អង្គការយូនីសេហ្វ៖ស្ត្រី៧០០លាននាក់ក្នុងពិភពលោក ត្រូវគេចាប់បង្ខំអោយរៀបការ
អង្គការយូនីសេហ្វ បានប្រកាសនៅថ្ងៃអង្គារនេះថា មានស្ត្រី៧០០លាននាក់ក្នុងពិភពលោក ត្រូវបានគេចាប់បង្ខំអោយរៀបការ ក្នុងនោះ ជាង២៥០លាននាក់ ជាក្មេងស្រីអាយុក្រោម១៥ឆ្នាំ។ នៅទីក្រុងឡុងដ៍ ថ្ងៃអង្គារនេះ អង្គការយូនីសេហ្វ បានរៀបចំសន្និសីទប្រឆាំងនឹងការរៀបការដោយបង្ខំ និងការកាត់ប្រដាប់ភេទក្មេងស្រី។ ការកាត់ប្រដាប់ភេទនេះ ធ្វើឡើងតាមប្រទេសមួយចំនួន ដើម្បីឆ្លើយតបនឹងវប្បធម៌រឺក៏សាសនា។ អង់គ្លេសត្រូវប្រកាសពីច្បាប់ថ្មីមួយ ទាក់ទងនឹងការដាក់ទោសលើឳពុកម្តាយណា ដែលអនុញ្ញាតអោយគេកាត់ប្រដាប់ភេទកូនស្រីខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
សន្និសីទប្រឆាំងនឹងការរៀបអាពាហ៍ពិពាហ៍ដោយបង្ខំ និងការកាត់ប្រដាប់ភេទក្មេងស្រី នៅ ទីក្រុងឡុងដ៍ ប្រទេសអង់គ្លេស មានឈ្មោះថា ជំនួបស្ត្រីឆ្នាំ២០១៤។ សន្និសីទប្រភេទនេះ ទើបតែបានរៀបចំជាលើកទី១ប៉ុណ្ណោះ។ យោងតាមអង្គការយូនីសេហ្វ មានស្ត្រី៧០០លាននាក់ក្នុងពិភពលោក ត្រូវបានគេចាប់បង្ខំអោយរៀបការ ក្នុងនោះ ជាង២៥០លាននាក់ ជាក្មេងស្រីអាយុក្រោម១៥ឆ្នាំ។ ស្ត្រីនិងកុមារីជាង១៣០លាននាក់ ក្នុងពិភពលោក ត្រូវបានចាប់បង្ខំអោយរៀបការ រឺក៏ត្រូវគេចៀរកាត់ប្រដាប់ភេទផ្នែកខាងក្រៅចោល។
ការកាត់ប្រដាប់ភេទក្មេងស្រី ជាសកម្មភាពក្នុងវប្បធម៌និងសាសនាប្រទេសមួយចំនួន ហើយប្រទេសប្រមាណ២៩ នៅតែបន្តអនុវត្តន៍សកម្មភាពនេះ។ អង្គការយូនីសេហ្វ រៀបចំសន្និសីទនៅក្រុងឡុងដ៍ ម្សិលមិញ អំពាវនាវអោយគ្រប់ភាគីក្នុងសង្គម គ្រប់ប្រទេស ជនគ្រប់រូប ចូលរួមប្រយុទ្ធប្រឆាំង បិទបញ្ចប់សកម្មភាពចាប់បង្ខំអោយស្ត្រីនិងក្មេងស្រីរៀបការ ប្រឆាំងការកាត់ប្រដាប់ភេទក្មេងស្រី។
សន្និសីទអង្គការយូនីសេហ្វ ធ្វើឡើងនៅអង់គ្លេស។ នៅអង់គ្លេស រដ្ឋាភិបាលរងរឿងអាស្រូវ ដោយសារមិនអាចដោះស្រាយបញ្ហាទាក់ទងការកាត់ប្រដាប់ភេទក្មេងស្រី ដែលប៉ះពាល់ស្ត្រី១សែន៧ម៉ឺននាក់ ក្នុងស្រុក។ សន្និសីទរបស់អង្គការយូនីសេហ្វបានអនុញ្ញាតអោយនាយករដ្ឋមន្ត្រីអង់គ្លេស ដាវីដ ខាំម៉ឺរ៉ុន ឆ្លៀងផ្សព្វផ្សាយប្រឆាំងសកម្មភាពល្មើសនេះ បានទូលំទូលាយ និងស៊ីជំរៅក្នុងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ