សហរដ្ឋអាមេរិកចង់បង្កើនទំនាក់ទំនងប្រកបដោយស្ថាបនាជាមួយចិន
នៅថ្ងៃសៅរិ៍ ទី២២ កុម្ភៈនេះ ឧត្តមសេនីយរ៉េ អូឌៀណូ(Ray Odierno) អគ្គមេបញ្ជាការទ័ពអាមេរិកបានប្រកាសឲ្យដឹងថា អាមេរិកមានសុទិដ្ឋិនិយមនៅការដោះដូរផ្នែកយោធាជាមួយចិន និងមានបំណងចង់ពង្រឹងទំនាក់ទំនងទ្វេភាគីឲ្យកាន់តែស៊ីជំរៅថែមទៀត។ យោងតាមរូបឧត្តមសេនីយដដែល ការធ្វើយ៉ាងនេះ គឺក្នុងគោលដៅកាត់បន្ថយភាពតានតឹងរវាងគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
គឺនៅក្នុងថ្ងៃបញ្ចប់នៃទស្សនកិច្ចនៅទីក្រុងប៉េកំាង ប្រទេសចិនដែលឧត្តមសេនីយរ៉េ អូឌៀណូបានថ្លែងប្រាប់អ្នកកាសែតថា កិច្ចសន្ទនារវាងលោក និងសមភាគីចិន គឺជាកិច្ចសន្ទនាយ៉ាងសំខាន់ដោយម្នាក់ៗបាននិយាយត្រង់ទៅ ត្រង់មក និងស្មោះត្រង់។ យោងតាមឧត្តមសេនីយអាមេរិកំាងរូបនេះដដែល ភាគីទំាងពីរបានលើកឡើងពីការពង្រឹងបន្ថែមនូវកិច្ចសហប្រតិបត្តិការយោធារវាងគ្នា និងវិធានការគ្រប់គ្រងក្នុងផ្នែកប្រកួតប្រជែងដោយធ្វើយ៉ាងណា ឲ្យការប្រកួតប្រជែងនោះផ្តល់ផលប្រយោជន៍ឲ្យគ្នា ទៅវិញមក។ សម្រាប់ឧត្តមសេនីយរ៉េ អូឌៀណូ អាមេរិក និងចិនត្រូវការគ្នាទៅវិញ ទៅមកដោយខានមិនបាន ទំាងកម្រិតរដ្ឋាភិបាល ក៏ដូចជាកម្រិតយោធា។ « វាពិតជារឿងមួយសំខាន់ណាស់ដែលអាមេរិក និងចិនត្រូវតែមានកិច្ចសន្ទនារវាងគ្នា មានការយល់គ្នាទៅវិញ ទៅមក និងការបង្កើនការទុកចិត្តគ្នានៅក្នុងវិស័យយោធា » នេះជាការបញ្ជាក់បន្ថែមរបស់ឧត្តមសេនីយរ៉េ អូឌៀណូ។
គួរជម្រាបជូនថា ទោះបីជាអាមេរិក និងចិនតែងតែអះអាងពីការពង្រឹងកិច្ចសហប្រតិបត្តិរវាងគ្នានៅលើគ្រប់វិស័យក៏ដោយ ក៏នៅមានចំណុចខ្វែងគំនិតគ្នាជាច្រើនទៀតដែលបន្តនៅជាបច្ចុប្បន្នភាព និងដែលបានបង្កឲ្យមានភាពតានតឹងជាហូរហែ ពិសេសមហិច្ឆតារបស់ចិននៅក្នុងតំបន់ដែលអាមេរិកពិបាកនឹងទទួលយក។ ជាក់ស្តែងថ្មីៗនេះ ឆន្ទៈរបស់រដ្ឋាភិបាលចិនដែលបានបង្កើតតំបន់ការពារដែនអាកាសនៅសមុទ្រចិនខាងត្បូង និងសមុទ្រចិនខាងកើត។ ពីខាងអាមេរិកវិញ ចិនមិនសប្បាយចិត្តដែលឃើញអាមេរិកបន្តគំាទ្រតៃវ៉ាន់ដែលចិនចាត់ទុកជាខេត្តឧទ្ទាមមួយរបស់ខ្លួន។
យ៉ាងណាក៏ដោយ ឧត្តមសេនីយរ៉េ អូឌៀណូបានបញ្ជាក់ថា ដំណើរមកកាន់ប្រទេសចិនរបស់លោក គឺដើម្បីរម្លឹកជាថ្មីម្តងទៀតអំពីសារៈសំខាន់នៃកិច្ចសន្ទនា ដោយសង្ឃឹមទុកជាមុនថា នឹងមានភាពចម្រើនផ្សេងទៀតក្នុងគោលដៅពង្រឹងបន្ថែមទំនាក់ទំនងយោធារវាងប្រទេសទំាងពីរនាឱកាសដំណើរទស្សនកិច្ចរបស់រដ្ឋមន្រ្តីការពារជាតិអាមេរិក Chuck Hagel ក្នុងប្រទេសចិននៅខែមេសាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ