចងព្យួរកនៅលើដើមស្វាយ បន្ទាប់ពីត្រូវបានរំលោភសេពសន្ថវៈ។ ក្រុមគ្រួសារជនរងគ្រោះ បានចោទប្រកាន់អាជ្ញាធរ ថាបានព្រងើយកន្តើយ មិនព្រមវែកមុខរកជនល្មើស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
នៅថ្ងៃព្រហស្បតិ៍ម្សិលមិញនេះ មានករណីរំលោភសេពសន្ថវៈមួយទៀតបានកើតឡើង ដោយជនរងគ្រោះជាស្រ្តីមានអាយុ១៩ឆ្នាំ ត្រូវបានជនល្មើសរំលោភរួចសម្លាប់ចោល ហើយយកទៅចងព្យួរនឹងដើមឈើ។ ប៉ុន្មានថ្ងៃមុននេះផងដែរ ស្ត្រីម្នាក់ទៀតបានដាក់ពាក្យប្តឹង ចោទក្រុមនគរបាលមូលដ្ឋាន៤នាក់ ពីបទរំលោភសេពសន្ថវៈ នៅទីស្នាក់ការនគរបាលផ្ទាល់តែម្តង។ ស្រ្តីរងគ្រោះបានអះអាងថាពួកនគរបាល បានចាប់រំលោភគាត់ដោយសារតែគាត់បានបដិសេធ មិនបង់ប្រាក់សូកប៉ាន់ដើម្បីលោះប្តីគាត់ចេញពីឃុំ។
លោកស្រីប្រធានគណៈកម្មាធិការជាតិការពារស្រ្តី បានមានប្រសាសន៍ចោទត្រង់ៗទៅលើថ្នាក់ដឹកនាំរដ្ឋ ឧត្តាប្រដេហ្ស ថាអសមត្ថភាព ហើយមិនស័កិ្តសមបន្តតួនាទីតទៅទៀតទេ។ លោកស្រីបន្តថា អាជ្ញាធរនេះ មិនត្រឹមតែមិនបានរូតរះ ចាត់វិធានការទប់ស្កាត់បទឧក្រិដ្ឋហើយ ថែមទាំងគ្មានការទទួលខុសត្រូវ បណ្តោយឲ្យមន្ត្រីនគរបាលក្រោមបង្គាប់ ប្រព្រឹត្តបទល្មើសដ៏ថោកទាបនេះ។
រដ្ឋ ឧត្តាប្រដេហ្ស គឺជារដ្ឋដែលមានប្រជាជនច្រើនជាងគេនៅឥណ្ឌា ប៉ុន្តែរដ្ឋនេះ ជារដ្ឋដែលមានការអភិវឌ្ឍន៍ នៅយឺតយ៉ាវជាងគេ ទាំងវិស័យសន្តិសុខ វិស័យអប់រំ និងសុខាភិបាល។ កាលពីឆ្នាំ២០១២ មានបទឧក្រិដ្ឋធ្វើឡើងទៅលើស្ត្រីចំនួនជាង២៣០០០ករណី។ យើងនៅចាំមិនភ្លេចទេថា កាលពីចុងឆ្នាំ២០១២ ករណីរំលោភនិងសម្លាប់និសិ្សតស្រីម្នាក់នៅក្នុងរថយន្តក្រុងនៅទីក្រុងញូវដាលី បានបង្កឲ្យមានភាពរំជើបរំជួលទូទាំងប្រទេស។ ក្រោយហេតុការណ៍នោះ ថ្វីដ្បិតតែមានការរិតបន្តឹងច្បាប់យ៉ាងណាក៏ដោយ ក៏អាជ្ញាធរឥណ្ឌានៅតែមិនអាច ទប់ស្កាត់បទល្មើសផ្លូវភេទបាននៅឡើយទេ។ តាមតួលេខផ្លូវការឥណ្ឌា មានករណីរំលោភសេពសន្ថវៈ រៀងរាល់២២នាទីម្តងក្នុងប្រទេសឥណ្ឌា។ លោកនាយករដ្ឋមន្ត្រីថ្មី ដែលទើបនឹងជាប់ឆ្នោត នរិន្ទ្រ ម៉ូឌី និងអញ្ជើញជួបផ្ទាល់ជាបន្ទាន់ជាមួយអភិបាលរដ្ឋ ឧត្តាប្រដេហ្ស។ អភិបាលរដ្ឋនេះ អាចនឹងប្រឈមមុខនឹងការដកចេញពីតំណែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ