ទំនាស់ដីរ៉ាំរ៉ៃ នៅសង្កាត់បឹងកក់១ ធ្វើឱ្យប្រជាជនមួយគ្រួសាររងការធ្វើទុកបុកម្នេញជាប្រចាំ
អង្គការមិនមែនរដ្ឋាភិបាល តំណាងរាស្ត្រ និងសកម្មជនដីធ្លី ជាច្រើននាក់ នៅព្រឹកថ្ងៃទី០៨ ខែមេសានេះ បានប្រមួលគ្នា ទៅផ្តល់កម្លាំងចិត្តដល់គ្រួសារមួយ ដែលរងការធ្វើទុកបុកម្នេញដោយហិង្សា ជាប់ជាប្រចាំ ដោយសារទំនាស់ដីធ្លី ក្នុងសង្កាត់បឹងកក់១ របស់រាជធានីភ្នំពេញ។ អ្នកតាមឃ្លាំមើលការរំលោភសិទ្ធិមនុស្ស ដែលជឿថា នោះជាទំនាស់ដីរវាងអ្នកភូមិ និងក្រុមហ៊ុនរបស់ឧកញ៉ា ឃុន សៀ ចោទអាជ្ញាធរមូលដ្ឋាន ថាបានបណ្តោយឱ្យមាននិទណ្ឌភាព ក្នុងរឿងបៀតបៀនអាយុជីវិតអ្នកភូមិ។ ប៉ុន្តែ អាជ្ញាធរបដិសេធការលើកឡើងដូច្នេះ។
ចុះផ្សាយនៅថ្ងៃ៖
ស្តាប់ - ០២:៥០
ទំនាស់ដីធ្លីមួយកន្លែង នៅសង្កាត់បឹងកក់១ ខ័ណ្ឌទួលគោក រាជធានីភ្នំពេញ បានធ្វើឱ្យអង្គការមិនមែនរដ្ឋាភិបាល អ្នកតំណាងរាស្ត្រគណបក្សសង្គ្រោះជាតិ និងសកម្មជនសិទ្ធិដីធ្លី ភ្ញាក់ ផ្អើល។ ថ្ងៃអង្គារ ទី០៨ ខែមសានេះ ពួកគេបានប្រមូលផ្តុំគ្នា មកផ្តល់កម្លាំងចិត្តឱ្យគ្រួសាររបស់លោក លី ស្រ៊ាខេង ដែលធ្វើរបងការពារផ្ទះរបស់ខ្លួន បន្ទាប់ពីគ្រួសារនេះរងនូវការអុកឡុកពីសំណាក់យុវជនមួយក្រុម កាលពីថ្ងៃទី០៦ ខែមេសាកន្លងទៅ។
សូមរម្លឹកថា កាលពីពីថ្ងៃមុន គេហដ្ឋាន ទ្រព្យសម្បត្តិ និងសមាជិករបស់គ្រួសារលោក លី ស្រ៊ាខេង ត្រូវបានយុវជនមួយក្រុម ដែលមានគ្នាប្រមាណ១៥នាក់ ប្រដាប់ដោយពូថៅ ញញូរ ដំបង និងដុំថ្ម ចូលទៅវាយ និងគប់បំផ្លិចបំផ្លាញ ដោយគ្មានការរារាំងពីសំណាក់អាជ្ញាធមូលដ្ឋានទេ។ ភ្លាមៗនោះ ប្រពន្ធ និងកូនរបស់លោក លី ស្រ៊ាខេង បានចេញទៅស្រែកទ្រហោរយំននៀលនៅកណ្តាលផ្លូវ ដែលមានចរាចរណ៍ដ៏មមាញឹក ដើម្បីស្រែកដង្ហោយរកយុត្តិធម៌។
គ្រួសារនេះ រួមជាមួយពីរគ្រួសារផ្សេងទៀត អះអាងថា ក្រុមយុវជនទាំងនេះ ជាមនុស្សរបស់លោក ឃុន សៀ អគ្គនាយកក្រុមហ៊ុន ឃុន សៀ អ៊ីមផត អិចផត ដែលទទួលបានសិទ្ធិគ្រប់គ្រងដីម្តុំនោះ ហើយចង់ឱ្យពួកគាត់រើចេញ ជាថ្នូរនឹងប្រាក់មួយម៉ឺនប្រាំពាន់ដុល្លារក្នុងមួយគ្រួសារ ប៉ុន្តែពួកគាត់មិន ព្រមទទួលសំណងនេះ។ បើតាមអ្នកភូមិ នេះជាមូលហេតុ ដែលនាំឱ្យពួកគាត់ត្រូវទទួលរងនូវការធ្វើទុកបុកម្នេញជាប់ជាប្រចាំ ក្រោមរូបភាពផ្សេងៗ តាំងពីឆ្នាំ២០១៣ ពីសំណាក់មនុស្សរបស់លោកឧកញ៉ារូបនេះ។ ប៉ុន្តែ បុគ្គលិករបស់ក្រុមហ៊ុន ឃុន សៀ អ៊ីមផត អិចផត បានបដិសេធការចោទប្រកាន់នេះ ដោយអះអាងថា វាជាជម្លោះបុគ្គលតែប៉ុណ្ណោះ។
លោក ចាន់ សុវ៉េត អនុប្រធានក្រុមស៊ើបអង្កេតផ្នែកសិទ្ធិមនុស្សសមាគមអាដហុក បានថ្លែងថា លោក សោកស្តាយ ដែលអាជ្ញាធរមូលដ្ឋានមិនបានស៊ើបអង្កេតវែកមុខជនល្មើសយកមកផ្តន្ទាទោស ហើយបណ្តោយឱ្យមាននិទណ្ឌភាព នៅក្នុងជម្លោះដីធ្លីរវាងប្រជាពលរដ្ឋ និងអ្នកមានទ្រព្យសម្បត្តិ។
លោក ប៉ាល់ ចន្ថន មន្ត្រីនៃអធិការដ្ឋាននគរបាលខណ្ឌទួលគោក បានឱ្យដឹងថា នៅថ្ងៃទី០៧ ខែមេសាម្សិលមិញ ភ្នាក់ងារនគរបាលមួយក្រុមបានធ្វើការស៊ើបអង្កេតលើកករណីវាយដំ បំផ្លិចបំផ្លាញទ្រព្យសម្បតិ្តរបស់គ្រួសារលោក លី ស្រ៊ាខេង ប៉ុន្តែលោកមិនទាន់អាចធ្វើអត្ថាធិប្បាយអំពីលទ្ធផលនៃការស៊ើបអង្កេតនេះទេ។ លោក ចន្ថន គ្រាន់តែប្រាប់ឱ្យដឹងថា អ្នកភូមិបីគ្រួសារនេះទារសំណងខ្ពស់ពេក។លោក វុធ ដារិទ្ធ ចៅសង្កាត់បឹងកក់១ ដែលបានបញ្ជាក់អំពីការស៊ើបអង្កេតរបស់នគរបាល អះអាងថា នោះជាជម្លោះឯកជន។ លោកបន្តថាដីទំនាស់ជាទីតាំងរបស់សាលាសង្កាត់ ហើយកន្លងទៅ អាជ្ញាធរក្រុងភ្នំពេញបានស្នើផ្តល់សំណង់ និងស្នើទីតាំងថ្មីនៅសង្កាត់ព្រែកលៀបឱ្យពួកគាត់ដែរ ប៉ុន្តែអ្នកភូមិមិនទាន់បានឆ្លើយតប។
នៅព្រឹកមិញនេះ អាជ្ញាធរបានរារាំងគ្រួសាររបស់លោក លី ស្រ៊ាខេង មិនឱ្យសាងសង់របងផ្ទះរបស់គាត់ទេ ត្បិតទីតាំងនោះកំពុងស្ថិតក្នុងទំនាស់មិនទាន់បានដោះស្រាយរួច។ បើតាមលោក ចាន់ សុវ៉េត សំណងដែលត្រូវបានស្នើឡើងចំពោះអ្នកភូមិ មិនអាចឱ្យពួកគេទិញផ្ទះរស់នៅ និងប្រកបរបរ ក្នុងក្រុងបានដូចបច្ចុប្បន្នឡើយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ