វៀតណាមហាមមន្រ្តីរដ្ឋាភិបាលកុំឲ្យដុតលុយខ្មោចដើម្បីសន្សំសំចៃ
នៅក្នុងពេលដែលសេដ្ឋកិច្ចជាតិកំពុងជួបនឹងបញ្ហា រដ្ឋាភិបាលវៀតណាមបានដាក់ចេញនូវនយោបាយរឹតបន្តឹងការចំណាយរបស់រដ្ឋ ហើយការកម្រិតការចំណាយនេះមិនត្រឹមតែធ្វើឡើងចំពោះការចាយលុយមែនទែននោះទេ សូម្បីតែការដុតលុយខ្មោចក៏ត្រូវហាមឃាត់ដែរ។
ចុះផ្សាយនៅថ្ងៃ៖
ស្តាប់ - ០១:៤៧
នៅក្នុងក្រឹត្យចុះហត្ថលេខាដោយលោកនាយករដ្ឋមន្រ្តី ង្វៀន តាន់ហ្ស៊ុង កាលពីថ្ងៃចន្ទ ហើយដែលនឹងត្រូវចុះផ្សាយជាសាធារណៈនៅចុងសប្តាហ៍នេះ រដ្ឋាភិបាលវៀតណាមបានចេញបញ្ជាទៅដល់គ្រប់មន្រ្តីរដ្ឋការទាំងអស់ឲ្យកាត់បន្ថយការចំណាយទិញកម្រងផ្កា នៅក្នុងពិធីបុណ្យសព ដើម្បីស្តារមុខមាត់រដ្ឋាភិបាល កុំឲ្យប្រជាជនចោទប្រកាន់ថា រដ្ឋចាយលុយខ្ជះខ្ជាយ នៅក្នុងពេលដែលប្រទេសជាតិកំពុងជួបនឹងបញ្ហាសេដ្ឋកិច្ច។
យោងតាមក្រឹតនេះ ចំនួនកម្រងផ្កា នៅក្នុងពិធីបុណ្យសពនឹងត្រូវកម្រិតត្រឹមតែ ពី ៥ ទៅ ៣០ប៉ុណ្ណោះ អាស្រ័យទៅលើឋាន្តរសក្តិរបស់មន្រ្តី ដែលទទួលមរណភាព។ តាមរយៈក្រឹត្យនេះ រដ្ឋាភិបាលវៀតណាមក៏បានចេញបញ្ជាផងដែរឲ្យគ្រប់មន្រ្តីរដ្ឋការទាំងអស់បញ្ឈប់ការដុតលុយខ្មោច។
តាមប្រពៃណីទំនៀមទម្លាប់វៀតណាម នៅក្នុងពិធីបុណ្យសព ឬពិធីបុណ្យពិសេសមួយចំនួនផ្សេងទៀត គេតែងតែនាំគ្នាដុតក្រដាសខ្មោច ព្រមទាំងសម្ភារៈផ្សេងទៀត ដែលធ្វើពីក្រដាស ដូចជា ផ្ទះ ឡាន ទូរស័ព្ទដៃទំនើប ។ល។ ដើម្បីជាការឧទ្ទិសទៅដល់ព្រលឹងរបស់អ្នកស្លាប់ផង និងដើម្បីជាការបង្ហាញពីឋានៈ និងភាពមានបានរបស់អ្នកដែលនៅរស់ផង។
ការដាក់ចេញនូវបទបញ្ជាបែបនេះ ត្រូវធ្វើឡើង នៅក្នុងពេលដែលរដ្ឋាភិបាលកុម្មុយនិស្តវៀតណាម កំពុងតែប្រឈមមុខនឹងការរិះគន់ពីសំណាក់ប្រជាជន ដែលមិនសប្បាយចិត្តចំពោះចំណាត់ការក្នុងការដោះស្រាយបញ្ហាសេដ្ឋកិច្ច ចំពោះអំពើពុករលួយ និងការចាយលុយខ្ជះខ្ជាយរបស់មន្រ្តីរដ្ឋការ។
ក្រឹត្យនេះនឹងត្រូវអនុវត្តចំពោះមន្រ្តីវៀតណាមគ្រប់ជាន់ថ្នាក់ រាប់តាំងពីមន្រ្តីរដ្ឋការតូចតាច រហូតដល់ថ្នាក់ដឹកនាំនយោបាយ កម្មាភិបាលបក្សកុម្មុយនិស្ត និងបុគ្គលិកក្រុមហ៊ុនរបស់រដ្ឋ។
មានមន្រ្តីវៀតណាមខ្លះ បានលើកឡើងថា ការដាក់កម្រិតការចំណាយលើការទិញកម្រងផ្កា នៅក្នុងពិធីបុណ្យសព គឺជារឿងសមហេតុផល ក៏ប៉ុន្តែ ការហាមឃាត់ការដុតលុយខ្មោច វាគឺជារឿងដែលចម្លែកគួរឲ្យអស់សំណើច ហើយគេមិនជឿថារដ្ឋាភិបាលអាចនឹងហាមឃាត់ការអនុវត្តជាទំនៀមទម្លាប់ដ៏យូរលង់មួយនេះបាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ