អាមេរិកព្យាយាមបញ្ចៀសកុំឲ្យអ.ស.ប.បោះឆ្នោតលើសមាជិកភាពប៉ាឡេស្ទីន
នៅពេលដែលថ្ងៃបើកមហាសន្និបាតអ.ស.ប.កាន់តែខិតជិតមកដល់ បញ្ហាសមាជិកភាពប៉ាឡេស្ទីនកាន់តែក្លាយជារឿងឈឺក្បាល សម្រាប់សហរដ្ឋអាមេរិក។ អាជ្ញាធរប៉ាឡេស្ទីនគ្រោងនឹងស្នើសុំជាផ្លូវការចូលជាសមាជិកអ.ស.ប. នៅសប្តាហ៍ក្រោយ។ សំណើនេះអាចនឹងត្រូវបរាជ័យដោយសារវ៉េតូអាមេរិក។ ក៏ប៉ុន្តែ ប្រសិនបើអាមេរិកប្រើសិទ្ធិវ៉េតូជំទាស់សមាជិកភាពប៉ាឡេស្ទីន អាមេរិកអាចនឹងត្រូវប្រឈមមុខនឹងភាពឯកោ និងអាចបាត់បង់ទំនាក់ទំនងជាមួយសម្ព័ន្ធមិត្តនៅតំបន់ដើមបូព៌ា។ ដើម្បីបញ្ចៀសបញ្ហានេះ អាមេរិកកំពុងតែព្យាយាមគ្រប់មធ្យោបាយធ្វើយ៉ាងណារារាំងកុំឲ្យមានការបោះឆ្នោតលើសមាជិកភាពប៉ាឡេស្ទីន នៅសប្តាហ៍ក្រោយ។
ចុះផ្សាយនៅថ្ងៃ៖
ស្តាប់ - ០២:១៧
បេសកជនពិសេសពីររូបរបស់អាមេរិកនឹងធ្វើដំណើរទៅកាន់តំបន់ដើមបូព៌ាជាថ្មីម្តងទៀត នៅថ្ងៃពុធនេះ ក្រោយពីបានបំពេញទស្សនកិច្ចនៅតំបន់នេះ កាលពីសប្តាហ៍មុន។ បេសកជនទាំងពីររូបនេះនឹងជួបជាមួយមេដឹកនាំអ៊ីស្រាអែល និងប៉ាឡេស្ទីន ដើម្បីព្យាយាមស្វែងរកការសម្រុះសម្រួលគ្នាមួយ ដើម្បីបញ្ចៀសកុំឲ្យប៉ាឡេស្ទីនដាក់ពាក្យសុំចូលជាសមាជិកអ.ស.ប.។
អាជ្ញាធរប៉ាឡេស្ទីនគ្រោងនឹងដាក់សំណើសុំចូលជាសមាជិក នៅពេលអ.ស.ប.បើកមហាសន្និបាតប្រចាំឆ្នាំ នៅថ្ងៃ២០ កញ្ញា សប្តាហ៍ក្រោយ។ រហូតមកទល់ពេលនេះ សំណើរបស់ប៉ាឡេស្ទីនបានទទួលការគាំទ្រពីប្រទេសជាច្រើន ដែលគេរំពឹងថានឹងគ្រប់គ្រាន់ល្មម អាចបោះឆ្នោតអនុម័តនៅក្នុងអង្គមហាសន្និបាតបាន។ ក៏ប៉ុន្តែ សមាជិកភាពរបស់ប៉ាឡេស្ទីនអាចនឹងត្រូវជាប់គាំងត្រឹមក្រុមប្រឹក្សាសន្តិសុខ ដោយសារតែអាមេរិកគ្រោងនឹងប្រើសិទ្ធិវ៉េតូជំទាស់។
ក៏ប៉ុន្តែ ការប្រើសិទ្ធិវ៉េតូជំទាស់នឹងសមាជិកភាពប៉ាឡេស្ទីនអាចនឹងធ្វើឲ្យអាមេរិកត្រូវឯកោតែម្នាក់ឯង ពីព្រោះប្រទេសជាសម្ព័ន្ធមិត្តរបស់អាមេរិកជាច្រើន រួមទាំងប្រទេសនៅអឺរ៉ុប ដូចជា បារាំង ជាដើម បានបង្ហាញនូវជំហរគាំទ្រសមាជិកភាពប៉ាឡេស្ទីន។ ថ្មីៗនេះ រុស្ស៊ី ដែលជាសមាជិកអចិន្រ្តៃយ៍ក្រុមប្រឹក្សាសន្តិសុខ ក៏បានប្រកាសគាំទ្រប៉ាឡេស្ទីនដែរ។
បញ្ហាកាន់តែធំ ដែលអាមេរិកត្រូវប្រឈមមុខ គឺទំនាក់ទំនងជាមួយពិភពអារ៉ាប់។ តួកគី និងអារ៉ាប៊ីសាអ៊ូឌីត ដែលជាសម្ព័ន្ធដ៏ធំរបស់អាមេរិក ក្នុងពិភពអារ៉ាប់ សុទ្ធតែបានប្រកាសគាំទ្រសមាជិកភាពរបស់ប៉ាឡេស្ទីន។ កាលពីថ្ងៃចន្ទ អតីតឯកអគ្គរាជទូតអារ៉ាប៊ីសាអ៊ូឌីតប្រចាំសហរដ្ឋអាមេរិកបានព្រមានទុកជាមុនថា ប្រសិនបើអាមេរិកប្រើសិទ្ធិវ៉េតូជំទាស់សមាជិកភាពប៉ាឡេស្ទីន ទំនាក់ទំនងអារ៉ាប៊ីសាអ៊ូឌីត-អាមេរិកនឹងមិនអាចដូចមុនទៀតទេ។ វ៉េតូរបស់អាមេរិកនឹងបំពុលទំនាក់ទំនងរវាងអាមេរិកនិងពិភពអារ៉ាប់។
សំណុំរឿងប៉ាឡេស្ទីនកំពុងក្លាយជាបញ្ហាចាក់ស្រែះមួយទៀត សម្រាប់លោកអូបាម៉ា។ ក្នុងពេលកំពុងគាំទ្រចលនាបដិវត្តន៍របស់ប្រជាជនអារ៉ាប់ នៅអេហ្ស៊ីប លីប៊ី ទុយនីស៊ី និងស៊ីរី លោកអូបាម៉ាបែរជាត្រូវមកជំទាស់មិនឲ្យប្រជាជនប៉ាឡេស្ទីនទទួលបានសិទ្ធិជាប្រជាជាតិមួយ ក្នុងអ.ស.ប.។ ប៉ុន្តែ បើសិនជាមិនប្រើសិទ្ធិវ៉េតូលើសមាជិកភាពរបស់ប៉ាឡេស្ទីន លោកអូបាម៉ានឹងត្រូវប្រឈមមុខនឹងការប្រឆាំងពីសំណាក់សមាជិកសភាអាមេរិក ដែលភាគច្រើនគាំទ្រអ៊ីស្រាអែល។ នៅពេលនេះ សភាអាមេរិកបានព្រមានទុកជាស្រេចទៅហើយថា នឹងកាត់ផ្តាច់រាល់ជំនួយទាំងអស់ទៅឲ្យប៉ាឡេស្ទីន ប្រសិនបើប៉ាឡេស្ទីននៅតែជំនះចូលជាសមាជិកអ.ស.ប.៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ