អតីតនាយករដ្ឋមន្រ្តីបារាំង ដូមីនិក ដឺវីឡឺប៉ាំង ផ្តាច់ខ្លួនទៅបង្កើតគណបក្សថ្មី
នៅថ្ងៃសៅរ៍ ទី១៩ មិថុនា ២០១០នេះ លោកដូមីនិក ដឺវីឡឺប៉ាំង (Dominique de Villepin) អតីតនាយករដ្ឋមន្រ្តីបារាំង មកពីគណបក្សស្តាំនិយម UMP ប្រកាសបង្កើតគណបក្ស ថ្មីមួយ ដើម្បីប្រកួតប្រជែងជាមួយលោកនីកូឡា សាកូហ្ស៊ី (Nicolas Sarkozy) ប្រធានាធិបតីមកពីគណបក្សជាមួយគ្នា។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សេង ឌីណា
ជម្លោះរវាងដូមីនិក ដឺវីឡឺប៉ាំង និងនីកូឡា សាកូហ្ស៊ី នៅតែបន្តកើតមានដូចកុនភាគ។ ចប់ពីរឿងមួយ ចូលដល់រឿងមួយទៀត។
ឥស្សរជននយោបាយស្តាំនិយមទាំងពីររូបនេះ ចេញមកពីគណបក្សជាមួយគ្នា (គណបក្ស UMP) ហើយធ្លាប់ជារដ្ឋមន្រ្តីក្នុងរដ្ឋាភិបាលជាមួយគ្នា នៅពេលដែលលោកហ្សាក់ ស៊្ហីរ៉ាក់ (Jacques Chirac) ធ្វើជាប្រធានាធិបតី។ បន្ទាប់មក លោកវីឡឺប៉ាំងបានឡើងធ្វើជានាយករដ្ឋមន្រ្តី ហើយលោកសាកូហ្ស៊ី នៅជារដ្ឋមន្រ្តីក្រសួងមហាផ្ទៃ។ ពេលលោកស៊្ហីរ៉ាក់ផុតអាណត្តិ ហើយគណបក្ស UMP ត្រូវរកបេក្ខជនប្រធានាធិបតីថ្មី ជម្លោះវីឡឺប៉ាំង-សាកូហ្ស៊ី បានលេចចេញរូបរាងកាន់តែច្បាស់ឡើង។
ទីបំផុត នៅឆ្នាំ២០០៧ គឺលោកសាកូហ្ស៊ី ដែលឈរឈ្មោះជាបេក្ខជនគណបក្ស UMP ។ ចំណែកលោកវីឡឺប៉ាំងវិញ មិនត្រឹមតែមិនជួយឃោសនាបោះឆ្នោតឲ្យគណបក្ស UMP នោះទេ ប៉ុន្តែ ថែមទាំងបានរិះគន់លោកសាកូហ្ស៊ី នៅក្នុងអំឡុងយុទ្ធនាការឃោសនាបោះឆ្នោតនេះទៀតផង។
ក្រោយពេលលោកសាកូហ្ស៊ីឈ្នះឆ្នោតឡើងធ្វើជាប្រធានាធិបតី ហើយលោកវីឡឺប៉ាំងបញ្ចប់តំណែងជានាយករដ្ឋមន្រ្តី ជម្លោះរវាងអ្នកនយោបាយទាំងពីររូបនេះ បានរាលដាលទៅជាក្តីក្តាំនៅក្នុងតុលាការវិញម្តង ក្នុងសំណុំរឿង Clearstream។ ក្នុងសំណុំរឿងនេះ លោកវីឡឺប៉ាំងត្រូវបានគេចោទប្រកាន់ថាបានព្យាយាមបង្ខូចឈ្មោះលោកសាកូហ្ស៊ី ក្នុងគោលដៅរារាំងមិនឲ្យលោកឈរឈ្មោះជាប្រធានាធិបតី។ ទីបំផុត តុលាការបានសម្រេចលើកលែងការចោទប្រកាន់លើលោកវីឡឺប៉ាំង។ សំណុំរឿងនេះនឹងត្រូវបន្តទៅសាលាឧទ្ធរណ៍ទៀត ក៏ប៉ុន្តែ សេចក្តីសម្រេចរបស់សាលាដំបូង គឺជាជោគជ័យដ៏ធំធេងមួយរបស់លោកវីឡឺប៉ាំង។ ប្រជាប្រិយភាពរបស់លោកវីឡឺប៉ាំងបានបន្តកើនឡើង រហូតឡើងខ្ពស់ជាងលោកសាកូហ្ស៊ីយ៉ាងឆ្ងាយ (វីឡឺប៉ាំង ៥៧% សាកូហ្ស៊ី ៣៣%)។
នៅថ្ងៃទី១៩ មិថុនា ២០១០នេះ ជម្លោះវីឡឺប៉ាំង-សាកូហ្ស៊ី បានឈានដល់វគ្គថ្មីមួយទៀត គឺការប្រកួតប្រជែងក្នុងការបោះឆ្នោតប្រធានាធិបតី នៅឆ្នាំ២០១២ខាងមុខ។ លោកវីឡឺប៉ាំងនៅមិនទាន់បានប្រកាសថានឹងឈរឈ្មោះជាប្រធានាធិបតីនៅឆ្នាំ២០១២នេះនៅឡើយទេ ក៏ប៉ុន្តែ លោកបានប្រកាសយ៉ាងច្បាស់ថា គណបក្សថ្មីដែលលោកបង្កើតឡើង នៅថ្ងៃនេះ គឺបង្កើតដើម្បីប្រកួតប្រជែងជាមួយលោកសាកូហ្ស៊ី។ សមាជិកគណបក្ស UMP មួយចំនួន ដែលរួមមានទាំងមន្រ្តីរដ្ឋាភិបាល និងអ្នកតំណាងរាស្រ្តផង បានប្រកាសថានឹងចូលរួមក្នុងគណបក្សដែលលោកវីឡឺប៉ាំងបង្កើតថ្មីនេះ។ ក៏ប៉ុន្តែ ចំនួនអ្នកបំបែកខ្លួននេះ មានមិនច្រើន ដែលអាចធ្វើឲ្យគណបក្ស UMP ត្រូវបែកជាពីរនោះទេ។
អ្នកវិភាគជាច្រើនយល់ថា បើទោះជាលោកវីឡឺប៉ាំងជាឥស្សរជន ដែលកំពុងមានប្រជាប្រិយភាព ប៉ុន្តែ បើសិនជាគាត់ឈរឈ្មោះ គាត់មិនប្រាកដថានឹងទទួលបានជ័យជំនះក្នុងការបោះឆ្នោតប្រធានាធិបតី នៅឆ្នាំ២០១២នេះទេ។ ក្នុងការស្ទាបស្ទង់មតិកន្លងមក មានមនុស្សជាច្រើនដែលឆ្លើយថា ស្រឡាញ់ចូលចិត្តលោកវីឡឺប៉ាំង តែមិនចង់ឲ្យគាត់ធ្វើជាប្រធានាធិបតីបារាំង។ ជម្លោះផ្ទាល់ខ្លួនរ៉ាំរ៉ៃរវាងលោកវីឡឺប៉ាំង និងលោកសាកូហ្ស៊ី អាចនឹងធ្វើឲ្យគេមើលឃើញថា ប្រសិនបើលោកវីឡឺប៉ាំងឈរឈ្មោះជាប្រធានាធិបតី គឺឈរឈ្មោះក្នុងគោលដៅឆាឆៅលោកសាកូហ្ស៊ី ដើម្បីសងសឹក ក្នុងគំនុំផ្ទាល់ខ្លួនតែប៉ុណ្ណោះ មិនមែនធ្វើដើម្បីប្រយោជន៍ជាតិនោះទេ។
សម្រាប់គណបក្ស UMP និងក្រុមអ្នកគាំទ្រលោកសាកូហ្ស៊ី គេមិនខ្លាចចាញ់លោកវីឡឺប៉ាំង ក្នុងការបោះឆ្នោត នៅឆ្នាំ២០១២នេះទេ។ អ្វីដែលគេខ្លាច គឺខ្លាចលោកវីឡឺប៉ាំង និងគណបក្សថ្មីរបស់គាត់ មកបំបែកសំឡេងគណបក្ស UMP ហើយលទ្ធផលចុងក្រោយ គណបក្សទាំងពីរនឹងធ្លាក់ទឹកទាំងអស់គ្នា។ ឯអ្នកទទួលផលចំណេញ គឺគណបក្សប្រឆាំងឯណោះ!!!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ