អាមេរិកយល់ព្រមគាំទ្រកម្មវិធីសន្តិសុខចំណីអាហាររបស់ឥណ្ឌាដើម្បីការអនុវត្តន៍កិច្ចព្រមព្រៀងពាណិជ្ជកម្មរបស់ OMC
នៅថ្ងៃព្រហស្បត៍ម្សិលមិញ ប្រទេសឥណ្ឌា និងសហរដ្ឋអាមេរិចបានរកឃើញដំណោះស្រាយលើភាពមិនចុះសម្រុងគ្នាអំពីការឧបត្ថម្ភខាងផ្នែកកសិកម្មរបស់ឥណ្ឌាដែលនេះ ជាដំណើរឆ្ពោះទៅមុខដ៏សំខាន់សំរាប់ការអនុវត្តន៍កិច្ចព្រមព្រៀងពាណិជ្ជកម្មជាប្រវត្តិសាស្រ្តនៃអង្គការពាណិជ្ជកម្មពិភពលោក (OMC) ដែលបានចុះនៅក្រុងបាលីកាលពីខែធ្នូឆ្នាំ២០១៣កន្លងទៅ។
ចុះផ្សាយនៅថ្ងៃ៖
ស្តាប់ - ០២:១៩
គួររំលឹកជាបឋមថា កាលពីដើមខែធ្នូឆ្នាំ២០១៣នៅក្រុងបាលី ប្រទេសឥណ្ឌូនេស៊ី អង្គការពាណិជ្ជកម្មពិភពលោក (OMC) បានធ្វើសន្និសីទថ្នាក់រដ្ឋមន្ត្រីដែលមានការចូលរួមពីសមាជិកចំនួន១៦០ប្រទេសដែលក្នុងនោះ ក៏មានប្រទេសឥណ្ឌាផងដែរ។ ហើយក្នុងកិច្ចប្រជុំនោះ មានការចុះកិច្ចព្រមព្រៀងស្តីពីការសម្របសម្រួលការផ្តោះផ្តូរពាណិជ្ជកម្ម សំដៅកាត់បន្ថយរបាំងពន្ធគយរវាងប្រទេសសមាជិក។ តែក្រោយមក នៅខែកក្កដាឆ្នាំ២០១៤នេះ ប្រទេសឥណ្ឌាមិនយល់ព្រមផ្តល់សច្ចាប័នលើកិច្ចព្រមព្រៀងនេះ ដរាបណា ការបំរុងទុកអាហាររបស់ឥណ្ឌាមិនត្រូវបានលើកលែងទណ្ឌកម្មដែលអាចមានពីអង្គការពាណិជ្ជកម្មពិភពលោក (OMC)។
សូមបញ្ជាក់ថា ការធ្វើបំរុងទុកអាហារដែលមានការឧបត្ថម្ភពីរដ្ឋឥណ្ឌានេះ អាចត្រូវបានចាត់ទុកជាការល្មើសទៅនឹងវិធាននៃបទបញ្ជារបស់អង្គការពាណិជ្ជកម្មពិភពលោក ព្រោះការបំរុងទុកអាហារឧបត្ថម្ភបែបនេះវានាំឲ្យផ្ទុយនឹងគោលការណ៍នៃការប្រកួតប្រជែង និងលំហូរពាណិជ្ជកម្ម។ តែឥណ្ឌាបានលើកហេតុផលថា នេះជាកម្មវិធីសន្តិសុខចំណីអាហារដ៏ចាំបាច់ ធ្វើឡើងជាប្រយោជន៍សំរាប់កសិករក្រីក្រ និងអតិថិជនឥណ្ឌាដើម្បីអាចរស់នៅក្នុងបរិយាកាសពាណិជ្ជកម្មសាកលដ៏គ្មានមេត្តា។ ដូចនេះ ការស្វែងរកឃើញនូវដំណោះស្រាយរវាងញូដេលី និងវ៉ាស៊ីនតោននៅពេលនេះ ជាសញ្ញាដ៏ល្អដែលនឹងនាំទៅរកឯកច្ឆ័ន (consensus) សំរាប់ការអនុវត្តន៍ភ្លាមៗ និងពេញលេញនូវកិច្ចព្រមព្រៀងពាណិជ្ជកម្មដែលបានចុះនោះ ដើម្បីសំរួលដល់នីតិវិធីពន្ធគយដែលជាប្រយោជន៍ទៅវិញទៅមក និងនាំមកនូវការចំណេញខាងសេដ្ឋកិច្ចរាប់កោដិដុល្លាក្នុងមួយឆ្នាំៗ។
បើតាមសេចក្តីថ្លែងការណ៍ផ្លូវការអាមេរិក ប្រទេសទាំងពីរបានយល់ព្រមគ្នាថា កម្មវិធីសន្តិសុខចំណីអាហាររបស់ឥណ្ឌានឹងមិនត្រូវច្រានចោលដោយ OMC នោះទេ រហូតទាល់តែមានដំណោះស្រាយអចិន្ត្រៃយ៍មួយលើប្រធានបទនេះ។ ចំណែកឥណ្ឌាវិញបានលើកឡើងថា អាមេរិកសន្យាថានឹងគាំទ្រចំពោះកម្មវិធីនោះ នៅពេលដាក់ជូនទៅក្រុមប្រឹក្សាជាន់ខ្ពស់នៃអង្គការពាណិជ្ជកម្មពិភពលោក និងក៏បានសំដែងនូវក្តីរំភើបរីករាយដែលប្រទេសទាំងពីរបានរកឃើញនូវដំណោះស្រាយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ